Long Wanem Wei Nao Jesus and Dadi Bilong Hem Wan?

Jesus sei olsem: “Mitufala Dadi blong mi, mitufala wanfala nomoa.” (John 10:30 Holi Baebol) Samfala sei disfala scripture pruvim hao Jesus and Dadi bilong hem tufala part long wanfala trinity. Waswe, hem nao wanem Jesus minim?

Hem gud for iumi lukluk long olketa verse wea stap raonem. Long verse 25, hem sei hem duim olketa waka long nem bilong Dadi bilong hem. Long verse 27 go kasem 29, Jesus storyim tokpiksa sheepsheep wea Dadi bilong hem givim long hem. Tufala samting hia wea Jesus talem no garem mining sapos Jesus and Dadi bilong hem tufala sem man. Bat samting wea Jesus minim nao hem olsem: ‘Mitufala Dadi wan mind, mekem no eniwan savve tekem olketa sheepsheep from mi olsem no eniwan savve tekem olketa from Dadi bilong mi.’ Hem olsem wanfala son talem enemy bilong dadi bilong hem, ‘Sapos iu attakim dadi bilong mi, hem olsem iu attakim mi nao.’ No eniwan bae tingse disfala son and dadi bilong hem tufala sem man. Bat evriwan bae luksavve tufala barava wan mind.

Jesus and Dadi bilong hem, Jehovah God, tufala “wan” long olketa plan, standard, and wei. Jesus barava difren from Satan and Adam and Eve, wea laek for followim tingting bilong olketa seleva. Jesus sei: “Son no savve duim eni samting followim tingting bilong hemseleva. Hem duim nomoa samting wea hem lukim Dadi hem duim. Eni samting wea Dadi duim, Son hem duim tu.”​—⁠John 5:​19; 14:10; 17:⁠8.

Bat wei wea tufala wan mind no mekem God and Jesus barava semsem. Tufala hia tufala difren man. Tufala garem tingting and feeling bilong tufala seleva, and samting wea happen long tufala hem difren, and tufala evriwan free for disaedem samting seleva. Nomata olsem, Jesus chus for followim samting wea Dadi bilong hem laekem. Long Luke 22:42 Jesus talem olsem: “No duim samting wea mi laekem, duim nomoa samting wea iu nao laekem.” Disfala toktok pruvim Jesus savve disaedem samting wea difren from Dadi bilong hem. Sapos Jesus and Dadi bilong hem wanfala man, why nao Jesus prea long God and hambol for sei hem no savve long samfala samting wea Dadi nomoa savve?​—⁠Matthew 24:⁠36.

Plande pipol bilong religion sei olketa worshipim olketa god wea faet and raoa witim olketa famili member bilong olketa seleva. Long olketa kastom story bilong olketa Greek, Cronus wea hem god bilong agriculture winim dadi bilong hem, Uranus, and kaikaim pikinini bilong hemseleva. Diswan hem barava difren from Jehovah God and Son bilong hem Jesus wea garem wan mind, bikos tufala garem trufala love! Datwan nao mekem iumi barava lovem tufala! Tru nao, iumi garem nambawan blessing for wan mind witim tufala wea barava hae winim eni narawan long universe. Jesus prea olsem abaotem olketa wea followim hem: “Mi prea fo olketa mas kamap wan nomoa olsem yu Dadi yu stap wetem mi an mi stap wetem yu. Olketa mas stap tugeta wetem yumitufala.”​—⁠John 17:​20, 21 Holi Baebol.

Dastawe, taem Jesus sei “Mitufala Dadi blong mi, mitufala wanfala nomoa,” hem no storyim wanfala Trinity wea hard for minim, bat hem showimaot nambawan wei wea tufala wan mind, and barava fren gud tugeta.