“Lukaftarem Olketa Sheepsheep Bilong God”
“Lukaftarem olketa sheepsheep bilong God wea hem nao markem iufala for lukaftarem. Iufala mas no duim diswan from eniwan forcem iufala, bat duim bikos iufala willing.”—1 PET. 5:2.
1. Taem Peter raetem firstfala leta bilong hem, wanem nao olketa Christian kasem?
APOSOL Peter raetem firstfala leta bilong hem no longtaem bifor Nero start for spoelem olketa Christian long Rome. Peter laek for strongim olketa brata and sista. Satan “raraon olsem wanfala lion,” and hem laekem tumas for kaikaim olketa Christian. For againstim Satan, olketa Christian hia mas “gohed for garem gudfala tingting” and “hambol for stap anda long God wea hem nambawan and garem bigfala paoa.” (1 Pet. 5:6, 8) Olketa mas gohed garem wan mind tu. Olketa mas no “raoa and faet witim narawan” bikos datwan bae spoelem wei wea olketa fren witim God and olketa narawan tu.—Gal. 5:15.
2, 3. Hu nao iumi mas againstim, and wanem nao bae iumi storyim?
2 Iumi tu kasem sem samting distaem. Satan lukaotem eni chance for spoelem iumi. (Rev. 12:12) Klosap nao bae “bigfala trabol kamap wea hem winim eni trabol wea happen start kam long taem world hem start.” (Matt. 24:21) Olketa Christian long first century traem best for no raoa witim narawan and iumi tu mas duim sem samting. Datwan minim samfala taem iumi needim olketa elder for helpem iumi.
3 Bae iumi storyim wanem nao savve helpem olketa elder for tinghae long waka wea olketa garem for lukaftarem “olketa sheepsheep bilong God.” (1 Pet. 5:2) Then bae iumi storyim hao olketa elder shud duim waka bilong olketa for lukaftarem olketa sheepsheep. Long next study, bae iumi lanem wanem kongregeson savve duim for ‘respectim olketa wea waka hard for helpem olketa, and wea leadim’ olketa sheepsheep long waka bilong Lord. (1 Thess. 5:12) Wei for ting raonem olketa samting hia bae helpem iumi for againstim Satan and for luksavve hem nao man wea iumi faetem.—Eph. 6:12.
Lukaftarem Olketa Sheepsheep Bilong God
4, 5. Hao nao olketa elder mas ting long olketa sheepsheep? Storyim example.
4 Peter encouragem olketa elder long first century for ting long olketa sheepsheep long sem wei wea God ting long olketa. (Readim 1 Peter 5:1, 2.) Nomata pipol ting long Peter olsem wanfala strong post insaed long kongregeson, hem no tok daonem olketa elder. Hem encouragem olketa bikos hem luksavve olketa elder tu. (Gal. 2:9) Distaem tu Governing Body duim sem samting. Olketa encouragem olketa elder long kongregeson for waka hard for lukaftarem olketa sheepsheep bilong God.
5 Peter sei olketa elder mas ‘lukaftarem olketa sheepsheep bilong God wea hem markem olketa for lukaftarem.’ Hem important for olketa luksavve evri sheepsheep hem bilong Jehovah and Jesus Christ. Olketa elder mas ansa long Jehovah for hao olketa lukaftarem olketa sheepsheep. Tingim sapos wanfala fren askem iu for lukaftarem olketa pikinini bilong hem. Bae iu lukaftarem olketa gud and feedim olketa! Sapos wanfala pikinini sik, bae iu tekem hem long doctor mekem hem kasem treatment! Olketa elder mas duim sem samting tu. Olketa mas lukaftarem “kongregeson bilong God wea hem baem long blood bilong Son bilong hem.” (Acts 20:28) Olketa elder luksavve God baem each sheepsheep long blood bilong Christ Jesus. From olketa elder mas ansa long God, olketa feedim, protectim, and lukaftarem olketa sheepsheep.
