Olketa Elder Mas Olsem Tufala Nambawan Man for Lukaftarem Sheepsheep

1, 2. (a) Why nao hem important for lukaftarem gud olketa sheepsheep? (b) Why nao pipol long taem bilong Jesus olsem sheepsheep wea no garem man for lukaftarem olketa?

OLKETA sheepsheep savve healthy sapos man lukaftarem olketa gud. Wanfala buk wea story abaotem wei for lukaftarem sheepsheep sei sapos man hem leavim sheepsheep for stap seleva long wanfala ples for kaikaim grass and hem no lukaftarem olketa, bihaen tu-thri year nomoa bae olketa sheepsheep hia kamap wik and sik. Bat taem man wea lukaftarem sheepsheep hem keepim olketa gud, evriwan strong and healthy.

² Hem semsem tu long kongregeson. Taem olketa elder long kongregeson lukaftarem gud evri sheepsheep bilong God, datwan bae mekem full kongregeson gohed strong long spiritual wei. Bible sei Jesus feel sorre for pipol bikos “olketa garekil and stap olobaot olsem olketa sheepsheep wea no garem eni man for lukaftarem olketa.” (Matt. 9:36) Why nao pipol long taem bilong Jesus olsem sheepsheep wea no garem man for lukaftarem olketa? Diswan hem bikos olketa wea garem waka for teachim Law bilong God, olketa raf and strict tumas, and samting wea olketa talem, olketa seleva bat no duim tu. From olketa bigman hia no kaen and no lukaftarem gud pipol, datwan mekem hem barava hard for pipol worshipim God. Hem olsem olketa bigman hia mekem pipol karem “samting wea hevi tumas” long shoulder bilong olketa.—Matt. 23:4.

3. Wanem nao olketa elder mas no forgetim?

³ Distaem olketa elder garem barava important waka for duim. Olketa lukaftarem sheepsheep bilong Jehovah and Jesus. Jesus wea hem “nambawan man for lukaftarem olketa sheepsheep” barava tinghae long olketa sheepsheep dastawe hem dae for olketa. (John 10:11) Christ “peim” olketa witim “spesol blood” bilong hem. (1 Cor. 6:20; 1 Pet. 1:18, 19) Olketa elder mas no forget Jesus Christ wea hem “nambawan man for lukaftarem olketa sheepsheep” hem nao hed bilong olketa. So olketa mas givim ansa long hem for wei wea olketa lukaftarem olketa sheepsheep.—Heb. 13:20.

4. Wanem nao bae iumi storyim long disfala study?

⁴ Long wanem wei nao olketa elder long kongregeson shud lukaftarem olketa sheepsheep? Bible encouragem evriwan long kongregeson for obeyim olketa wea lead. Bat Jehovah talem olketa elder tu for no “bossim olketa pipol bilong God.” (Heb. 13:17; readim 1 Peter 5:2, 3.) Hao nao olketa elder savve gohed “leadim” olketa sheepsheep and “no bossim” olketa? Hao nao olketa elder savve lukaftarem olketa sheepsheep and no duim eni samting wea olketa overseer no garem paoa for duim?

“KAREM OLKETA KLOSAP LONG HEART BILONG HEM”

5. Wanem nao iumi lanem abaotem Jehovah long Isaiah 40:11?

⁵ Profet Isaiah sei olsem abaotem Jehovah: “Olsem wanfala man for lukaftarem sheepsheep bae hem lukaftarem olketa sheepsheep bilong hem. Hem bae holem kam olketa pikinini sheepsheep and karem olketa klosap long heart bilong hem. Hem bae lukaftarem gud olketa mere sheepsheep wea susum pikinini bilong olketa.” (Isa. 40:11) Disfala scripture storyim wei wea Jehovah lukaftarem olketa long kongregeson wea wik and wea needim protection. Olsem wanfala man for lukaftarem sheepsheep hem savve long samting wea each sheepsheep needim, Jehovah savve wanem each wan insaed long kongregeson needim and hem willing for helpem hem. Olsem wanfala man for lukaftarem sheepsheep hem karem sheepsheep wea just born klosap long heart bilong hem, Jehovah tu comfortim and givim wanem iumi needim taem iumi kasem bigfala test or hard taem. Jehovah hem “Dadi wea kaen and sorre long iumi.”—2 Cor. 1:3, 4.

