Iu Garem Staka Samting for Hapi Long Hem
IUMI lukim evri samting wea Jehovah wakem hem no olobaot, olsem cell long body wea barava smol or universe wea garem staka billion galaxy. Datwan barava tru bikos “God hem no laekem evri samting for olobaot.” (1 Cor. 14:33) Wei wea Jehovah organizem pipol bilong hem for worshipim hem, hem nambawan samting tu. Tingim samting wea Jehovah duim. Hem mekem staka million angel long heven and pipol long earth for wan mind for worshipim hem and hem no forcem eniwan for duim datwan. Datwan hem nambawan samting!
Long Israel bifor, Jerusalem nao stand for organization bilong God long earth. Hem ples wea temple bilong Jehovah stap and king wea hem chusim. Wanfala Israelite wea prisoner long Babylon talem feeling bilong hem abaotem datfala holy taon. Hem sei: “Hem gud nomoa for tongue bilong mi pas insaed long mouth bilong mi sapos mi no tingim iu and Jerusalem olsem main ples wea mekem mi hapi.”—Ps. 137:6.
Waswe, iu garem sem tingting olsem abaotem organization bilong God distaem? Waswe, organization bilong God mekem iu hapi winim eni nara samting? Waswe, olketa pikinini bilong iu savve long history bilong organization bilong God long earth and hao hem waka? Waswe, olketa tinghae long wei wea olketa garem staka spiritual brata and sista evriwea long world? (1 Pet. 2:17) Hem gud for followim olketa idea long disfala article taem iu duim Famili Worship mekem datwan savve helpem famili for tinghae long organization bilong Jehovah!
Tingim Olketa Samting wea Happen “Long Bifor Kam Yet”
Evri year, olketa Israelite famili savve hipap for celebratem Pasova. Long firstaem wea olketa celebratem Pasova, Moses sei: “Sapos gogo olketa pikinini bilong iufala askem iufala, ‘Why nao iufala gohed for duim olketa samting hia?’ then iufala mas sei long olketa, ‘Jehovah iusim bigfala paoa bilong hem for sevem mifala. Hem mekem mifala kamap free from wei for slave long Egypt.’ ” (Ex. 13:14) Olketa Israelite mas no forgetim olketa samting wea Jehovah duim for olketa. Staka dadi long Israel followim wanem Moses talem. Plande year bihaen, wanfala Israelite prea olsem: “God bilong mifala, mifala herem olketa laen dadi talem mifala abaotem olketa big samting wea iu duim long bifor kam yet long taem bilong olketa.”—Ps. 44:1.
Maet wanfala young wan distaem tu ting long history bilong Olketa Jehovah’s Witness long 100 year wea go finis olsem samting wea happen “long bifor kam yet.” So wanem nao iu savve duim mekem olketa samting wea happen bifor hem really samting long pikinini bilong iu? Samfala dadi and mami iusim buk Jehovah’s Witnesses—Proclaimers of God’s Kingdom, olketa Yearbook, laef story wea stap long olketa pablikeson, and olketa nara report abaotem theocratic history, olsem niu DVD abaotem wanem pipol bilong God duim long taem bilong iumi. Olketa video abaotem olketa brata long Soviet Union and Germany wea pipol persecutim olketa, teachim famili for trustim Jehovah taem olketa kasem hard taem. Iu savve iusim olketa samting hia long Famili Worship. Datwan bae strongim faith bilong olketa pikinini for winim eni hard taem wea testim faith bilong olketa.
Bat olketa young wan maet kwiktaem lus interest taem iu story abaotem history. So duim samting wea bae mekem pikinini interest. Olsem example, maet iu askem pikinini for chusim kantri wea hem interest long hem, duim research abaotem theocratic history bilong datfala kantri, and then storyim long famili wanem hem lanem. Maet iu savve askem eni brata or sista long kongregeson wea faithful for longtaem for joinim Famili Worship bilong iufala. Maet pikinini bilong iu savve interviewim olketa and askem olketa for storyim experience bilong olketa. Or pikinini savve drawim piksa abaotem spesol samting wea happen, olsem branch construction, international convention, or hao olketa brata bifor iusim phonograph long haos tu haos ministry.
Lanem Hao “Evri Part Long Body Duim Gud Waka Bilong Olketa”
Aposol Paul storyim kongregeson olsem “full body [wea] waka gud tugeta. Olketa join duim gud waka bilong olketa for mekem evri part long body join gud tugeta, and taem evri part long body duim gud waka bilong olketa, datfala body hem grow and love strongim hem.” (Eph. 4:16) Taem iumi lane abaotem wei wea body bilong iumi waka, datwan mekem iumi for tinghae and respectim God. Long sem wei tu, taem iumi luksavve long wei wea kongregeson organize, iumi tinghae long “staka difren wei wea hem showimaot wisdom bilong [God].”—Eph. 3:10.
