No Spoelem Gudfala Wei Bilong Kongregeson
“Mifala prea long God for Lord bilong iumi Jesus Christ hem barava kaen long iufala from gudfala wei bilong iufala.”—PHIL. 4:23.
WANEM NAO ANSA BILONG IU?
Hao nao iumi savve helpem olketa brata and sista for garem gudfala wei taem iumi kaban tugeta?
Taem iumi gohed strong long ministry, hao nao datwan helpem kongregeson?
Taem iumi talem olketa elder abaotem samwan wea duim bigfala sin, hao nao datwan protectim kongregeson?
1. Why nao kongregeson long Philippi and Thyatira kasem praise?
OLKETA Christian long Philippi long first century olketa poor. Nomata olsem, olketa showimaot love and givim samting for helpem olketa brata and sista. (Phil. 1:3-5, 9; 4:15, 16) Dastawe Paul sei long olketa: “Mifala prea long God for Lord bilong iumi Jesus Christ hem barava kaen long iufala from gudfala wei bilong iufala.” (Phil. 4:23) From olketa Christian long Thyatira tu showimaot gudfala wei, Jesus Christ sei: “Mi savve long olketa samting wea iu duim. Mi savve long love, faith, and ministry bilong iu. Iu no givap, and olketa samting wea iu duim distaem hem winim bifor.”—Rev. 2:19.
2. Hao nao wei bilong iumi each wan affectim kongregeson wea iumi attendim?
2 Distaem tu each kongregeson bilong Olketa Jehovah’s Witness garem wei bilong olketa seleva. Samfala kongregeson kaen and showimaot love. And samfala kongregeson strong for duim preaching waka and sapotim olketa wea duim full-taem ministry. Taem iumi each wan waka hard for showimaot gudfala wei, datwan helpem kongregeson for wan mind and garem gudfala wei. (1 Cor. 1:10) Bat sapos iumi no showimaot gudfala wei, datwan savve mekem samfala long kongregeson sleep long spiritual wei, no strong for preach, and maet samfala no ting hevi long wei for deal witim olketa wea duim bigfala sin. (1 Cor. 5:1; Rev. 3:15, 16) Wanem kaen wei nao kongregeson bilong iu showimaot? Wanem nao iu savve duim for helpem kongregeson garem gudfala wei?
SHOWIMAOT GUDFALA WEI
3, 4. Wanem nao iumi savve duim for praisem Jehovah long olketa meeting?
3 David singsing olsem long Jehovah: “Mi bae praisem iu long big kongregeson, midolwan plande pipol mi bae praisem iu.” (Ps. 35:18) David praisem Jehovah taem hem stap witim olketa narawan wea worshipim Jehovah. Long olketa kongregeson meeting wea iumi garem evri week, olsem Wastaoa Study, iumi savve praisem Jehovah taem iumi givim koment. Tingim olketa kwestin hia: ‘Waswe, mi traem best for koment? Waswe, mi prepare gud mekem mi savve givim gudfala koment? Olsem hed long famili, waswe, mi helpem pikinini for redyim koment bifor meeting and for givim koment long toktok bilong olketa seleva?’
4 Wei wea iumi singsing gud long olketa meeting showimaot iumi laek for mekem Jehovah hapi. David sei: “God mi bae faithful and duim stret samting, mi bae singsing and praisem iu.” (Ps. 57:7) Olketa song wea iumi singim long meeting givim iumi chance for showimaot faith bilong iumi. Sapos iumi no savve gud long samfala song, maet iumi savve practicem long taem bilong Famili Worship. Iumi tu laek followim example bilong David. Hem sei: “Long full laef bilong mi bae mi singsing for praisem Jehovah. Long full laef bilong mi, bae mi singsing for praisem God bilong mi.”—Ps. 104:33.
5, 6. Wanem nao iumi savve duim for kaen and welkamim narawan, and hao nao datwan helpem kongregeson?
5 Taem iumi kaen and welkamim olketa brata and sista, datwan helpem narawan long kongregeson tu for showimaot love. Long lastfala chapter long leta wea Paul raetem for olketa Hebrew Christian, hem sei: “Gohed for lovem narawan, olsem man lovem brata bilong hem. No forget for kaen long pipol and welkamim olketa.” (Heb. 13:1, 2) Nambawan wei for showimaot iumi kaen and welkamim narawan hem for invaetem circuit overseer and waef, or olketa wea duim full-taem service for kaikai long haos. Samfala taem maet iumi invaetem olketa widow, famili wea no garem dadi or mami, or narawan for kam kaikai witim iumi or duim Famili Worship.
