Waswe, Bae Iu Kasem Gud Samting From Forgiveness Bilong Jehovah?

1, 2. (a) Nomata nation bilong Israel no obey, Jehovah showimaot hem wanem kaen God? (b) Wanem kwestin nao bae iumi ansarem long disfala study?

LONG wanfala prea wea samfala Levite talem long taem bilong Nehemiah, olketa sei staka taem nation bilong Israel “no laek obeyim” olketa law bilong Jehovah. Nomata olsem, Jehovah forgivim olketa Israelite staka taem, and hem gohed for kaen long olketa long taem bilong Nehemiah. Hem “God wea willing for forgive, kaen and showimaot mercy, no kros kwiktaem and hem garem bigfala love.”—Neh. 9:16, 17.

² Hem gud for iumi wanwan ting raonem disfala kwestin: ‘Waswe, bae mi kasem gud samting from forgiveness bilong God?’ For helpem iumi ansarem datfala kwestin, iumi bae story abaotem wei wea God forgivim King David and King Manasseh, and gud samting wea tufala kasem from Jehovah hem willing for forgive.

OLKETA BIGFALA SIN WEA DAVID DUIM

3-5. Wanem bigfala sin nao David hem duim?

³ Nomata David laek obeyim God, hem duim samfala big sin. Tufala sin wea hem duim affectim wanfala hasband and waef, Uriah and Bath-sheba. David, Uriah, and Bath-sheba kasem nogud samting from olketa sin hia. Nomata olsem, iumi lanem staka samting abaotem forgiveness bilong Jehovah from wei wea hem deal witim David. Bae iumi storyim samting wea happen.

⁴ David sendem army bilong Israel for tekovarem Rabbah, wea hem kapitol taon bilong Ammon. Datfala taon hem stap samting olsem 80 kilometer east long Jerusalem, long narasaed long Jordan River. Bihaen army go finis, David hem antap long ruf long haos bilong hem long Jerusalem, and hem lukluk long Bath-sheba taem hem swim. Hasband bilong Bath-sheba hem no stap bikos hem insaed long datfala army. David laekem tumas Bath-sheba, so hem talem samfala man for go tekem kam Bath-sheba long haos bilong hem, and hem duim adultery witim hem.—2 Sam. 11:1-4.

⁵ Taem Bath-sheba talem David hem babule, David talem komanda bilong army for sendem Uriah kam bak long Jerusalem. David gohed talem Uriah for go bak long haos bilong hem, bikos hem laekem Uriah for sleep witim waef bilong hem mekem Uriah tingse datwan hem pikinini bilong hem. Bat Uriah no willing for go bak long haos bilong hem. So David raetem leta long komanda bilong army and talem hem for putim Uriah long front laen bilong datfala faet, and for olketa nara soldia lusim hem long there. Kwiktaem nomoa enemy killim dae Uriah, wea hem nao plan bilong David. (2 Sam. 11:12-17) King David duim barava nogud samting. Hem duim adultery witim Bath-sheba, and tu, hem killim dae hasband bilong hem wea no duim eni rong samting.

DAVID HEM CHANGE

6. Wanem nao God duim bihaen David sin, and wanem nao datwan showimaot abaotem Jehovah?

⁶ From Jehovah lukim evri samting, hem savve wanem David hem duim. (Prov. 15:3) Nomata King David maritim Bath-sheba bihaen Uriah hem dae, “samting wea David duim hem nogud long Jehovah.” (2 Sam. 11:27) So wanem nao God duim? Hem sendem profet bilong hem Nathan for go story witim David. From Jehovah hem God wea willing for forgive, hem laek showimaot mercy long David. Bat hem laek faendaot firstaem sapos David hem barava repent. Waswe, iu tinghae long disfala samting wea Jehovah duim? Hem no forcem David for talemaot sin bilong hem, bat hem laekem Nathan for talem wanfala story long David mekem David luksavve samting wea hem duim hem barava nogud. (Readim 2 Samuel 12:1-4.) Datwan hem barava gudfala wei for Jehovah luksavve long tingting and feeling bilong David!

