Obeyim Olketa wea Jehovah Markem for Lukaftarem Sheepsheep

1, 2. Why nao Jehovah sei hem olsem man for lukaftarem sheepsheep?

JEHOVAH comparem hemseleva witim man wea lukaftarem sheepsheep. (Ezek. 34:11-14) Datwan helpem iumi for savve wanem kaen God nao Jehovah. Man wea lukaftarem gud sheepsheep hem luksavve laef bilong olketa sheepsheep stap long hand bilong hem. Hem leadim olketa go long ples wea wata and staka grass hem stap, and hem karem baby bilong olketa tu. (Ps. 23:1, 2; Isa. 40:11) Hem lukaftarem olketa sheepsheep evri day and evri naet and protectim olketa from olketa wild animal. (1 Sam. 17:34, 35; Luke 2:8) Hem lukaotem eni sheepsheep wea go difren, and hem keepim olketa wea garekil.—Ezek. 34:16.

² Long taem bilong Bible, plande pipol bilong God olketa farmer and lukaftarem olketa sheepsheep. So taem Jehovah sei hem olsem man for lukaftarem sheepsheep olketa savve wanem nao datwan minim. Olketa savve sapos no eniwan lukaftarem olketa sheepsheep, bae olketa no healthy and strong. Long sem wei, pipol needim Jehovah for lukaftarem and leadim olketa. (Mark 6:34) Sapos nomoa, olketa savve kasem nogud samting. Olketa no savve wanem nao stret and no stret, and no garem eniwan for protectim olketa. Olketa olsem “sheepsheep wea no garem eniwan for lukaftarem olketa.” (1 Ki. 22:17) Bat pipol wea letem Jehovah for lukaftarem olketa garem evri samting wea olketa needim.

3. Wanem nao bae iumi storyim long disfala study?

³ Iumi tu savve wanem hem minim taem Jehovah sei hem olsem man for lukaftarem sheepsheep. Jehovah hem barava lukaftarem gud pipol bilong hem distaem. Bae iumi storyim hao hem leadim and lukaftarem iumi. Bae iumi storyim tu wanem iumi mas duim for kasem gud samting from wanem Jehovah duim for iumi.

NAMBAWAN MAN FOR LUKAFTAREM SHEEPSHEEP MARKEM SAMFALA FOR HELP

4. Wanem nao Jesus duim for olketa sheepsheep bilong Jehovah?

⁴ Jehovah markem Jesus olsem Hed bilong Christian kongregeson. (Eph. 1:22, 23) Jesus, datfala “nambawan man for lukaftarem olketa sheepsheep,” garem sem wei olsem Dadi bilong hem. Jesus lovem and lukaftarem olketa sheepsheep and hem “willing for dae for sevem olketa” tu. (John 10:11, 15) Sakrifaes bilong Christ hem wanfala nambawan present for olketa man! (Matt. 20:28) Jehovah laekem “evriwan wea showimaot faith long [Jesus] no dae bat kasem laef olowe”!—John 3:16.

5, 6. (a) Hu nao Jesus markem for lukaftarem olketa sheepsheep? (b) Wanem nao olketa sheepsheep mas duim mekem olketa kasem gud samting from datwan? (c) Wanem nao main reason why iumi willing for followim wanem olketa elder talem?

⁵ Wanem nao olketa sheepsheep duim wea showimaot olketa luksavve Jesus Christ hem nambawan man for lukaftarem sheepsheep? Jesus sei: “Olketa sheepsheep bilong mi herem toktok bilong mi, and mi savve long olketa, and olketa followim mi.” (John 10:27) Olketa followim toktok bilong Jesus long wei for evritaem followim direction bilong hem, wea minim olketa obeyim tu olketa wea hem markem for lukaftarem olketa. Long first century, Jesus markem olketa aposol and disaepol for lukaftarem olketa sheepsheep. Hem talem olketa for teachim and feedim “olketa smol sheepsheep” bilong hem. (Readim John 21:15-17; Matt. 28:20) Taem pipol long staka ples herem gud nius and staka pipol kamap disaepol, Jesus mekem arrangement for olketa mature Christian lukaftarem olketa kongregeson.—Eph. 4:11, 12.

⁶ Paul sei long olketa elder long kongregeson long Ephesus: “Holy spirit hem markem iufala for elder long kongregeson bilong God wea . . . lukaftarem olketa sheepsheep.” (Acts 20:28) Holy spirit markem olketa brata for kamap elder distaem tu. Why nao iumi sei olsem? Bikos olketa kasem olketa mark wea stap insaed long Bible. So taem iumi obeyim olketa elder, iumi showimaot respect long Jehovah and Jesus, tufala main wan for lukaftarem olketa sheepsheep. (Luke 10:16) Diswan nao main reason why iumi willing for obeyim olketa elder. Bat olketa nara reason stap tu why iumi shud followim wanem olketa talem.