6 Paul talem Timothy for encouragem narawan “for duim plande gudfala samting and willing for givim samting and for sharem wanem olketa garem witim nara pipol. Sapos olketa duim datwan, olketa hipimap richfala samting for olketa seleva wea bae no lus, wea hem nao gudfala faondeson for future bilong olketa, mekem olketa savve hol strong long datfala tru laef.” (1 Tim. 6:17-19) Paul encouragem olketa brata and sista for willing for givim samting. Nomata iumi stap long taem wea hem no isi for kasem selen, iumi savve givim samting. Olsem example, sapos iu garem trak maet iu savve tekem narawan taem iu go preach or long olketa meeting. Wanem nao olketa brata and sista wea kasem help savve duim for showimaot olketa tinghae long datwan? Maet olketa savve givim lelebet selen for peim petrol. Wei for duim olsem savve helpem evriwan long kongregeson for gohed garem gudfala wei. Nara wei for showimaot iumi tinghae long olketa brata and sista hem for kaban witim olketa. Taem iumi duim gud samting long “olketa wea garem sem biliv” and iumi willing for iusim taem and olketa samting wea iumi garem for helpem olketa, iumi bae lovem olketa and datwan helpem narawan long kongregeson tu for showimaot gudfala wei.—Gal. 6:10.
7. Hao nao wei for no storyim samting wea iumi no fit for storyim savve helpem kongregeson for garem gudfala wei?
7 Wei for fren gud witim olketa brata and sista and no storyim samting wea iumi no fit for storyim, savve strongim love wea iumi garem for each other. (Readim Proverbs 18:24.) Sapos fren bilong iu storyim samting wea hem no laekem narawan for savve abaotem, iumi showimaot iumi trufala fren taem iumi no storyim datwan long narawan. Taem wanfala brata or sista talem tingting and feeling bilong hem for iumi and hem savve iumi bae no talem narawan, datwan strongim love wea iumi garem for each other. So iumi mas no storyim samting wea iumi no fit for storyim mekem narawan savve trustim iumi. Datwan bae helpem evriwan long kongregeson for garem gudfala wei.—Prov. 20:19.
GOHED STRONG FOR DUIM MINISTRY
8. Wanem kaonsel nao Jesus talem for olketa Christian long Laodicea, and why nao olsem?
8 Jesus sei long kongregeson long Laodicea: “Mi savve long olketa samting wea iu duim. Iu no cold and iu no hot tu. Mi laekem tumas for iu mas cold or for iu hot. Bat bikos iu no cold and iu no hot tu, bae mi toroaotem iu from mouth bilong mi.” (Rev. 3:15, 16) Olketa Christian long Laodicea no strong for duim preaching waka. Maet datwan affectim tu hao olketa ting long each other long kongregeson. So Jesus talem olketa: ‘‘Mi helpem olketa wea mi lovem for luksavve long samting olketa duim wea no stret, and mi stretem olketa. So iu mas repent and showimaot iu strong for worshipim God.”—Rev. 3:19.
9. Why nao wei for gohed strong for duim ministry savve helpem kongregeson?
9 Sapos iumi strong for preach datwan bae helpem kongregeson for garem gudfala wei. Wanfala main waka bilong kongregeson hem for faendem pipol long territory wea interest and for teachim olketa tru samting long Bible. So iumi mas followim example bilong Jesus and helpem pipol kamap disaepol. (Matt. 28:19, 20; Luke 4:43) Taem iumi gohed strong for duim ministry, bae iumi wan mind for “waka tugeta witim God.” (1 Cor. 3:9) Taem iumi waka witim narawan long ministry and lukim olketa storyim biliv bilong olketa and showimaot love for Jehovah and for truth, datwan mekem iumi for lovem and respectim olketa. Nara samting tu, taem iumi “waka tugeta” long ministry datwan mekem kongregeson garem wan mind.—Readim Zephaniah 3:9.
10. Wei wea iumi traem best for duim gud ministry helpem narawan long kongregeson long wanem wei?
10 Olketa narawan long kongregeson savve kasem gud samting sapos iumi traem best for duim gud ministry. Sapos iumi interest long pipol long territory and trae hard for teach long wei wea kasem heart, datwan bae strongim iumi for duim ministry. (Matt. 9:36, 37) Sapos iumi strong for duim ministry datwan bae helpem narawan tu for duim sem samting. Jesus no sendem olketa disaepol for preach seleva bat hem markem tufala man for waka tugeta. (Luke 10:1) Datwan encouragem and trainim olketa disaepol and tu hem strongim olketa for duim ministry. Iumi hapi for preach witim olketa strongfala pablisa! Wei wea olketa strong for duim preaching waka encouragem and helpem iumi tu for gohed duim sem samting.—Rom. 1:12.
NO KOMPLEN OR HAEDEM BIGFALA SIN
11. Wanem nao wei bilong samfala Israelite long taem bilong Moses, and datwan mekem olketa for duim wanem?
11 Tu-thri week bihaen olketa Israelite kamaot from Egypt, olketa start for komplen. Datwan mekem olketa againstim Jehovah and tufala wakaman bilong hem, Moses and Aaron. (Ex. 16:1, 2) Tu-thri Israelite wea kamaot from Egypt nomoa go insaed Promis Land. Nomata Moses tu no go insaed long Promis Land bikos long samting wea hem duim taem olketa Israelite showimaot nogud wei. (Deut. 32:48-52) Long distaem, wanem nao iumi mas duim mekem iumi no garem nogud wei?