7. David feel hao taem hem herem story bilong Nathan?

⁷ Long tingting bilong David, samting wea datfala rich man hem duim long story wea Nathan talem hem barava no stret. David hem kros long datfala rich man, and hem sei long Nathan: “Man wea duim diswan hem fit for dae!” David sei tu man wea lusim sheepsheep bilong hem shud kasem compensation. Bat then Nathan sei long David: “Iu nao datfala rich man!” David hem seke fogud taem hem herem datwan. Bikos long wanem David duim, Nathan sei David bae kasem nogud samting and samfala long famili bilong hem bae dae long raf wei. Hem bae kasem bigfala shame tu and evriwan bae savve long datwan. Samting wea Nathan talem mekem David luksavve wanem hem duim hem barava nogud. David hem barava sorre and hem sei: “Mi sin againstim Jehovah.”—2 Sam. 12:5-14.

DAVID PREA AND GOD FORGIVIM HEM

8, 9. (a) Hao nao Psalm 51 showimaot feeling bilong David abaotem sin bilong hem? (b) Wanem nao iumi lanem abaotem Jehovah from Psalm 51?

⁸ Bihaen datwan King David raetem Psalm 51. Datfala psalm showimaot David sorre tumas long wanem hem duim. David askem Jehovah for forgivim hem. Hem no just talemaot rong bilong hem nomoa bat hem barava repent. Samting wea barava important long David nao hem wei wea hem fren witim Jehovah. Hem sei long God: “Mi barava sin againstim iu.” Then hem sei: “Plis God, mekem heart bilong mi klin, and mekem mi garem niufala tingting wea savve mekem mi stand strong. . . . Mekem mi hapi moa olsem long datfala taem wea iu sevem mi, and mekem mi willing for obeyim iu.” (Ps. 51:1-4, 7-12) Taem iu prea long Jehovah abaotem olketa mistek bilong iu, waswe, iu prea from heart and honest olsem David?

⁹ Jehovah no stopem olketa nogud samting for kasem David wea kamaot from sin wea hem duim. Hem kasem olketa problem go kasem taem hem dae. Bat from “heart bilong [David] brek and pisis,” wea minim hem repent, Jehovah forgivim hem. (Readim Psalm 32:5; Ps. 51:17) Olmaeti God luksavve long olketa reason and feeling wea leadim man for duim sin. Dastawe God no letem olketa judge long Israel for panisim David and Bath-sheba followim Law bilong Moses wea sei tufala mas dae. (Lev. 20:10) Bat God seleva nao judgem David and Bath-sheba and hem showimaot mercy long tufala. Gogo, son bilong tufala Solomon hem kamap king bilong Israel.—1 Chron. 22:9, 10.

10. (a) Wanem nao maet narafala reason why Jehovah forgivim David? (b) Wanem nao man mas duim for Jehovah forgivim hem?

¹⁰ Maet narafala reason why Jehovah forgivim David hem bikos David showimaot mercy long Saul. (1 Sam. 24:4-7) Samting wea Jesus talem showimaot Jehovah bae deal witim iumi long sem wei wea iumi deal witim nara pipol. Hem sei: “Iufala mas no judgem narawan mekem God no judgem iufala. Mi talem diswan bikos God bae judgem iufala followim hao iufala judgem narawan, and samting wea iufala duim long narawan, sem samting nao bae olketa duim long iufala.” (Matt. 7:1, 2) Hem gud tumas for savve Jehovah bae forgivim olketa sin bilong iumi, nomata kaen bigfala sin olsem wei for duim adultery or for killim man dae! Bat sapos iumi laekem Jehovah for forgivim iumi, iumi mas willing for forgivim olketa narawan, iumi mas talemaot olketa sin bilong iumi long God, and iumi mas changem tingting bilong iumi mekem iumi garem sem tingting olsem Jehovah abaotem sin wea iumi duim. Taem olketa wea duim sin showimaot olketa repent, Jehovah hem ‘strongim olketa.’—Readim Acts 3:19.

