“Nambawan Overseer and Gudfala Fren”

JOHN (JACK) BARR, wea hem wanfala member bilong Governing Body bilong Olketa Jehovah’s Witness, hem finisim waka wea hem duim long earth long Saturday morning, December 4, 2010. Hem dae taem hem 97 year and staka savve long hem olsem “wanfala nambawan overseer and gudfala fren.”

Brata John Barr hem born long Aberdeen, long Scotland, and hem nao lastborn long famili. Dadi and mami bilong hem tu anointed Christian. Staka taem Brata Barr laek for story abaotem famili bilong hem taem hem young. Hem barava tinghae long nambawan example wea dadi and mami showimaot.

Taem Brata Barr hem teenager, hem no isi for hem story witim pipol wea hem no savve long olketa. Nomata olsem, hem traem best for winim datwan. Long 1927, long wanfala Sunday aftanun taem hem 14 year, hem talem dadi bilong hem hao hem laek for go preach witim hem long haos tu haos. Start from datfala taem hem gohed faithful for duim preaching waka go kasem taem hem dae.

Wanfala accident wea happen wea klosap mekem mami bilong hem dae, mekem Brata Barr for tingting abaotem why iumi laef. Long 1929, hem dedicate long Jehovah and hem garem chance for showimaot datwan long 1934, taem hem baptaes. Then long 1939, hem start for waka long Bethel long London, England. Hem duim full-taem service for 71 year.

Long October 29, 1960, Brata Barr startim wanfala samting wea hem kolem “wanfala spesol wei for fren.” Hem maritim Mildred Willett, wanfala faithful sista wea pioneer and missionary for longfala taem. Tufala barava showimaot gudfala example for olketa hasband and waef go kasem taem Mildred hem finisim waka wea hem duim long earth long October 2004. Start long taem tufala marit, tufala readim Bible evriday.

Staka wea savve long John Barr bae evritaem tingim hem olsem man wea givim gudfala advaes, garem gudfala tingting, evritaem kaen, and savve gud long Bible. Hem wanfala overseer wea waka hard and tingim narawan. Hem lovem and fren gud witim olketa tu. Olketa koment wea hem talem, olketa tok wea hem givim, and olketa prea bilong hem showimaot hem barava lovem truth and barava fren gud witim Jehovah.

Nomata iumi missim Brata Barr, iumi hapi from hem kasem nambawan hope for no dae moa. Hem wanfala privilege wea hem evritaem story abaotem and tingim evritaem. Hem hope wea Brata Barr barava tinghae long hem.​—1 Cor. 15:53, 54.a

[Footnote]