Jehovah storyim hao organization bilong hem waka long heven. Olsem example, Jehovah talem iumi hao firstaem hem givim revelation long Jesus Christ. Bihaen datwan Jesus “sendem angel bilong hem long John, wea hem wakaman bilong God, for talem hem olketa samting wea piksarem olketa samting hia wea bae happen. John story abaotem message bilong God.” (Rev. 1:1, 2) From God showimaot hao organization bilong hem long heven waka, datwan showimaot hem laekem iumi tu for savve hao ‘evri part duim gud waka bilong olketa’ long earth!
Sapos circuit overseer bae visitim kongregeson bilong iu, hem gud for famili storyim waka and privilege bilong olketa traveling overseer! Wanem nao olketa duim for helpem iumi? Maet iu savve storyim olketa nara samting olsem: Why nao hem important for raetem field service report? Hao nao organization bilong God kasem selen and iusim datwan? Hao nao Governing Body organize, and long wanem wei nao hem givim spiritual kaikai?
Iumi kasem gud samting taem iumi luksavve hao pipol bilong Jehovah organize. First samting, iumi tinghae long olketa wea waka hard for helpem iumi. (1 Thess. 5:12, 13) Mek-tu samting, datwan mekem iumi for sapotim olketa theocratic arrangement. (Acts 16:4, 5) Mek-thri samting, datwan helpem iumi for trustim olketa wea leadim iumi from iumi savve olketa disison and arrangement wea olketa mekem hem kam from Bible.—Heb. 13:7.
‘Lukluk Gud Long Olketa Taoa’
“Olketa pipol bilong God, iufala wakabaot raonem Zion and kaontem olketa taoa bilong hem. Lukluk gud long bigfala wall and olketa taoa, mekem iufala savve storyim datwan long olketa wea bae born kam bihaen.” (Ps. 48:12, 13) Man wea raetem psalm encouragem olketa Israelite for go lukim Jerusalem. Tingim olketa naesfala taem wea olketa famili long Israel garem taem olketa go long datfala holy taon evri year for olketa festival and lukim temple wea barava luk naes! Datwan mekem olketa for laek storyim olketa samting hia “long olketa wea bae born kam bihaen.”
Tingim queen bilong Sheba wea firstaem hem no bilivim olketa story abaotem nambawan rul bilong Solomon and bigfala wisdom wea hem garem. Wanem nao mekem hem for bilivim samting wea hem herem? Hem sei: “Mi nating bilivim wanem mi herem gogo mi kam lukim nao long eye bilong mi.” (2 Chron. 9:6) Tru tumas, samting wea iumi lukim “long eye” bilong iumi savve barava affectim iumi.
Wanem nao iu savve duim for helpem pikinini ‘lukim seleva’ olketa nambawan samting long organization bilong Jehovah? Sapos iu stap klosap long branch office bilong Olketa Jehovah’s Witness, traem best for go visit long there. Tingim Mandy and Bethany. Tufala stap samting olsem 1,500 kilometer from Bethel. Nomata olsem, staka taem dadi and mami tekem tufala go visit long Bethel, and olketa duim diswan taem tufala hia pikinini yet. Tufala sei: “Taem mifala no visit yet long Bethel, mifala tingse Bethel hem strict tumas and hem for olketa olo pipol nomoa. Bat mifala meetim olketa young wan wea waka for Jehovah and olketa barava hapi! Mifala luksavve organization bilong Jehovah hem big tumas, and evritaem mifala visit long Bethel datwan helpem mifala for fren gud witim Jehovah.” Taem Mandy and Bethany lukim wei wea organization bilong God waka, datwan mekem tufala for pioneer, and waka samfala taem long Bethel.
Nara samting tu stap wea helpem iumi for “lukim” organization bilong Jehovah wea olketa Israelite bifor no garem. Long olketa year wea go pas, iumi kasem olketa video and DVD wea showim olketa difren samting abaotem organization, olsem: Jehovah’s Witnesses—Organized to Share the Good News, Our Whole Association of Brothers, To the Ends of the Earth, and United by Divine Teaching. Taem famili lukim hard waka bilong olketa Bethelite, missionary, olketa wea duim relief waka, and olketa brata wea preparem and organizem olketa convention, datwan bae mekem famili tinghae long olketa brata and sista long full world.
Evri brata and sista duim important waka for preachim gud nius and sapotim olketa narawan long ples wea olketa stap. Bat hem gud for markem taem for famili bilong iu tingim “olketa brata bilong [iumi] evriwea long world.” Datwan bae helpem iu and olketa pikinini for “garem strongfala faith,” bikos iufala luksavve iufala garem staka samting for hapi long hem.—1 Pet. 5:9.
[Box/Piksa long page 18]
Organization Bilong God—Important Topic for Studyim
Staka samting nao Jehovah givim for helpem iumi lane abaotem organization bilong hem and hao hem waka. Olketa kwestin hia savve helpem iu:
☞ Hao nao waka bilong olketa traveling overseer hem start long taem bilong iumi?—Wastaoa, November 15, 1996, page 10-15.
☞ Wanem samting nao happen long “Day Bilong Olketa Pikinini” long Assembly wea kamap long 1941?—Wastaoa, July 15, 2001, page 8.
☞ Wanem nao waka wea Governing Body duim?—Wastaoa, May 15, 2008, page 29.