2 God No Tingim Man—Waswe Hem Tru?
Maet iu herem: “Sapos God tingim man bae hem finisim nogud samting and wei for safa. Nomata sapos hem tingim pipol, hem no warim nomoa samting wea happen long iumi wanwan.”
Samting Bible teachim: Jehovah God no kosim nogud samting for happen. (James 1:13) Hem garem paoa for finisim nogud samting bat hem letem pipol wea duim nogud samting for stap distaem. God duim olsem mekem samfala kwestin wea kamap bihaen hem wakem olketa man kasem ansa. Gogo God bae duim samting for helpem pipol and stretem olketa problem wea pipol wea rejectim rul bilong hem olketa kosim.—Genesis 3:1-6; Isaiah 65:17.a
God tingim olketa man long earth and long semtaem showimaot hem barava lovem iumi wanwan tu. Story long Matthew 10:29-31 showimaot God savve long samfala samting abaotem iumi wea iumiseleva tu no savve. Hem sei: “Man savve salem tufala smol bird for wanfala selen nomoa, iaman? Nomata olsem, Dadi bilong iufala hem savve taem wanfala smol bird olsem hem dae. Iu savve, hem kaontem finis tu evri hair long hed bilong iufala. So iufala no fraet, bikos iufala barava important winim evri smol bird hia.”
Savve long truth helpem iu: No eniwan laekem man wea raf or no tingim narawan. Dastawe staka pipol no laek for savve long God or olketa prea long hem nomoa taem olketa insaed trabol, bikos olketa bilivim God no tingim man. Taem iu savve Jehovah God barava tingim iu maet datwan mekem iu laek for lanem moa samting abaotem hem and fren witim hem.
Olsem example, long bifor maet iu prea long God bat iu no really sure sapos hem herem iu or sapos hem bae ansarem iu. Bible sei God wea “herem prea” hem evritaem willing for herem prea bilong eniwan wea story long hem from heart.—Psalm 65:2.
God askem iu for ‘putim evri wari bilong iu long hand bilong hem bikos hem tingim iu.’ (1 Peter 5:7) Iumi sure hem tingim iumi tu taem iumi garem bigfala hevi bikos Bible sei: “Jehovah hem stap klosap long olketa wea sorre tumas; and hem sevem olketa wea barava wikdaon.”—Psalm 34:18.
[Footnote]
a For savve moa samting abaotem why God letem iumi for safa, lukim chapter 11 long buk, Wanem Nao Really Samting wea Bible Teachim?
[Blurb long page 5]
God tingim iumi dastawe hem askem iumi for prea long hem