Waswe, Iu Laekem Tumas for Readim and Studyim Bible?

WANFALA sista wea nem bilong hem Lorraine sei: “Taem mi start for readim Bible, hem olsem wanfala hard samting for duim and mi no barava enjoyim. Hem no isi for minim olketa samting wea mi readim, so plande taem tingting bilong mi go difren.”

Olketa narawan tu talem hao olketa no enjoyim wei for readim Bible taem olketa just start for duim datwan. Nomata olsem, olketa no givap bikos olketa savve wei for readim Bible nao hem stret samting for duim. Marc sei: “Hem isi tumas for busy long olketa nara samting long taem for duim Bible reading and study seleva. Mi mas prea and waka hard evritaem for mekem wei for readim Bible kamap part long schedule bilong mi.”

Wanem nao iu savve duim for showimaot iu barava tinghae long Bible? Wanem nao iu savve duim mekem iu enjoyim wei for readim Bible? Tingim olketa idea hia.

Olketa Goal and Wanem for Duim

Prea bifor iu readim Bible mekem iu no tingim difren samting. Askem Jehovah for helpem iu for laek studyim Bible and for iu minim gud wisdom bilong hem. (Ps. 119:34) Sapos iu no prea bifor iu study, maet hem kamap wei bilong iu for duim datwan nomoa and maet iu no interest for gohed duim study seleva. Lynn sei: “Samfala taem mi no lukim olketa interesting point bikos mi read kwiktaem tumas. Staka taem mi no minim main point long wanem mi readim tu. Bat mi prea for kontrolem miseleva and datwan helpem mi for no tingim difren samting.”

Tinghae long wanem iu lanem. For kasem laef olowe iu mas minim and followim olketa tru samting long Bible. So waka hard for faendem olketa point wea savve helpem iu and followim datwan. Chris sei: “Mi trae for faendem olketa point wea bae helpem mi for luksavve long olketa nogud wei and tingting bilong mi. Nomata mi no savve long olketa wea raetem Bible and olketa nara buk bilong iumi, samting wea olketa raetem barava helpem mi.”

Markem olketa goal wea iu savve kasem. Trae for lanem niu samting abaotem pipol wea Bible storyim. Iu savve duim research abaotem olketa long Bible and long olketa nara pablikeson wea iu garem long languis bilong iu. Taem iu lane abaotem olketa man and woman wea Bible storyim, bae iu kasem gud samting from example bilong olketa.

Ting raonem olketa nara wei for storyim olketa scripture long pipol. (Acts 17:2, 3) Hem nao samting wea Sophia tingim taem hem study seleva. Hem sei: “Mi laek for savve long olketa nara wei for storyim olketa scripture long pipol wea mi meetim taem mi duim ministry and long olketa narataem, mekem mi savve storyim gud olketa tru samting long Bible. Wastaoa hem nambawan magasin wea helpem mi for duim datwan.”​—2 Tim. 2:15.

Tingim long mind bilong iu olketa samting wea Bible storyim. Hebrews 4:12 sei: “Toktok bilong God hem laef.” Taem iu readim Bible, trae for tingim wanem nao olketa wea Bible storyim olketa lukim. Trae for herem wanem olketa herem and tingim feeling bilong olketa. Comparem samting wea kasem olketa witim wanem hem kasem iu. Lanem hao olketa deal witim samting wea kasem olketa. Datwan bae mekem iu for minim and no forgetim olketa story wea stap insaed Bible.

Markem taem for studyim olketa scripture wea no isi for minim mekem iu savve gud long olketa. No letem nara samting spoelem taem wea iu markem for study. Taem iu study, maet iu lukim interesting kwestin or scripture wea iu need for duim moa research long hem long olketa pablikeson wea iu garem long languis bilong iu. Taem iu minim and followim olketa samting wea iu readim, bae iu laekem tumas for readim and studyim Bible. Iu bae talem sem samting olsem man wea raetem psalm. Hem sei: “Mi bae evritaem followim wanem iu [Jehovah] talem. Olketa toktok hia nao mekem mi hapi tumas.”​—Ps. 119:111.

