Jesus Christ—Message Bilong Hem Savve Helpem Iu

“Mi kam for mekem olketa savve laef olowe.”​—JOHN 10:10.

JESUS CHRIST kam long earth for givim samting long pipol and no for kasem samting. Taem Jesus duim ministry bilong hem, hem givim wanfala nambawan samting long olketa man. Hem preachim message wea mekem pipol savve long tru samting abaotem God and wanem God laekem. Pipol wea acceptim datfala message savve garem gudfala laef distaem, olsem staka trufala Christian savve talem.a Bat barava important part long message wea Jesus preachim nao hem perfect laef wea hem givim taem hem dae for iumi. Laef bilong iumi depend nao sapos iumi acceptim disfala important part long message bilong hem.

Samting wea God and Christ givim Jesus savve olketa enemy bae killim hem dae long barava nogud wei. (Matthew 20:17-​19) Nomata olsem, staka pipol savve long wanem hem talem long John 3:​16. Hem sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” Jesus sei tu hem kam “for givim laef bilong hem, wea datwan hem price for sevem pipol.” (Matthew 20:28) Why nao Jesus sei hem bae givim laef bilong hem and no olketa narawan nao bae tekem laef bilong hem?

From God lovem olketa man tumas, hem duim samting for mekem olketa kamap free from sin and olketa nogud samting wea kamaot from datwan, wea hem nao wei for no perfect and dae. God sendem spesol Son bilong hem long earth for dae for iumi. Jesus hapi tu for duim datwan and hem givim perfect laef bilong hem for iumi. Diswan hem barava nambawan present wea God givim long olketa and hem nao price for sevem pipol.b Hem nambawan present wea savve mekem man laef olowe.

Samting wea iu need for duim Waswe, present wea God and Jesus givim hem for iu tu? Hem depend long wanem iu chus for duim. Tingim sapos wanfala man laek givim iu present wea hem pasolem. Hem bae no present bilong iu sapos iu no acceptim datwan, bat sapos iu acceptim datfala present, hem bilong iu nao. Long sem wei tu, Jehovah givim Jesus for dae for iu. Disfala present hem bilong iu sapos iu acceptim datwan. Hao nao iu savve duim datwan?

Jesus sei pipol wea “showimaot faith” long hem nao bae laef olowe. Samting wea man duim long laef bilong hem nao showimaot hem garem faith. (James 2:​26) Man showimaot faith long Jesus taem hem duim olketa samting wea Jesus talem and duim. Iu mas savve gud long Jesus and Dadi bilong hem firstaem bifor iu savve duim datwan. Jesus sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.”​—John 17:3.

Samting olsem 2,000 year go finis, Jesus Christ preachim message wea changem laef bilong staka million pipol long world. Waswe, iu laek for savve long samfala samting moa abaotem datfala message and gud samting wea iu and olketa long famili bilong iu savve kasem from datfala message, no long distaem nomoa bat for olowe? Olketa Jehovah’s Witness bae hapi for helpem iu.

Olketa nara article bae helpem iu for savve gud long Jesus Christ, datfala man wea preachim message wea savve changem laef bilong iu for olowe.

[Olketa Footnote]