12. Wanem nao savve helpem iumi for no garem wei for komplen?
12 Iumi mas careful for no garem wei for komplen. Wei for hambol and respectim olketa wea garem paoa bae helpem iumi no komplen. Nara samting wea savve helpem iumi, hem for chusim gud hu nao iumi kaban witim. Sapos iumi chusim nogud hapitaem or evritaem kaban witim olketa long waka or long skul wea no worshipim Jehovah bae iumi kasem nogud samting. Iumi shud no kaban witim pipol wea evritaem komplen or wea laek followim nomoa tingting bilong olketa seleva.—Prov. 13:20.
13. Wei for komplen savve leadim man for duim olketa wanem nara nogud samting wea savve spoelem kongregeson?
13 Wei for komplen savve leadim man for duim samfala nara nogud samting wea savve spoelem kongregeson. Olsem example, wei for komplen savve spoelem peace and wan mind bilong kongregeson. Wei for komplenim olketa brata and sista savve mekem olketa feel nogud, and man wea komplen maet laea for spoelem narawan or tok spoelem narawan tu. (Lev. 19:16; 1 Cor. 5:11) Samfala long kongregeson long first century wea komplen “olketa luk daonem olketa wea garem paoa, and tok spoelem olketa wea kasem glory from God.” (Jude 8, 16) God no hapi long olketa wea komplenim olketa wea lead insaed long kongregeson.
14, 15. (a) Wanem nao savve happen sapos samwan long kongregeson gohed duim bigfala sin? (b) Wanem nao iumi shud duim sapos iumi savve samwan haedem bigfala sin?
14 Wanem nao bae iu duim sapos iu savve long samwan wea haedem bigfala sin, olsem wei for drinkim tumas alcohol, lukluk long olketa rabis piksa, or durong? (Eph. 5:11, 12) Sapos iumi no duim eni samting, Jehovah savve aotem holy spirit from kongregeson and datwan savve mekem kongregeson no garem peace. (Gal. 5:19-23) Paul talem olketa Christian long Corinth for “aotem old yeast.” Long distaem tu, for protectim gudfala wei bilong kongregeson iumi mas no letem eni rabis samting gohed long kongregeson. Wanem nao iu savve duim for mekem kongregeson gohed garem peace?
15 Olsem iumi lanem finis, hem important for no storyim samting wea iumi no fit for storyim, especially taem samwan talem iumi feeling and tingting bilong hem. Hem no stret for storyim samting wea iumi no fit for storyim abaotem narawan bikos datwan hem no wei bilong love! Nomata olsem, sapos samwan duim bigfala sin, olketa elder long kongregeson need for savve long datwan. Jehovah givim waka long olketa elder for deal witim datwan. (Readim Leviticus 5:1.) So sapos iumi savve wanfala brata or sista duim bigfala sin, iumi shud talem hem for story witim olketa elder mekem olketa helpem hem. (Jas. 5:13-15) Bat sapos hem no kwiktaem story long olketa elder, iumi nao shud duim datwan.
16. Taem iumi talem olketa elder abaotem samwan wea duim bigfala sin, hao nao datwan protectim kongregeson?
16 Kongregeson shud olsem wanfala sef ples. Iumi mas help for protectim kongregeson long wei for talem olketa elder abaotem samwan wea duim bigfala sin. Sapos olketa elder helpem man wea duim sin for luksavve long nogud samting wea hem duim and hem repent and acceptim discipline, hem savve gohed stap long kongregeson. Bat waswe sapos hem no repent and no acceptim wei wea olketa elder trae for helpem hem? Sapos olsem, bae hem disfellowship mekem hem no gohed spoelem kongregeson. Datwan protectim gudfala wei bilong kongregeson. (Readim 1 Corinthians 5:5.) Iumi shud talem olketa elder sapos iumi savve samwan duim bigfala sin. Iumi shud followim tu wanem olketa elder disaedem. Taem iumi duim datwan, hem showimaot iumi tingim olketa brata and sista and iumi laek protectim kongregeson.
KEEPIM “WAN MIND” LONG KONGREGESON
17, 18. Wanem nao iumi savve duim for keepim wan mind long kongregeson?
17 Olketa Christian long first century “gohed lane from olketa aposol,” and datwan helpem kongregeson for wan mind. (Acts 2:42) Olketa tinghae long kaonsel wea olketa elder givim wea kam from Bible. Long distaem tu, olketa elder followim wanem wakaman wea faithful and wise talem and diswan helpem kongregeson for wan mind. (1 Cor. 1:10) Taem iumi obeyim wanem organization bilong Jehovah teachim from Bible and followim wanem olketa elder talem, datwan showimaot iumi laek ‘stap gud tugeta and traem best for keepim wei for wan mind wea holy spirit helpem iumi for garem.’—Eph. 4:3.
18 Iumi evriwan shud helpem kongregeson for garem gudfala wei. Sapos iumi duim olsem, ‘Lord bilong iumi Jesus Christ bae barava kaen long iumi from gudfala wei bilong iumi.’—Phil. 4:23.
[Piksa long page 19]
Waswe, iu prepare gud mekem iu savve givim koment wea encouragem narawan?
[Piksa long page 20]
Taem iumi lanem gud olketa song datwan savve encouragem narawan