7. Wanem nao olketa elder duim for helpem iu gohed fren gud witim Jehovah?

⁷ Taem olketa elder givim direction and helpem olketa brata and sista, olketa evritaem iusim Bible for duim datwan. Olketa elder no trae for disaedem evri samting for olketa brata and sista. (2 Cor. 1:24) Bat olketa laek for helpem olketa brata disaed seleva followim olketa Bible principle. Taem olketa elder duim olsem, olketa helpem kongregeson for wan mind and garem peace. (1 Cor. 14:33, 40) Bible sei olketa elder nao “lukaftarem iufala.” Diswan minim olketa elder laek for helpem evriwan insaed long kongregeson for fren gud witim Jehovah. So olketa kwiktaem helpem eni brata or sista wea “start for go rong,” or wea go rong finis. (Gal. 6:1, 2; Jude 22) Iumi garem staka gudfala reason for obeyim olketa wea lead long kongregeson.—Readim Hebrew 13:17.

8. Wanem nao olketa elder duim for protectim kongregeson?

⁸ Aposol Paul hem lovem olketa sheepsheep. Dastawe hem talem disfala warning for olketa brata long Colossae: “No letem olketa iusles toktok and tingting bilong man for trapim iufala. Olketa samting hia join witim kastom bilong olketa man and olketa iusles samting bilong disfala world nomoa. Olketa no kam from Christ.” (Col. 2:8) Disfala warning helpem iumi for luksavve long nara reason why hem important for obeyim instruction wea kam from olketa elder. Olketa protectim olketa brata from eniwan wea laek spoelem faith bilong olketa. Aposol Peter sei “olketa laea profet” and “olketa laea teacher” bae trae mekem olketa Christian wea wik for no obeyim Jehovah. (2 Pet. 2:1, 14) Samfala taem olketa elder mas givim semkaen warning tu. Olketa elder olketa mature Christian wea garem savve. Olketa kamap elder bikos olketa showimaot olketa minim gud Bible and savve hao for teachim olketa tru samting from Bible. (1 Tim. 3:2; Titus 1:9) Wei wea olketa elder mature, garem balance tingting, and followim wisdom wea kam from Bible helpem olketa for givim gudfala advaes long olketa brata and sista.

NAMBAWAN MAN FOR LUKAFTAREM SHEEPSHEEP FEEDIM AND PROTECTIM OLKETA

9. Hao nao Christian kongregeson distaem kasem direction and spiritual kaikai?

⁹ Jehovah iusim organization bilong hem for provaedem spiritual kaikai for olketa brata and sista evriwea long world. Iumi kasem staka kaonsel from Bible insaed olketa pablikeson bilong iumi. Samfala taem olketa elder kasem direction from organization bilong Jehovah, maet long olketa leta or from olketa traveling overseer. Long evri difren wei olsem, olketa sheepsheep kasem kliafala direction.

10. Wanem nao olketa wea lukaftarem sheepsheep bae duim sapos wanfala brata or sista lusim kongregeson?

¹⁰ Olketa elder garem responsibility for protectim and lukaftarem olketa sheepsheep. Olketa elder barava tingim olketa wea faith bilong olketa wik, or wea duim bigfala mistek. (Readim James 5:14, 15.) Maet samfala go difren from kongregeson and no gohed worshipim God. Wanem nao man for lukaftarem sheepsheep bae duim for helpem olketa olsem? Hem bae traem best for lukaotem olketa hia and encouragem olketa for kam bak long kongregeson. Jesus sei: “Dadi bilong mi long heven bae no laekem eniwan long olketa disaepol hia for lus.”—Matt. 18:12-14.

HAO NAO IUMI TING LONG OLKETA WIK POINT BILONG OLKETA ELDER?

11. Why nao maet hem no isi for samfala obeyim olketa elder?

¹¹ Jehovah and Jesus tufala perfect. Bat olketa elder wea tufala iusim for lukaftarem kongregeson no perfect. Bikos long datwan, hem no isi for samfala obeyim olketa elder. Maet olketa ting olsem: ‘Olketa elder tu no perfect olsem mifala. So why nao mifala mas herem wanem olketa talem?’ Hem tru, olketa elder no perfect bat iumi mas garem stretfala tingting abaotem wik point bilong olketa and mistek wea olketa duim.

12, 13. (a) Long bifor, wanem mistek nao olketa wea garem bigfala responsibility olketa duim? (b) Why nao Jehovah laekem olketa wea raetem Bible for raet abaotem mistek bilong olketa hia?

¹² Bible no haedem rong bilong olketa man wea Jehovah iusim for leadim pipol bilong hem long bifor. Olsem example, God chusim David for kamap king long Israel, bat gogo hem sin againstim God. Hem duim adultery witim wanfala woman and killim dae hasband bilong hem. (2 Sam. 12:7-9) Tingim tu aposol Peter. Nomata hem kasem bigfala responsibility insaed long kongregeson, hem tu duim olketa bigfala mistek. (Matt. 16:18, 19; John 13:38; 18:27; Gal. 2:11-14) Evriwan wea born bihaen long Adam and Eve olketa no perfect. Jesus nomoa hem perfect.