6. Wanem nao elder savve duim for followim example bilong Jehovah?

⁶ Elder insaed kongregeson savve lanem nambawan samting from Dadi bilong iumi long heven! Olsem Jehovah, hem mas traem best for luksavve long samting wea sheepsheep needim. Sapos wanfala elder savve long olketa hard samting wea olketa long kongregeson kasem, bae hem savve long best taem for encouragem and sapotim olketa, and bae hem savve long hao for duim datwan tu. (Prov. 27:23) For duim olsem, datfala elder mas garem taem for story witim olketa brata and sista and lisin gud long wanem olketa talem. Nomata hem careful for no poke nose long bisnis bilong narawan, hem trae for luksavve long olketa samting wea happen long kongregeson and willing for spendem taem for helpem “olketa wea wik.”—Acts 20:35; 1 Thess. 4:11.

7. (a) Long taem bilong Ezekiel and Jeremiah, wanem nao happen long olketa sheepsheep bilong God? (b) Wanem nao iumi savve lanem from wei wea Jehovah no hapi long olketa wea no lukaftarem gud sheepsheep bilong hem?

⁷ Tingim wei bilong olketa wea garem waka for lukaftarem pipol bilong God long taem bilong Ezekiel and Jeremiah. Jehovah no hapi long olketa hia bikos olketa shud lukaftarem sheepsheep bilong hem bat olketa no duim datwan. Jehovah sei: “Olketa wild animal kaikaim olketa sheepsheep bilong mi bikos no eni man stap for lukaftarem olketa. Olketa man for lukaftarem olketa sheepsheep no lukaotem olketa sheepsheep bilong mi. Olketa feedim olketa seleva, bat no feedim olketa sheepsheep bilong mi.” Olketa man hia selfish and tingim olketa seleva nomoa. (Ezek. 34:7-10; Jer. 23:1) God no hapi tu long olketa bigman long olketa religion wea sei olketa Christian. Wanem important samting nao olketa elder savve lanem from wei wea Jehovah rejectim olketa wea no lukaftarem gud sheepsheep bilong hem? Olketa elder mas showimaot love and givim help wea olketa sheepsheep bilong Jehovah needim.

“MI SHOWIM WEI FOR IUFALA FOLLOWIM”

8. Hao nao olketa elder savve followim nambawan example bilong Jesus taem olketa givim kaonsel long narawan?

⁸ From iumi man born sin, samfala long kongregeson maet no barava minim gud wanem nao Jehovah laekem iumi for duim. Maet taem olketa mekem disison olketa no followim olketa Bible principle, or samting wea olketa duim showimaot olketa no kamap mature Christian yet. Sapos diswan happen, wanem nao olketa elder shud duim? Olketa shud followim example bilong Jesus wea patient witim olketa disaepol bilong hem. Plande taem nao olketa disaepol raoa abaotem hu long olketa nao hem important long Kingdom, bat no enitaem Jesus hem kros long olketa. Hem gohed teachim olketa and hem kaen taem hem givim kaonsel abaotem wei for hambol. (Luke 9:46-48; 22:24-27) Hem wasim leg bilong olketa for helpem olketa savve wanem nao hem minim for hambol. Olketa elder distaem tu mas hambol.—Readim John 13:12-15; 1 Pet. 2:21.

9. Wanem tingting bilong olketa aposol nao Jesus mas stretem?

⁹ Aposol James and John tingse wei for lukaftarem sheepsheep hem minim for bossim olketa. Tufala askem Jesus for garem hae position long Kingdom. Bat Jesus stretem tingting bilong tufala and teachim olketa for garem difren tingting. Hem sei: “Iufala savve olketa wea rulim olketa kantri garem bigfala paoa ovarem pipol, and olketa bigman bilong olketa barava bossim olketa. Iufala mas no olsem. Sapos eniwan long iufala laek for bigman, hem mas kamap man for helpem iufala.” (Matt. 20:25, 26) Olketa aposol mas traem best for no “bossim” olketa narawan, wea minim for no evritaem talem olketa wanem for duim.

