Helpem Olketa Young Wan Savve Gud Long Organization Bilong Jehovah
OLKETA pikinini evritaem laek for lanem samting. Tingim olketa kwestin wea olketa Israelite pikinini wea stap long Egypt maet askem long naet bilong firstfala Pasova. Maet olketa ask olsem: ‘Why nao olketa mas killim dae datfala pikinini sheepsheep?’ ‘Why nao Dadi putim blood raonem door?’ ‘Iumi go long wea?’ Law wea Jehovah givim long olketa Israelite dadi showimaot hem interest long olketa kwestin wea pikinini askem. Jehovah talem olketa olsem abaotem olketa Pasova wea bae kamap: “Taem olketa pikinini bilong iufala askem iufala, ‘Why nao iumi duim olketa samting hia?’ iufala mas sei, ‘Hem sakrifaes bilong pasova for Jehovah. Taem mifala stap yet long Egypt, hem mekem trabol for kasem pipol long Egypt, bat hem pas ovarem olketa haos bilong mifala and hem sevem mifala.’” (Ex. 12:24-27) Bihaen datwan, Jehovah talem olketa Israelite dadi and mami hem important for ansarem olketa kwestin wea pikinini askem abaotem “olketa law” wea Jehovah givim.—Deut. 6:20-25.
Tru tumas, Jehovah laekem olketa pikinini for savve long stretfala ansa for olketa kwestin abaotem tru worship wea bae helpem olketa for lovem Hem olsem God bilong olketa wea sevem olketa. Jehovah laekem olketa young wan distaem tu for kasem sem samting. Wanfala samting wea olketa dadi and mami savve duim for helpem pikinini for lovem God and pipol bilong hem, hem for helpem olketa savve gud long organization bilong Jehovah and luksavve long gud samting wea olketa kasem from organization. Bae iumi storyim wanem nao savve helpem pikinini for lanem samfala samting moa abaotem organization bilong God.
Kongregeson
Olketa young wan mas savve gud long kongregeson wea famili bilong olketa attendim. For duim datwan, iufala olketa dadi and mami mas tekem pikinini evritaem long olketa meeting. Taem iufala duim olsem, datwan showimaot iufala followim wanem Jehovah talem for olketa Israelite. Hem sei: “Hipimap olketa pipol, olketa man and woman and olketa smol pikinini . . . , for olketa savve lisin and lane, bikos olketa mas fraet long God bilong iufala Jehovah and mas followim evri toktok bilong disfala law. And olketa son bilong olketa wea no savve mas lisin, and olketa mas lane for fraet long God bilong iufala, Jehovah.”—Deut. 31:12, 13.
Olketa pikinini savve lane abaotem Bible from taem olketa baby yet. Aposol Paul story olsem abaotem Timothy: “Start kam from taem iu baby yet iu savve long olketa holy raeting.” (2 Tim. 3:15) Taem olketa pikinini smol yet, olketa savve lanem olketa samting wea gohed long meeting and start for lanem tu olketa Kingdom song. Long Kingdom Hall, olketa lanem hao for iusim and tinghae long Bible and olketa buk bilong iumi. Long olketa meeting bae olketa luksavve evriwan garem love, wea hem nao fasin wea showimaot iumi olketa tru Christian. Jesus sei: “Mi givim wanfala niu law long iufala. Iufala mas lovem iufala evriwan. Mi lovem iufala, and iufala tu mas lovem iufala evriwan long sem wei. Sapos iufala lovem iufala evriwan, pipol bae savve iufala olketa disaepol bilong mi.” (John 13:34, 35) Love wea olketa pikinini kasem and wei wea olketa feel sef taem olketa kam long Kingdom Hall bae helpem olketa for mekem wei for kam evritaem long olketa meeting olsem main samting long laef bilong olketa.
Taem iu kam early long olketa meeting and story witim narawan bihaen meeting, olketa pikinini bae garem chance for faendem olketa fren insaed kongregeson. Hem bae gud tu for helpem pikinini savve gud long olketa difren brata and sista winim wei for story nomoa long olketa nara pikinini! Taem olketa savve long olketa olo brata and sista, bae olketa luksavve olketa garem staka naes experience and olketa wise. Uzziah, king long Judah tu kasem gud samting from example bilong Zechariah, “man wea teachim hem for fraet long tru God.” So distaem tu, example bilong olketa wea faithful for worshipim Jehovah for longtaem finis savve barava helpem olketa young wan. (2 Chron. 26:1, 4, 5) Taem iu long Kingdom Hall, iu savve explainim long pikinini wanem nao library, notice board, and olketa nara samting wea stap long there.
Organization Bilong Jehovah
Pikinini need for savve kongregeson wea hem attendim hem part long organization bilong Jehovah long world wea garem winim 100,000 kongregeson. Storyim wanem nao organization, hao hem organize, and wanem olketa pikinini savve duim for sapotim waka insaed organization. Storyim why iu luk forward long olketa circuit assembly, distrik convention, and visit bilong circuit overseer.—Lukim box “Wanem for Storyim Long Taem Bilong Famili Worship,” long page 28.
