Worshipim Jehovah Witim Full Heart
“Eni samting wea iufala duim, duim witim full heart and strong bilong iufala. Duim datwan olsem iufala waka for Jehovah.”—COL. 3:23.
1-3. (a) From Jesus dae for iumi, waswe, datwan minim iumi no need for givim eni sakrifaes distaem? Minim kam. (b) Wanem kwestin nao maet iumi tingim?
LONG first century C.E., Jehovah talem pipol bilong hem hao sakrifaes bilong Jesus nao finisim Law bilong Moses. (Col. 2:13, 14) Start from datfala taem, Jehovah no acceptim moa olketa animal sakrifaes and olketa nara offering wea olketa Jew duim for staka handred year. Law hem duim waka for “leadim iumi go long Christ.”—Gal. 3:24.
2 Datwan no minim olketa Christian no need for givim eni sakrifaes. Aposol Peter sei olketa Christian need for givim olketa sakrifaes. Hem sei: “Givim olketa sakrifaes wea spirit bilong God leadim iufala for duim and wea God hapi long hem. Iufala savve duim olsem bikos long Jesus Christ.” (1 Pet. 2:5) Aposol Paul tu storyim evri samting wea wanfala Christian wea dedicate long God hem duim, hem olsem “wanfala sakrifaes.”—Rom. 12:1.
3 Olketa Christian savve givim sakrifaes long Jehovah taem olketa duim samting for hem or sakrifaesim samfala samting long laef mekem olketa savve worshipim hem. Long last study, iumi storyim olketa sakrifaes wea olketa Israelite givim. Long wanem wei nao samting wea iumi lanem savve helpem iumi for givim olketa sakrifaes wea Jehovah acceptim?
WANEM IUMI DUIM EVRIDAY
4. Wanem nao iumi need for tingim abaotem samting wea iumi duim evriday?
4 Maet iumi no luksavve hao olketa samting wea iumi duim evriday hem join witim wei for givim olketa sakrifaes long Jehovah. Maet iumi tingse waka wea iumi duim long haos, skul, waka ples, or taem iumi go for baem samting bae no affectim wei wea iumi fren witim Jehovah. Bat sapos iu dedicate finis or iu plan for duim datwan, hem gud for luksavve olketa samting hia savve affectim wei wea iu fren witim Jehovah. Iumi Christian 24 hour evriday and iumi need for followim olketa Bible principle long evri samting wea iumi duim. Dastawe Paul sei: “Eni samting wea iufala duim, duim witim full heart and strong bilong iufala. Duim datwan olsem iufala waka for Jehovah and no for olketa man.”—Readim Colossians 3:18-24.
5, 6. Wanem nao iumi shud tingim abaotem wei and kaleko bilong iumi?
5 Hem tru, staka samting wea iumi duim evriday hem no part long worship bilong iumi. Nomata olsem, Paul sei eni samting wea iumi duim, iumi mas “duim witim full heart” for Jehovah. Wanem nao iumi lanem? Waswe, wei and kaleko bilong iumi evritaem showimaot iumi olketa Christian? Or waswe, samfala taem iumi shame for talemaot iumi wanfala Witness bikos wei and kaleko bilong iumi hem no fitim Christian? Iumi shud no letem datwan for happen! Iumi no laek duim eni samting wea bae mekem pipol for garem nogud tingting abaotem Jehovah.—Isa. 43:10; 2 Cor. 6:3, 4, 9.
6 Bae iumi storyim hao wei for duim evri samting “witim full heart” for Jehovah savve affectim laef bilong iumi long staka difren wei. Hem gud for tingim tu hao olketa Israelite evritaem givim best sakrifaes for Jehovah.—Ex. 23:19.
HEM AFFECTIM FULL LAEF
7. Hao nao wei for dedicate long Jehovah shud affectim laef bilong iu?
7 Taem iu dedicate long Jehovah, iu mekem wanfala gud disison. Iu promis for iusim full laef for worshipim Jehovah. (Readim Hebrews 10:7.) Tru tumas, taem iu traem best for duim samting followim tingting bilong Jehovah, iu evritaem kasem gud samting. (Isa. 48:17, 18) Pipol wea worshipim Jehovah olketa holy and hapi bikos olketa followim wei bilong hem.—Lev. 11:44; 1 Tim. 1:11.