6. Wanem nao waka bilong olketa man for lukaftarem sheepsheep bifor?
6 Tingim waka bilong olketa man for lukaftarem sheepsheep bifor. Olketa mas lukaftarem olketa long daytaem nomata hem hot and long naet nomata hem cold. (Gen. 31:40) Olketa putim laef bilong olketa long danger tu for sevem olketa sheepsheep. David sevem olketa sheepsheep bilong hem from wanfala lion and bear and from olketa nara wild animal. David sei hem ‘kasholem olketa wild animal long nek and killim olketa dae.’ (1 Sam. 17:34, 35) David nating fraet! Hem isi tumas for datfala animal killim dae David! Nomata olsem, hem traem best for sevem olketa sheepsheep bilong hem.
7. Long tokpiksa wei, hao nao maet olketa elder pullim aot sheepsheep from mouth bilong Satan?
7 Distaem tu olketa elder mas keakea long olketa attak bilong Satan wea olsem lion. Long tokpiksa wei, maet olketa mas pullim aot sheepsheep from mouth bilong Satan. Olketa savve story gud witim olketa brata and sista wea no luksavve long wei wea Satan trae for spoelem olketa. (Readim Jude 22, 23.) Tru tumas, olketa elder fit for duim diswan from Jehovah nao helpem olketa. Olketa elder helpem sheepsheep wea garekil and bandagem and putim oil long hem for healim hem, wea hem nao Word bilong God.
8. Olketa elder leadim olketa sheepsheep go long wea, and hao nao olketa duim datwan?
8 Man wea lukaftarem olketa sheepsheep leadim olketa go long ples wea grass grow gud and wea garem wata. Long sem wei tu, olketa elder leadim olketa sheepsheep for kam insaed kongregeson. Olketa encouragem olketa for kam evritaem long meeting mekem olketa savve kaikai gud and kasem ‘kaikai long barava taem.’ (Matt. 24:45) Maet olketa elder need for iusim staka taem for helpem olketa wea sik long spiritual wei for acceptim spiritual kaikai wea stap long Bible. Maet wanfala sheepsheep wea lus trae for kam bak long kongregeson. Olketa elder no duim or talem samting wea bae mekem brata or sista for fraet, bat long kaenfala wei olketa explainim olketa Bible principle and showim hem hao for followim datwan.
9, 10. Wanem nao olketa elder savve duim for helpem olketa wea sik long spiritual wei?
9 Wanem kaen doctor nao iu laekem for helpem iu taem iu sik? Waswe, bae iu laek lukim doctor wea no lisin gud and kwiktaem nomoa for givim medicine mekem hem lukim nara sikman moa? Or waswe, bae iu laek lukim doctor wea lisin gud and explainim wanem sik nao maet iu garem bifor hem givim treatment wea fitim?
10 Long sem wei, olketa elder savve lisin long brata or sista wea sik long spiritual wei and duim samting for helpem hem. Long tokpiksa wei, olketa elder “putim oil long hem long nem bilong Jehovah.” (Readim James 5:14, 15.) Olsem balsam oil from Gilead, Bible savve mekem olketa wea sik for strong bak moa. (Jer. 8:22; Ezek. 34:16) Taem man wea wik followim olketa Bible principle, datwan bae helpem hem for worshipim Jehovah moa. Tru tumas, olketa elder savve helpem man wea sik sapos olketa lisin long wanem hem talem and prea for hem.
Willing for Lukaftarem Olketa Sheepsheep
11. Wanem nao mekem olketa elder willing for lukaftarem olketa sheepsheep bilong God?
11 Peter talem olketa elder wanem olketa shud duim taem olketa lukaftarem olketa sheepsheep and wanem olketa shud no duim. Olketa elder shud lukaftarem sheepsheep bilong God, ‘no from eniwan forcem olketa, bat bikos olketa willing.’ Wanem nao mekem olketa elder willing for helpem olketa brata and sista? Wanem nao mekem Peter for lukaftarem and feedim olketa sheepsheep bilong Jesus? Peter duim datwan bikos hem lovem Lord. (John 21:15-17) From olketa elder lovem Jesus, olketa “no duim nomoa wanem olketa seleva laekem, bat . . . duim wanem hem laekem.” (2 Cor. 5:14, 15) Disfala love wea olketa garem for Jesus, God, and olketa brata and sista mekem olketa elder for laek iusim taem, strong, and olketa material samting for helpem olketa sheepsheep. (Matt. 22:37-39) Olketa hapi for helpem narawan no from eniwan forcem olketa bat from olketa willing for duim datwan.