10. Hao nao Jesus laekem olketa elder for lukaftarem olketa sheepsheep, and wanem example nao Paul showimaot long diswan?

¹⁰ Jesus laekem olketa elder for followim example bilong hem for lukaftarem olketa sheepsheep. Olketa mas willing for helpem olketa brata and sista bilong olketa and no bossim olketa. Olsem Jesus, aposol Paul hem hambol for helpem olketa narawan. Hem sei long olketa elder long kongregeson long Ephesus: “Start long taem wea mi kam stap witim iufala long Asia go kasem taem wea mi lusim iufala, iufala savve gud long wei bilong mi. Mi no tingim miseleva taem mi duim waka bilong Lord.” Paul laekem olketa elder for hambol and waka hard for olketa brata. Paul showim example for olketa elder long wei for “helpem olketa wea wik.” (Acts 20:18, 19, 35) Taem hem raet long olketa long Corinth, hem talem olketa hem no boss long faith bilong olketa. Bat hem wanfala wakaman bilong God nomoa olsem olketa, and hem laek helpem olketa for hapi taem olketa worshipim God. (2 Cor. 1:24) Paul showimaot gudfala example for olketa elder distaem long wei for hambol and waka hard.

GIVIM KAONSEL WEA KAM FROM “TOKTOK BILONG GOD”

11, 12. Wanem nao elder savve duim for helpem wanfala brata disaedem samting?

¹¹ Elder mas evritaem givim kaonsel wea kam from “toktok bilong God.” (Titus 1:9) And tu, taem hem kaonselem eniwan, hem mas “kaen long hem.” (Gal. 6:1) Hem bae no trae forcem olketa brata for duim samting, bat hem bae helpem olketa for disaedem seleva samting wea followim Bible and wea showimaot olketa lovem Jehovah. Olsem example, maet elder helpem wanfala brata for disaedem important samting taem hem storyim olketa Bible principle witim hem, or wanfala article long olketa pablikeson bilong iumi. Maet elder encouragem datfala brata for tingim olketa difren samting wea savve kamaot from wanem hem disaedem, and hao datwan savve affectim wei wea hem fren witim Jehovah. Then datfala elder savve remindim brata hia why hem important tumas for prea long God bifor hem disaedem samting. (Prov. 3:5, 6) Bihaen tufala story olsem, elder bae no disaed for datfala brata bat brata hia nao bae disaed seleva.—Rome 14:1-4.

¹² Olketa elder savve duim nomoa wanem Bible hem talem. Dastawe hem barava important for olketa iusim Bible long gudfala wei and evritaem givim kaonsel wea kam from Bible. Taem olketa elder duim olsem, olketa no iusim paoa wea olketa kasem from God long rongfala wei. Olketa sheepsheep hia no bilong olketa elder, olketa bilong God. So evriwan insaed long kongregeson mas ansa long Jehovah and Jesus for samting wea olketa disaedem.—Gal. 6:5, 7, 8.

“GUFDALA EXAMPLE FOR OLKETA SHEEPSHEEP”

13, 14. Long olketa wanem wei nao elder savve showimaot gudfala example for olketa sheepsheep?

¹³ Bihaen Peter talem olketa elder for no “bossim pipol bilong God,” hem encouragem olketa for showimaot “gudfala example for olketa sheepsheep.” (1 Pet. 5:3) Long wanem wei nao elder savve duim datwan? Tingim tufala spiritual mark wea brata mas garem firstaem bifor hem savve kamap wanfala elder. First samting, hem mas garem “gudfala tingting.” Diswan minim hem barava savve long olketa Bible principle and hem savve hao for followim olketa principle hia long laef bilong hem. Hem no seksek long taem bilong trabol and hem tingting gud firstaem bifor hem disaedem eni samting. Mek-tu samting, hem mas “lukaftarem gud famili bilong hem.” Diswan minim sapos elder garem famili, hem mas gudfala hasband and dadi bikos “sapos man no savve hao for lukaftarem gud famili bilong hem, hard tumas for hem lukaftarem kongregeson bilong God.” (1 Tim. 3:1, 2, 4, 5) Olketa brata and sista long kongregeson savve trustim olketa elder wea garem olketa spiritual mark hia.