MANASSEH DUIM BIGFALA SIN BAT HEM REPENT BIHAEN

11. Olketa wanem nogud samting nao Manasseh duim?

¹¹ Bible storyim nara example wea showimaot Jehovah hem willing for forgivim man wea duim olketa bigfala sin. Samting olsem 360 year bihaen David start for rul, Manasseh hem kamap king bilong Judah and hem rul for 55 year. Jehovah barava no hapi long hem bikos long olketa nogud samting wea hem duim. Olsem example, Manasseh wakem olketa altar for worshipim Baal, hem worshipim sun, moon, and olketa star, hem bonem olketa son bilong hem long fire, and encouragem pipol for duim spiritism. “Hem duim staka samting wea nogud long eye bilong Jehovah.”—2 Chron. 33:1-6.

12. Wanem nao Manasseh duim for kam bak long Jehovah?

¹² Gogo, olketa kasholem Manasseh and putim hem long prison long Babylon. Taem hem long prison, maet hem tingim disfala toktok wea Moses talem long Israel: “Taem evri samting hia kasem iu and iu no wei nao, bae iu kam bak long God bilong iu Jehovah and herem toktok bilong hem.” (Deut. 4:30) Manasseh hem kam bak long Jehovah. Hao nao hem duim datwan? Hem “hambol” and “gohed prea” long God, olsem piksa long page 21 showim. (2 Chron. 33:12, 13) Bible no storyim wanem nao Manasseh talem long olketa prea bilong hem, bat maet hem talem semkaen toktok olsem King David talem long Psalm 51. Nomata Bible no talem toktok bilong hem, iumi savve Manasseh hem barava change.

13. Why nao Jehovah forgivim Manasseh?

¹³ Wanem nao Jehovah duim taem Manasseh prea long hem? Jehovah “herem prea bilong hem.” Olsem David, Manasseh luksavve hem duim olketa bigfala sin, and hem barava repent. Dastawe God forgivim Manasseh and letem hem kamap king moa long Jerusalem. From datwan, “Manasseh barava savve Jehovah nao hem trufala God.” (2 Chron. 33:13) Example bilong Manasseh tu helpem iumi for luksavve Jehovah forgivim and showimaot mercy long olketa wea repent, and datwan hem comfortim iumi!

WASWE, JEHOVAH EVRITAEM FORGIVE?

14. Man wea duim sin mas duim wanem samting for Jehovah forgivim hem?

¹⁴ Klosap evriwan wea worshipim God distaem bae no duim bigfala sin olsem David and Manasseh duim. Nomata olsem, example bilong tufala showimaot God hem willing for forgivim man wea duim olketa bigfala sin sapos hem repent.

15. Hao nao iumi savve Jehovah no evritaem forgivim olketa man wea duim sin?

¹⁵ Iumi shud no tingse Jehovah hem evritaem forgivim olketa man wea duim sin. Pipol bilong Israel and Judah wea no obey barava difren from David and Manasseh. Taem David duim sin, God givim chance long David for repent taem hem sendem Nathan for go story long hem. David tinghae long datwan and hem repent. Taem Manasseh stap long prison and hem no wei nao, hem luksavve hem mas repent from olketa sin bilong hem. Bat olketa bilong Israel and Judah no olsem. Plande taem olketa no repent from sin bilong olketa, nomata God sendem staka profet for talemaot tingting bilong hem long olketa abaotem nogud samting wea olketa duim. Dastawe Jehovah no forgivim olketa. (Readim Nehemiah 9:30.) Bihaen olketa Israelite lusim Babylon and go bak long Judah tu Jehovah gohed sendem samfala, olsem datfala priest Ezra and profet Malachi, for talemaot toktok bilong hem. Taem olketa Israelite duim samting wea Jehovah laekem, olketa barava hapi.—Neh. 12:43-47.