8. Wanem nao tingting bilong Jehovah long sakrifaes wea olketa Israelite givim, and wanem nao iumi lanem?
8 Jehovah ting long olketa sakrifaes wea olketa Israelite givim olsem samting wea holy. (Lev. 6:25; 7:1) Hebrew word wea olketa transleitim “holy” hem minim for separate, or worshipim God nomoa. Sapos iumi laekem Jehovah for acceptim olketa sakrifaes wea iumi givim, iumi mas stap klia from olketa nogud samting bilong disfala world. Iumi mas no lovem olketa samting long world wea Jehovah heitim. (Readim 1 John 2:15-17.) Datwan minim iumi mas no kaban witim nogud pipol or duim eni samting wea bae mekem God ting long iumi olsem iumi no holy. (Isa. 2:4; Rev. 18:4) Hem minim tu iumi mas no gohed for lukluk and tingim olketa samting wea no klin and wea Jehovah no laekem.—Col. 3:5, 6.
9. Why nao hem important for duim gud samting long narawan?
9 Paul sei: “No forget for duim gud samting and for sharem samting wea iu garem witim olketa narawan, bikos God hem hapi long kaen sakrifaes olsem.” (Heb 13:16) So olketa gud samting wea iumi duim for narawan hem olsem wanfala sakrifaes. Taem iumi duim olsem, datwan showimaot iumi olketa tru Christian.—John 13:34, 35; Col. 1:10.
SAKRIFAES SAED LONG WORSHIP
10, 11. Wanem nao tingting bilong Jehovah abaotem preaching waka and worship bilong iumi, and hao nao datwan shud affectim iumi?
10 Wanfala gud samting wea iumi savve duim hem for “talemaot long evriwan hope wea iumi garem.” Waswe, iu mekius long evri chance wea iu garem for preach? Paul sei: “Iumi mas evritaem praisem God. Diswan hem olsem wanfala sakrifaes wea iumi givim long God. Iumi iusim mouth bilong iumi for talemaot nem bilong hem long nara pipol.” (Heb. 10:23; 13:15; Hos. 14:2) Hem gud for ting raonem haomas taem nao iumi iusim for preachim gud nius and hao for duim gud datfala waka. Staka part long Service Meeting savve helpem iumi for duim datwan. Bat iumi shud tingim tu wei for duim preaching waka or enitaem witnessing “hem olsem wanfala sakrifaes wea iumi givim long God.” So iumi shud duim best long preaching waka bikos datwan hem part long worship bilong iumi. Bat hem gud for tingim, haomas taem iumi iusim for preach savve showimaot sapos iumi tinghae long olketa spiritual samting nomata living bilong iumi evriwan no semsem.
11 Iumi olketa Christian iusim staka taem for worshipim Jehovah nomata iumi stap long haos or iumi go long meeting. Hem nao wanem Jehovah laekem iumi for duim. Nomata iumi no need for keepim Sabbath or go long Jerusalem for olketa festival, iumi savve lanem gud samting from olketa law hia. Iumi garem staka samting for duim evriday, bat God laekem iumi for iusim samfala taem for studyim Bible, prea, and go long olketa meeting. Hed long famili tu garem waka for duim Famili Worship witim famili. (1 Thess. 5:17; Heb. 10:24, 25) So hem gud for tingim disfala kwestin, Waswe, mi need for duim samfala samting moa for worshipim God?
12. (a) Incense wea olketa Israelite bonem hem semsem witim wanem? (b) Long wanem wei nao iumi savve talem prea wea olsem incense?
12 King David singsing olsem long Jehovah: “Mi laekem prea bilong mi kamap olsem incense front long iu.” (Ps. 141:2) Hem gud for tingim haomas taem iumi prea and wanem iumi prea abaotem. Bible buk Revelation storyim “prea bilong olketa holy wan” hem olsem incense. Hem sei olketa prea wea Jehovah acceptim hem olsem incense wea smel naes tumas. (Rev. 5:8) Long Israel bifor, olketa mas mekem incense for bonem long altar followim hao Jehovah laekem. And Jehovah bae acceptim datfala incense sapos olketa bonem followim wei wea hem laekem. (Ex. 30:34-37; Lev. 10:1, 2) Long sem wei, Jehovah bae acceptim prea bilong iumi sapos iumi prea long wei wea hem laekem and wea showimaot respect.
GIVIM AND KASEM SAMTING
13, 14. (a) Wanem nao Epaphroditus and olketa long Philippi duim for Paul, and hao nao Paul ting long datwan? (b) Hao nao iumi savve followim example bilong olketa?
13 Selen wea iumi givim for sapotim waka raonem world hem olsem sakrifaes nomata iumi givim staka selen or lelebet nomoa. (Mark 12:41-44) Long first century C.E., kongregeson long Philippi sendem Epaphroditus long Rome for lukaftarem Paul. Epaphroditus givim Paul samfala selen wea kongregeson givim olsem present. Olketa brata and sista long Philippi helpem Paul tu-thri taem finis. Olketa sendem olketa present olsem long Paul bikos olketa no laekem hem for wari tumas abaotem selen bat for iusim moa taem for duim ministry. Hao nao Paul ting long datwan? Hem sei: “Diswan hem olsem wanfala sakrifaes wea hem smel naes tumas and wea God acceptim and hapi long hem.” (Readim Philippians 4:15-19.) Paul tinghae long kaenfala wei bilong olketa long Philippi and Jehovah hapi long datwan tu.