¹³ Why nao Jehovah laekem olketa wea raetem Bible for raet abaotem mistek bilong olketa wea garem bigfala responsibility? Wanfala reason hem for showimaot Jehovah savve iusim olketa man wea no perfect for leadim pipol bilong hem. Datwan nao samting wea hem duim from bifor kam. So iumi distaem no savve iusim wik point or mistek bilong olketa elder olsem excuse for no stap anda long olketa. Jehovah laekem iumi for respectim and obeyim olketa.—Readim Exodus 16:2, 8.

14, 15. Wanem nao iumi savve lanem from wei wea Jehovah givim instruction long pipol bilong hem bifor?

¹⁴ Hem barava important for iumi obeyim olketa elder. Why nao olsem? Tingim wei wea Jehovah givim instruction long pipol bilong hem for olketa savve gohed stap laef long bifor. Olsem example, taem olketa Israelite lusim Egypt, God iusim Moses and Aaron for talem important instruction long olketa Israelite. And tu, sapos olketa Israelite no laekem firstborn bilong olketa for dae long datfala mek-ten trabol, olketa mas obeyim olketa instruction. Olketa mas kaikaim spesol kaikai, busarem wanfala sheepsheep, and putim blood bilong sheepsheep hia antap and saed long door long haos bilong olketa. Waswe, God seleva nao talem kam evri instruction hia long olketa? Nomoa, olketa mas obeyim instruction wea olketa famili hed talem wea kam from Moses. (Ex. 12:1-7, 21-23, 29) Long datfala taem, Jehovah iusim Moses and olketa famili hed for leadim olketa Israelite. Distaem, Jehovah iusim olketa elder long kongregeson for leadim iumi.

¹⁵ Maet iu savve long olketa nara story long Bible wea Jehovah iusim olketa man or angel for givim instruction long pipol bilong hem. Staka taem instruction hia sevem olketa. Long olketa taem hia, God iusim olketa narawan for toktok for hem and talem pipol wanem olketa mas duim for gohed stap laef. Iumi sure Jehovah bae duim sem samting for pipol bilong hem long Armageddon. Nomata olsem, olketa elder wea garem responsibility for toktok for Jehovah or organization bilong hem distaem mas barava careful for no iusim paoa wea olketa kasem long rongfala wei.

WANFALA SEKSON NOMOA, AND WANFALA MAN FOR LUKAFTAREM OLKETA

16. Wanem nao datfala “voice” wea iumi mas willing for herem?

¹⁶ Pipol bilong Jehovah “wanfala sekson nomoa” wea Jesus Christ nao “lukaftarem olketa.” (John 10:16) Jesus sei hem bae stap witim olketa disaepol bilong hem “go kasem taem wea world hem finis.” (Matt. 28:20) From Jesus hem King long heven, hem kontrolem evri samting wea bae happen bifor hem kam for finisim world bilong Satan. Wanem nao savve helpem iumi for garem wan mind and stap sef insaed organization bilong God? Bible hem sei: “Bae ear bilong iufala herem wanfala voice bihaen long iufala wea sei: ‘Diswan nao road for iufala wakabaot followim.’” Datfala “voice” hem olketa samting wea Jehovah teachim iumi long Bible, and samting wea Jehovah and Jesus iusim olketa elder for talem long iumi.—Readim Isaiah 30:21; Revelation 3:22.

17, 18. (a) Hu nao laek attakim pipol bilong God, and wanem nao iumi sure long hem? (b) Wanem nao bae iumi storyim long next study?

¹⁷ Bible sei Satan hem “olsem wanfala lion wea singaot big and hem laekem tumas for kaikaim eniwan.” (1 Pet. 5:8) Hem olsem wild animal wea hangre. Hem lukaotem olketa sheepsheep, and weitim gudfala taem for attakim sheepsheep wea wik or wea go difren from olketa narawan. Dastawe iumi mas barava waka klos witim kongregeson and Jehovah, “man wea lukaftarem olketa sheepsheep and wea hem protectim laef bilong [iumi].” (1 Pet. 2:25) Revelation 7:17 story abaotem pipol wea stap laef bihaen datfala big trabol. Hem sei Jesus “bae lukaftarem olketa. Hem bae leadim olketa go long olketa springwata wea savve mekem man laef, and God bae draem evri tias long eye bilong olketa.” Datwan hem nambawan promis!

¹⁸ Responsibility wea olketa elder garem for lukaftarem kongregeson hem barava important. Wanem nao savve helpem olketa elder for kaen long olketa sheepsheep bilong Jesus? Bae iumi ansarem disfala kwestin long next study.