No hariap for finisim study or wanem iu readim. Markem taem wea fitim for duim study seleva and mek sure hem no spoelem taem wea iu markem for prepare for olketa kongregeson meeting. Wanfala sista wea nem bilong hem Raquel sei: “Staka taem mi savve wari, and datwan mekem mi for no tingim wanem mi studyim. So mi markem lelebet samting nomoa for studyim, and datwan helpem mi for kasem gud samting.” Chris sei: “Taem mi kwiktaem for duim study, konsens bilong mi pokem mi bikos mi no rememberim staka samting. Plande taem mi no kasem gud samting from wei for study olsem.” So iusim gud taem wea iu garem and no hariap.

Barava laekem wei for studyim Bible. Aposol Peter sei: “Iufala mas olsem olketa baby wea just born nomoa, wea laekem tumas for susu. Iufala mas lane for barava laekem klinfala milk wea hem nao toktok bilong God wea savve mekem iufala grow and wea savve sevem iufala.” (1 Pet. 2:2) Hem wei bilong olketa baby for laekem tumas for susu. Bat Bible sei iumi mas lane for barava laekem toktok bilong God. Sapos iumi readim wanfala page long Bible evriday, bae iumi start for garem datfala feeling for laek studyim Bible. Maet firstaem hem no isi for duim datwan, bat gogo bae iumi enjoyim wei for readim and studyim Bible.

Ting raonem olketa story long Bible. Iu bae kasem gud samting tu taem iu ting raonem wanem iu readim. Diswan bae helpem iu for minim gud olketa topic long Bible wea iu duim research long hem finis. And bae iu hapi for kasem wisdom bilong God wea stap insaed Bible.​—Ps. 19:14; Prov. 3:3.

Kasem Gud Samting

Hem no isi for duim study seleva, bat iu bae kasem blessing sapos iu waka hard for duim datwan evritaem. Bae iu minim gud olketa scripture long Bible. (Heb. 5:12-14) Taem iu studyim Bible, bae iu hapi and garem peace from iu garem wisdom and fasin for luksavve. Wisdom wea stap insaed Bible hem olsem “tree wea givim laef” for olketa wea laek kasem datwan and followim.​—Prov. 3:13-18.

Taem iu studyim gud Bible, datwan bae mekem iu for minim samting. (Prov. 15:14) Hem bae helpem iu tu for givim kaonsel wea kam from Bible. Sapos iu disaedem samting followim wanem iu readim long Bible and olketa pablikeson wea “wakaman wea faithful and wise” givim, datwan bae strongim iu. (Matt. 24:45) Bae iu garem gudfala tingting, and wanem iu tingim, talem, and duim bae showimaot iu followim wanem iu lanem. Evri samting wea iu duim bae strongim wei wea iu fren witim God.​—Ps. 1:2, 3.

Taem iu lovem Jehovah datwan bae mekem iu for laek storyim wanem iu bilivim. Bae iu kasem gud samting tu taem iu duim olsem. Sophia trae for duim datwan. Hem trae for tingim and iusim olketa scripture wea hem lanem for helpem haosholder interest and for duim gud ministry bilong hem. Hem sei: “Taem mi lukim pipol interest long wanem Bible talem, datwan mekem mi hapi tumas.”

Nambawan samting wea iu bae kasem sapos iu studyim gud Bible, hem nao for fren gud witim Jehovah. Wei for studyim Bible bae helpem iu for savve long olketa standard bilong Jehovah and for tinghae long wei wea hem lovem iumi, kaen, and evritaem duim stret samting. Waka hard for studyim Bible bikos datwan nomoa savve mekem iu for kasem gud samting.—Ps. 19:7-11.

[Olketa Piksa long page 5]

READIM BIBLE: OLKETA GOAL AND WANEM FOR DUIM

▪ Prea bifor iu readim Bible mekem iu no tingim difren samting.

▪ Tinghae long wanem iu lanem.

▪ Markem olketa goal wea iu savve kasem.

▪ Ting raonem olketa nara wei for storyim olketa scripture long pipol.

▪ Tingim long mind bilong iu olketa samting wea Bible storyim.

▪ Markem taem for studyim olketa scripture wea no isi for minim mekem iu savve gud long olketa.

▪ No hariap for finisim study or wanem iu readim.

▪ Barava laekem wei for studyim Bible.

▪ Ting raonem olketa story long Bible.

[Piksa long page 4]

Tingim samting wea kasem iu wea semsem witim story wea iu readim long Bible