12. Aposol Paul willing for duim wanem for narawan?
12 Olketa elder shud willing for duim wanem for olketa sheepsheep? Olketa savve followim example bilong aposol Paul wea followim wei bilong Jesus. (1 Cor. 11:1) Paul and olketa wea travel witim hem barava lovem olketa brata and sista long Thessalonica. Olketa laekem tumas for ‘sharem gud nius bilong God witim olketa and for givim tu laef bilong olketa’ for helpem olketa. Olketa kaen taem olketa duim datwan, “olsem wanfala mami wea lukaftarem gud pikinini bilong hem wea hem susum.” (1 Thess. 2:7, 8) Paul savve long feeling wea mami garem for pikinini. Mami willing for duim eni samting for pikinini, nomata hem mas wekap midol long naet for feedim hem.
13. Olketa elder need for garem gudfala tingting abaotem wanem?
13 Olketa elder mas garem gudfala tingting abaotem waka for lukaftarem kongregeson and famili bilong olketa seleva. (1 Tim. 5:8) Taem wea olketa elder iusim for helpem kongregeson hem taem wea olketa savve iusim for stap witim famili tu. Wanfala wei wea olketa savve helpem kongregeson and famili, hem for invaetem narawan for joinim Famili Worship bilong olketa. For staka year finis, Masanao, wanfala elder long Japan, invaetem olketa wea singol and olketa famili wea no garem dadi insaed truth for joinim famili study bilong olketa. Gogo, samfala wea hem helpem kamap elder and olketa tu followim gudfala example bilong Masanao.
No Duim for Kasem Samting for Iufala Seleva
14, 15. Why nao olketa elder shud no ‘laek kasem samting for olketa seleva’ nomoa, and hao nao olketa savve followim example bilong Paul?
14 Peter encouragem olketa elder tu for lukaftarem olketa sheepsheep ‘no from olketa laek for kasem samting for olketa seleva, bat from olketa laek for helpem narawan.’ Olketa elder iusim staka taem for duim waka bilong olketa, bat olketa no expectim eni selen for wanem olketa duim. Peter warnim olketa elder bifor for no lukaftarem olketa sheepsheep bikos olketa laek for ‘kasem samting for olketa seleva’ nomoa. Olketa bigman bilong “Bigfala Babylon” kamap rich bikos olketa duim datwan and datwan mekem staka pipol poor. (Rev. 18:2, 3) Olketa elder distaem mas againstim wei for laek kasem samting for olketa seleva.
15 Paul showimaot gudfala example for olketa elder. Nomata Paul hem wanfala aposol, hem “no fulbae” long olketa Christian long Thessalonica. ‘Eni kaikai wea hem askem, hem peim datwan.’ Hem “barava waka hard long day and long naet.” (2 Thess. 3:8) Staka elder distaem, witim olketa wea duim traveling waka, showimaot gudfala example long diswan. Nomata olketa brata and sista invaetem olketa long haos bilong olketa, olketa “no fulbae” long eniwan.—1 Thess. 2:9.
16. Wanem nao hem minim for elder lukaftarem olketa sheepsheep bikos hem “laek for helpem narawan”?
16 Olketa elder lukaftarem olketa sheepsheep bikos olketa “laek for helpem narawan.” Samting wea olketa duim for helpem olketa sheepsheep showimaot olketa elder no tingim olketa seleva nomoa. Bat olketa elder no forcem olketa brata and sista for worshipim Jehovah. Olketa no encouragem olketa brata and sista for trae winim narawan tu. (Gal. 5:26) Olketa elder luksavve each sheepsheep hem spesol. Olketa willing for helpem olketa brata and sista for worshipim Jehovah and hapi.