14 Distaem tu, Jehovah barava tinghae long contribution wea iumi givim for sapotim waka raonem world. Hem promisim tu sapos Kingdom nao hem first samting long laef bilong iumi, bae hem provaedem wanem iumi needim long spiritual and physical wei.—Matt. 6:33; Luke 6:38.
SHOWIMAOT IU TINGHAE
15. Wanem nao samfala samting wea mekem iu tinghae long Jehovah?
15 Iumi garem staka reason for tinghae long wanem Jehovah duim for iumi. Evriday iumi shud sei thankiu long Jehovah from hem nao givim iumi laef. Hem provaedem evri samting wea iumi needim mekem iumi gohed for laef olsem kaikai, kaleko, ples for stap, and air wea iumi brithim. Iumi tinghae tu long olketa tru samting wea iumi lanem from Bible wea mekem iumi garem faith and hope for future. So iumi shud worshipim Jehovah and praisem hem bikos hem wakem evri samting and duim staka gud samting for iumi.—Readim Revelation 4:11.
16. Wanem nao iumi savve duim for showimaot iumi tinghae long dae bilong Christ?
16 Long last study, iumi lanem hao dae bilong Jesus hem nambawan present wea God givim. Datfala present showimaot God barava lovem iumi. (1 John 4:10) Wanem nao iumi savve duim for showimaot iumi tinghae long datwan? Paul sei: “From Christ hem lovem iumi, iumi gohed strong nomoa, bikos iumi savve wanfala man hem dae for evriwan.” Hem sei tu: “Hem dae for evriwan and hem laef bak, mekem olketa wea laef no duim nomoa wanem olketa seleva laekem, bat for olketa mas duim wanem hem laekem.” (2 Cor. 5:14, 15) Paul sei sapos iumi barava tinghae long wanem God duim, bae iumi iusim laef bilong iumi for praisem God and for mekhae long Son bilong hem. Iumi showimaot iumi tinghae long God and Christ taem iumi obey and laek for teachim pipol for kamap disaepol.—1 Tim. 2:3, 4; 1 John 5:3.
17, 18. Wanem nao samfala duim for praisem Jehovah? Storyim example.
17 Waswe, iu savve duim samfala samting moa for praisem God? Staka brata and sista wea tinghae long wanem Jehovah duim, changem samfala samting long living mekem olketa savve duim moa samting long ministry and for duim samfala nara waka long organization bilong Jehovah. Samfala auxiliary pioneer for wan month or samfala month long each year, and olketa narawan kamap regular pioneer. Samfala joinim construction waka. Wei for duim olketa samting hia showimaot iumi tinghae long Jehovah. Sapos iumi worshipim God from iumi lovem hem and laek praisem hem, God bae acceptim wanem iumi duim for hem.
18 Staka Christian duim samting wea showimaot olketa tinghae long Jehovah. Wanfala example hem Morena wea hem wanfala Catholic bifor. Hem garem staka kwestin abaotem God and abaotem laef. Morena trae for faendem ansa long wanem Catholic church teachim and long teaching bilong olketa religion long Asia bat hem no kasem eni gudfala ansa. Gogo hem faendem ansa taem hem start for studyim Bible witim Olketa Jehovah’s Witness. Morena tinghae long wanem hem lanem bikos datwan mekem hem hapi, so hem iusim evri strong bilong hem for worshipim Jehovah. Stretawe bihaen Morena baptaes hem duim auxiliary pioneer evri month, and no longtaem bihaen hem regular pioneer. Datwan hem happen 30 year go finis and distaem Morena gohed for duim full-taem service long Bethel.
19. Long wanem wei nao iu savve duim moa samting for Jehovah?
19 Staka wea faithful for worshipim Jehovah maet no fit for duim pioneer waka. Nomata olsem, iumi evriwan savve givim sakrifaes wea Jehovah bae acceptim. Wei bilong iumi shud showimaot iumi evritaem followim olketa Bible principle and iumi olketa Witness bilong Jehovah. Iumi need for showimaot faith and trustim God bae mekem plan bilong hem for kamap tru. Iumi duim gudfala waka taem iumi preachim gud nius. Taem iumi duim olketa samting hia, datwan showimaot iumi tinghae long wanem Jehovah duim. So iumi mas gohed for worshipim Jehovah witim full heart.
[Blurb long page 25]
Waswe, iu tinghae long olketa gud samting wea Jehovah duim for iu?
[Piksa long page 23]
Waswe, iu mekius long evri chance wea iu garem for preach?