Wanem Jesus Teachim Abaotem Hemseleva

“Jesus barava savve hu nao hem, wea nao hem kam from, why nao hem kam long world, and wanem nao bae hem duim long future.”​—AUTHOR HERBERT LOCKYER.

IUMI mas savve long Jesus firstaem bifor iumi savve tinghae long wanem hem teachim and bilivim datwan. Hu nao Jesus? Wea nao hem kam from? Wanem nao hem kam for duim? Nomata iumi no stap long taem wea Jesus story long pipol, iumi savve readim wanem hem talem long Gospel bilong Matthew, Mark, Luke, and John. Taem iumi duim datwan, hem olsem iumi lisin long hem nao.

Hem stap finis bifor hem born long earth Wanfala taem Jesus sei: “Bifor Abraham hem born, mi stap finis.” (John 8:​58) Abraham hem laef samting olsem 2,000 year bifor Jesus born long earth. Nomata olsem, Jesus laef finis bifor Abraham hem born. Sapos olsem, wea nao Jesus stap? Jesus sei: “Mi kam daon from heven.”​—John 6:​38.

Son bilong God Jehovah garem staka angel long heven wea olketa nao olketa son bilong hem. Bat Jesus hem spesol. Jesus storyim hem nao “spesol Son bilong God.” (John 3:​18) Disfala toktok “spesol Son” minim God seleva nao wakem Jesus. God iusim spesol Son hia for wakem evri nara samting.​—Colossians 1:​16.

“Son bilong man” Staka taem nao Jesus iusim disfala toktok for story abaotem hemseleva. (Matthew 8:​20) Datwan showimaot hem no angel wea luk olsem man. Bat hem wanfala man. God iusim holy spirit for tekem laef bilong Son bilong hem long heven for kam long earth taem hem mekem Mary wanfala virgin gele for babule. Dastawe taem Jesus hem born, hem perfect and no garem sin.​—Matthew 1:​18; Luke 1:​35; John 8:​46.

Messiah wea God promisim Wanfala woman bilong Samaria sei long Jesus: “Mi savve Messiah bae kam.” Jesus sei long hem: “Mi nao datfala man.” (John 4:​25, 26) Disfala word “Messiah” witim word “Christ” minim “man wea God chusim.” God chusim Jesus for duim spesol waka for mekem olketa promis bilong hem kamap tru.

Why Jesus kam long earth Wanfala taem Jesus sei: “Mi mas talemaot gud nius abaotem kingdom bilong God, . . . bikos hem nao why God sendem mi kam.” (Luke 4:​43) Nomata hem duim staka gud samting for helpem pipol wea garem need, main samting wea hem duim nao hem preach abaotem Kingdom bilong God. Bihaen nao iumi bae storyim wanem hem teachim abaotem datfala Kingdom.

Tru tumas, Jesus hem no wanfala man nating nomoa.a Iumi bae lanem hao from hem laef long heven, datwan mekem olketa toktok bilong hem garem bigfala mining. Dastawe iumi no sapraes hao message wea hem talem bae helpem staka million pipol evriwea long world!

[Footnote]