16. (a) Wanem nao happen long nation bilong Israel wea no repent? (b) Wanem chance nao Jehovah givim long olketa man wanwan wea kam from datfala nation bilong Israel?

¹⁶ Distaem Jehovah no acceptim olketa animal sakrifaes wea olketa Israelite mas givim bifor. Datwan hem change taem hem sendem Jesus long earth for givim laef bilong hem olsem wanfala perfect sakrifaes for evri man. (1 John 4:9, 10) Taem Jesus stap long earth, hem talemaot tingting bilong Dadi bilong hem abaotem Jerusalem taem hem sei: “Jerusalem, Jerusalem, wea iu nao killim dae olketa profet and sutim dae long ston olketa wea God sendem kam long iu! Plande taem nao mi laek for hipimap olketa pikinini bilong iu olsem wanfala mami kokorako hem hipimap olketa baby bilong hem andanit long wing bilong hem! Bat iufala nating laekem datwan.” So Jesus sei long olketa: “Iufala garem temple bilong iufala, bat iu savve, God lusim hem finis.” (Matt. 23:37, 38) God changem datfala nation bilong Israel wea sin and no repent witim “Israel bilong God,” wea hem spiritual Israel. (Gal. 6:16; Matt. 21:43) Bat waswe, olketa man wanwan wea kam from datfala nation bilong Israel savve kasem forgiveness for sin wea olketa duim? Yes, Jehovah hem willing for showimaot mercy and forgivim olketa sapos olketa garem faith long God and long sakrifaes bilong Jesus Christ. Pipol wea dae finis and no repent bae garem chance tu for kasem gud samting from forgiveness bilong Jehovah taem olketa laef bak long earth.—John 5:28, 29; Acts 24:15.

KASEM GUD SAMTING FROM FORGIVENESS BILONG JEHOVAH

17, 18. Wanem nao iumi mas duim for kasem forgiveness from Jehovah?

¹⁷ From Jehovah hem willing for forgivim iumi, wanem nao iumi shud duim? Iumi shud followim example bilong David and Manasseh wea repent. Iumi shud luksavve iumi sin, repent from olketa sin wea iumi duim, askem Jehovah for forgivim iumi, and askem hem for helpem iumi for no laekem nogud samting. (Ps. 51:10) Sapos iumi duim bigfala sin, iumi shud storyim datwan long olketa elder tu mekem olketa savve helpem iumi. (Jas. 5:14, 15) Nomata wanem kaen sin nao iumi duim, iumi kasem comfort taem iumi tingim wanem Jehovah talem abaotem hemseleva taem hem story long Moses. Jehovah sei hem “God wea showimaot mercy and kaen tumas, hem no savve kros kwiktaem and hem garem bigfala love and hem evritaem duim samting wea hem talem, hem showimaot love long staka thousand genereson, and hem forgivim man wea duim mistek and rong and sin.” Jehovah hem semsem distaem.—Ex. 34:6, 7.

¹⁸ Jehovah promis for forgivim olketa Israelite wea repent. Hem sei sin bilong olketa hem olsem wanfala markmark wea red, bat bae hem mekem olketa klin olsem “snow” wea white. (Readim Isaiah 1:18.) So wanem gud samting nao iumi savve kasem from wei wea Jehovah hem willing for forgive? Jehovah bae forgivim evri sin bilong iumi sapos iumi tinghae long forgiveness bilong hem and iumi repent.

19. Wanem nao bae iumi story abaotem long next study?

¹⁹ Hao nao iumi savve followim example bilong Jehovah wea willing for forgivim narawan? Wanem nao savve helpem iumi for forgivim olketa wea duim bigfala sin and repent? Next study bae helpem iumi for lukluk gud long iumiseleva mekem iumi savve followim example bilong Dadi bilong iumi, Jehovah, wea hem “gud and willing for forgive.”—Ps. 86:5.