Fren Gud Witim God

‘Kingdom Bilong Iu Bae Stap Strong for Olowe’

2 SAMUEL 7:​1-​16

LONG history, staka man wea rul lusim position bilong olketa. Samfala lusim position wea olketa garem taem pipol no votem olketa, bat olketa narawan, pipol nao forcem olketa for finis. Waswe long Jesus Christ, King wea rul insaed Kingdom bilong God? From God markem hem for rul, waswe, eni samting savve stopem hem for rul olsem King? Iumi savve lukim ansa long 2 Samuel chapter 7, taem Jehovah story witim King David bilong Israel.

Long start bilong chapter 7, David feel nogud bikos hem stap long haos bilong king wea barava naes, bat ark bilong God stap long tent nomoa.a David talemaot tingting bilong hem hao hem laek for buildim haos or temple wea fitim worship bilong Jehovah. (Verse 2) Bat David bae no buildim datfala temple. Jehovah talem profet Nathan for talem David hao son bilong hem nao bae buildim datfala temple.​—Verse 4, 5, 12, 13.

Jehovah tinghae long wanem David laek for duim, bikos datwan nao samting wea kamaot from heart bilong hem. God mekem covenant witim David bikos David tinghae and lovem trufala worship. Followim wanem Bible profesi talem finis, God promisim hao wanfala king bae kamap from laen bilong David wea bae rul for olowe. Nathan storyim promis bilong God long David taem hem sei: “Haos and kingdom bilong iu bae barava strong, rul bilong iu bae strong tumas.” (Verse 16) Olsem disfala covenant talem, hu nao bae Rul for olowe?​—Psalm 89:20, 29, 34-​36.

Jesus from Nazareth hem kam from laen bilong David. Bifor Jesus hem born, wanfala angel hem sei: “Jehovah God bae mekem hem king olsem dadi bilong hem, David, and bae hem king ovarem pipol bilong Jacob for olowe, and kingdom bilong hem bae no savve finis.” (Luke 1:​32, 33) So disfala covenant witim David hem kamap tru long Jesus Christ. Jesus garem raet for rul for olowe, no from olketa man chusim hem for rul, bat from God nao promisim. Hem gud for iumi tingim hao olketa promis bilong God kamap tru evritaem.​—Isaiah 55:10, 11.

Tufala important samting nao iumi lanem from 2 Samuel chapter 7. Firstfala samting, iumi barava sure no eni samting or eniwan savve stopem Jesus Christ for rul. Dastawe, iumi sure hem bae duim samting for mekem plan bilong God for disfala earth for kamap tru olsem long heven.​—Matthew 6:​9, 10.

Mek-tu samting, disfala story barava lanem iumi abaotem Jehovah. Jehovah lukim heart bilong David and tinghae long samting wea David laek duim. Hem barava gud for iumi savve Jehovah tinghae long love wea iumi garem for worshipim hem. Samfala taem, samting olsem nogud health or wei for olo, maet stopem iumi for duim samting wea iumi barava laek for duim for servem God. Sapos olsem, iumi savve kasem comfort for savve Jehovah lukim heart bilong iumi wea fulap witim love for worshipim hem.

[Footnote]