Sin wea King David Duim

Taem Saul dae, David nao hem king. Lo dat taem, David hem 30 years old. Afta samfala year wea hem king, lo wanfala naet, taem David stap lo ruf blo palace blo hem, hem lukim wanfala naesbola woman. David faendaot woman hia nem blo hem Bath-sheba, and hem maritim wanfala soldia wea nem blo hem Uriah. David sendem samfala man for go tekem kam Bath-sheba lo palace blo hem. David sleep witim datfala woman and woman hia babule. David trae for haedem wat hem duim. Hem talem bigman lo army blo hem for putim Uriah lo front laen blo datfala faet, and olketa muv bak from hem. Afta Uriah dae lo datfala faet, David maritim Bath-sheba.

Bat Jehovah lukim evri nogud samting hia wea happen. Wat nao bae hem duim? Jehovah sendem profet Nathan go lo David. Nathan sei: ‘Wanfala rich man garem staka sheepsheep, and wanfala poor man garem wanfala smol sheepsheep nomoa wea hem lovem tumas. Datfala rich man tekem only sheepsheep blo datfala poor man.’ David kros fogud and sei: ‘Datfala rich man shud dae!’ Then Nathan sei lo David: ‘Iu nao datfala rich man!’ David feel nogud tumas and sei lo Nathan: ‘Mi sin againstim Jehovah.’ Sin wea David duim mekem hem and famili blo hem kasem staka problem. David kasem panis from Jehovah, bat Jehovah no killim hem dae bikos hem honest and hambol.

David laek buildim wanfala temple for Jehovah, bat Jehovah chusim Solomon, son blo David for buildim datfala temple. David start for redyim evriting for Solomon and sei: ‘Temple blo Jehovah mas barava spesol. Solomon hem young yet, bat mi bae redyim evri samting for helpem hem.’ David iusim staka selen blo hemseleva for sapotim datfala waka. Hem tekem kam olketa man wea garem skill. Hem hipim olketa gold and silver, and hem talem olketa lo Tyre and lo Sidon for tekem kam olketa timba blo cedar tree. Bifor David dae, hem givim lo Solomon plan lo hao for buildim datfala temple. Hem sei: ‘Jehovah helpem mi for raetem daon evri samting abaotem disfala plan for iu. Jehovah bae helpem iu. Iu mas no fraet. Iu mas strong and duim waka.’