No Bossim Olketa Sheepsheep Bat Showimaot Gudfala Example
17, 18. (a) Why nao samfala taem hem no isi for olketa aposol minim wanem Jesus talem abaotem wei for hambol? (b) Wanem sem samting nao maet iumi kasem?
17 Olsem iumi storyim finis, olketa elder shud tingim olketa sheepsheep wea olketa lukaftarem hem bilong God and hem no bilong olketa. Olketa mas “no bossim olketa pipol bilong God.” (Readim 1 Peter 5:3.) Samfala taem olketa aposol bilong Jesus no garem gudfala tingting. Olketa laek for kasem hae position olsem olketa bigman wea rulim olketa kantri duim.—Readim Mark 10:42-45.
18 Distaem tu, olketa brata wea “laek for elder” mas lukluk gud long olketa seleva firstaem for savve why nao olketa laek for duim datfala waka. (1 Tim. 3:1) Olketa wea elder finis maet ting raonem why nao olketa duim datfala waka. Waswe, hem bikos olketa laek for kasem hae position or bignem olsem samfala aposol duim? Sapos hem isi for olketa aposol garem kaen tingting olsem, olketa elder mas waka hard for againstim tingting bilong world for laek bossim narawan.
19. Taem olketa elder laek for protectim olketa sheepsheep, wanem nao olketa shud tingim?
19 Nomata olsem, samfala taem olketa elder need for givim strongfala kaonsel taem olketa laek for protectim sheepsheep from olketa “man wea olsem olketa wild dog.” (Acts 20:28-30) Paul talem Titus for gohed “encouragem and stretem” pipol bilong God. (Titus 2:15) Bat taem olketa elder givim kaonsel or mekem eni judicial disison, olketa respectim brata or sista wea olketa trae for helpem. Olketa elder no tok daonem datfala brata or sista, bat olketa luksavve wei for kaen and story gud savve helpem hem for disaedem stret samting.
20. Wanem nao olketa elder savve duim for followim example bilong Jesus?
20 Example bilong Christ encouragem olketa elder for lovem olketa sheepsheep. (John 13:12-15) Taem iumi read abaotem wei wea Jesus lanem olketa disaepol for preach and teachim pipol, iumi tu laek for followim example bilong hem. Wei wea Jesus hambol mekem olketa disaepol tu for ‘hambol and ting long narawan olsem hem winim olketa.’ (Phil. 2:3) Olketa elder distaem tu laek for followim example bilong Jesus and “showimaot gudfala example for olketa sheepsheep.”
21. Wanem reward nao olketa elder bae kasem?
21 Bihaen Peter givim kaonsel long olketa elder, hem storyim nambawan reward wea olketa bae kasem. (Readim 1 Peter 5:4.) Olketa elder wea anointed Christian bae “kasem datfala nambawan reward wea no eni samting savve spoelem” olsem Jesus kasem long heven. Olketa elder wea “nara sheepsheep” bae garem privilege for lukaftarem olketa sheepsheep bilong God long earth taem “nambawan man for lukaftarem olketa sheepsheep” hem rul. (John 10:16) Long next study, bae iumi storyim wanem nao olketa brata and sista savve duim for sapotim olketa wea leadim waka long kongregeson.
Review
• Why nao hem fitim for Peter givim advaes long olketa elder for lukaftarem olketa sheepsheep bilong God?
• Hao nao olketa elder shud helpem olketa wea sik long spiritual wei?
• Wanem nao mekem olketa elder for laek lukaftarem olketa sheepsheep bilong God?
[Piksa long page 21]
Olsem man for lukaftarem olketa sheepsheep bifor, olketa elder mas protectim olketa “sheepsheep”