¹⁴ Olketa elder showimaot gudfala example long wei for lead long preaching waka olsem Jesus tu hem duim. Disfala waka for preachim gud nius abaotem Kingdom hem wanfala main important samting wea Jesus duim long earth, and hem teachim olketa disaepol bilong hem hao for duim disfala waka. (Mark 1:38; Luke 8:1) Distaem, olketa pablisa enjoyim wei for waka witim olketa elder long preaching waka. Olketa lukim olketa elder strong for duim disfala important waka and olketa savve lane from gudfala wei bilong olketa for teach. Taem olketa elder evritaem markem taem for preach and strong for duim datwan nomata olketa barava busy, datwan encouragem olketa long kongregeson for strong for duim ministry tu. Olketa elder savve showimaot gudfala example tu long wei for prepare for olketa meeting, givim koment, and duim olketa waka olsem for klinim and lukaftarem Kingdom Hall.—Eph. 5:15, 16; readim Hebrew 13:7.

“HELPEM OLKETA WEA WIK”

15. Why nao olketa elder duim shepherding kol?

¹⁵ Man wea lukaftarem gud sheepsheep hem savve kwiktaem for helpem sheepsheep wea garekil or sik. Long sem wei tu, olketa elder mas kwiktaem for helpem olketa wea kasem hard taem, or wea needim kaonsel or encouragement. Maet olketa olo and olketa wea sik needim samwan for helpem olketa evriday, bat samting wea olketa barava needim nao hem encouragement and comfort from Bible. (1 Thess. 5:14) Maet olketa young wan long kongregeson stragol for faet againstim “olketa samting wea young pipol laekem.” (2 Tim. 2:22) Olketa elder helpem evriwan long kongregeson long wei for duim shepherding kol. Taem olketa duim datwan, olketa trae for minim olketa hard samting wea kasem olketa brata and iusim Bible for encouragem olketa. Sapos olketa elder kwiktaem for helpem olketa brata and sista, maet diswan savve helpem olketa for misstim olketa bigfala problem.

16. Taem samwan long kongregeson garem bigfala problem, wanem nao olketa elder savve duim?

¹⁶ Waswe sapos wanfala brata long kongregeson garem bigfala problem and luk olsem diswan bae spoelem wei wea hem fren witim Jehovah? Bible sei: “Waswe, eniwan long iufala hem sik? Hem mas askem olketa elder long kongregeson for helpem hem. Olketa mas prea for hem and putim oil long hem long nem bilong Jehovah. Datfala prea wea olketa talem from olketa garem faith bae mekem datfala man wea sik hem gud bak, and Jehovah bae mekem hem strong. And tu, God bae forgivim eni sin wea hem duim finis.” (Jas. 5:14, 15) Nomata sapos datfala brata wea “sik” long spiritual wei hem no “askem olketa elder” for helpem hem, taem olketa elder savve abaotem datwan olketa shud kwiktaem for helpem hem. Taem olketa sheepsheep kasem hard taem, olketa elder savve prea witim olketa, and savve prea for olketa and sapotim olketa tu. Datwan showimaot olketa lukaftarem gud olketa sheepsheep and encouragem olketa for gohed worshipim Jehovah witim strong and hapi.—Readim Isaiah 32:1, 2.

17. Taem olketa elder followim example bilong “nambawan man for lukaftarem olketa sheepsheep,” hao nao datwan affectim kongregeson?

¹⁷ Long evri waka wea olketa elder duim long organization bilong Jehovah, olketa traem best for followim example bilong Jesus Christ, wea hem nao “nambawan man for lukaftarem olketa sheepsheep.” Olketa elder hia helpem olketa sheepsheep gohed strong for worshipim God and faithful. Iumi barava tinghae long olketa elder wea lovem iumi and iumi tinghae tu long Nambawan man for lukaftarem sheepsheep, Jehovah.