Sapos iu garem chance, invaetem olketa traveling overseer, missionary, Bethelite, or olketa narawan wea duim full-taem service for kaikai long haos bilong iu. No tingse olketa no garem taem for story witim olketa young wan. Olketa wea duim full-taem service trae for followim example bilong Jesus wea evritaem interest long olketa pikinini and story witim olketa. (Mark 10:13-16) Taem olketa pikinini herem olketa experience and wei wea olketa brata and sista hia hapi for worshipim Jehovah, datwan savve mekem olketa for garem goal for duim full-taem ministry.
Wanem nao nara samting wea iu savve duim for helpem pikinini savve gud long organization bilong Jehovah? Samfala idea hem olsem: Mekem plan for famili studyim buk Jehovah’s Witnesses—Proclaimers of God’s Kingdom. Story abaotem love wea olketa wea worshipim Jehovah garem for hem, wei wea olketa hambol, and faithful. Storyim hao Jehovah iusim olketa hia for talemaot gud nius evriwea long earth. Iusim olketa video bilong organization for teachim pikinini abaotem olketa important samting wea olketa savve lanem from samting wea happen bifor and distaem. Sapos fitim, visitim branch office and Bethel hom long kantri bilong iu or maet long nara kantri. Datwan savve helpem pikinini luksavve organization bilong Jehovah hem organize mekem wakaman wea faithful and wise savve givim spiritual kaikai and leadim olketa brata evriwea long world, olsem hem happen long first century.—Matt. 24:45-47; Acts 15:22-31.
Storyim Wanem Hem Fitim Each Pikinini
Taem iu teachim pikinini, hem gud for tingim wanem Jesus duim taem hem teachim olketa aposol bilong hem. Wanfala taem hem sei: “Mi laek for talem iufala staka samting bat hem hard for iufala minim long distaem.” (John 16:12) Jesus no talem staka samting long olketa disaepol, bat hem isisi teachim olketa important truth long wei wea hem isi for olketa minim. Long sem wei tu, no teachim staka samting tumas long pikinini wea bae hard for hem minim. Taem iu isisi teachim olketa abaotem organization, datwan bae mekem olketa interest and laek lane abaotem Christian kongregeson. Taem olketa pikinini start for big, helpem olketa for savve moa abaotem samfala samting wea olketa lanem finis.
Christian kongregeson hem main ples wea helpem iumi fren gud witim God. Taem olketa young wan strong for duim olketa waka insaed kongregeson datwan bae helpem olketa for againstim world bilong Satan. (Rom. 12:2) Mifala savve iu bae kasem gud samting and hapi taem iu helpem pikinini for savve gud long organization bilong Jehovah. Jehovah bae blessim wanem iu duim for helpem olketa pikinini gohed faithful long organization and long God wea iumi worshipim.
[Piksa long page 28]
Wanem for Storyim Long Taem Bilong Famili Worship
Diswan hem samfala idea abaotem organization bilong Jehovah wea iu savve storyim long taem bilong Famili Worship.
▪ Storyim history bilong kongregeson wea iu attendim. Wanem taem nao hem start and hao nao hem start? Olketa wanem difren Kingdom Hall nao kongregeson iusim bifor? For storyim diswan, hem gud for invaetem samwan wea stap long kongregeson for longfala taem for kam long haos and ansarem olketa kwestin wea pikinini askem.
▪ Explainim why iumi garem olketa difren kongregeson meeting, assembly, and convention and hao olketa pikinini savve kasem gud samting from datwan.
▪ Storyim why nao organization bilong Jehovah startim olketa difren skul. Talem olketa experience wea showimaot olketa wea graduate long olketa skul hia kasem gud samting.
▪ Helpem olketa young wan for luksavve hem important for duim preaching waka evritaem. Helpem olketa for luksavve long wanem olketa seleva savve duim for sapotim waka evriwea long world wea iumi lukim long report insaed Yearbook of Jehovah’s Witnesses.
▪ Storyim olketa difren waka long full-taem service wea olketa young wan savve duim insaed organization bilong Jehovah. Chapter 10 long Organized to Do Jehovah’s Will buk storyim samfala samting moa abaotem datwan.
▪ Helpem olketa young wan for minim why iumi mas followim samfala samting insaed kongregeson. Explainim why olketa mas followim wanem organization bilong Jehovah disaedem nomata long smol samting. Helpem olketa for followim wanem olketa elder talem mekem olketa savve helpem kongregeson for stap gud.
[Piksa]
Pikinini bae kasem gud samting taem olketa fren gud witim olketa wea worshipim God for longtaem finis
[Piksa long page 26]
Olsem long Israel bifor, olketa dadi and mami distaem traem best for ansarem kwestin wea pikinini askem abaotem organization bilong Jehovah