Wei for Konfes wea Lead Go Long Healing
“TAEM mi stap kwaet olketa bon bilong mi feel taed from mi komplen full day. Bikos day and naet hand bilong iu hevi antap long mi. Wata long laef bilong mi hem kamap drae olsem hot bilong hot season.” (Psalm 32:3, 4) Toktok hia maet showimaot deep pain long feeling bilong King David bilong Israel bifor, pain wea hem mekem long hemseleva taem hem haedem and no konfesim wanfala serious sin.
David hem garem savve long planti samting. Hem wanfala strong man for faet, savveman long politik, raetem poetry, and pleim music. Nomata olsem, hem depend, no long savve bilong hemseleva, bat long God bilong hem. (1 Samuel 17:45, 46) Bible sei hem man wea heart bilong hem “stap evribit witim Jehovah.” (1 Kings 11:4) Bat wanfala sin wea hem duim hem barava rong, and maet datwan nao hem tok abaotem long Psalm 32. Iumi savve lanem planti samting taem iumi lukluk gud long wanem nao happen wea lead go long sin bilong hem. Iumi bae luksavve long olketa trap for missim and tu lukim need for konfesim sin bilong iumi mekem iumi fren bak witim God.
Wanfala Loyal King Foldaon Long Sin
Nation bilong Israel hem faetem olketa Ammonite, bat David hem stap long Jerusalem. Wan evening taem David wakabaot antap ruf long haos bilong hem, hem lukim wanfala woman wea luk naes tumas hem swim long wanfala haos klosap. Hem no bossim hemseleva bat hem start for garem strong feeling for wantem woman hia. Taem hem savve woman hia hem Bath-sheba, waef bilong Uriah, wanfala soldia long army bilong hem, David kolem hem, and duim adultery witim hem. Gogo Bath-sheba talem David hem babule.—2 Samuel 11:1-5.
David insaed trap nao. Sapos sin bilong tufala showaot, tufala bae kasem panis for dae. (Leviticus 20:10) So hem wakem plan. Hem kolem hasband bilong Bath-sheba, Uriah, for kam bak from war. Bihaen David kwestinim hem long staka samting abaotem war, David talem Uriah for go bak long hom. David hope diswan bae mekem hem luk olsem Uriah nao dadi bilong pikinini bilong Bath-sheba.—2 Samuel 11:6-9.
Long wei wea mekem David feel nogud, Uriah nating visitim waef bilong hem. Uriah sei hem no stret for go bak long hom taem army faet yet long war. Taem wanfala Israelite army insaed long war, olketa man stap klia long sex, nomata witim waef bilong olketa seleva. Olketa mas stap klin followim law. (1 Samuel 21:5) Then David invaetem Uriah for kam kaikai and mekem hem drunk, bat nomata olsem, hem no go bak long hom long waef bilong hem. Faithful fasin bilong Uriah hem judgem barava nogud sin bilong David.—2 Samuel 11:10-13.
Sin bilong David barava trapim hem. From hem no wei nao, hem tingim wanfala ansa nomoa. Hem sendem Uriah go bak long war witim wanfala note for bigman long army, Joab. Goal bilong datfala short note hem klia: “Putim Uriah long front laen, and iufala man mas ranawe from hem, and olketa mas attakim hem and dae.” From datfala note nomoa, luk olsem strong king hia haedem samting wea hem duim and markem Uriah for dae.—2 Samuel 11:14-17.
Bihaen taem wea Bath-sheba sorre finis long hasband bilong hem, David maritim hem. Gogo pikinini bilong tufala hem born. Taem evri samting hia go ahed, David no konfesim olketa sin bilong hem. Maet hem trae for faendem excuse for olketa samting wea hem duim. Waswe, Uriah no dae long gudfala wei long war olsem olketa nara man? And, waswe, hem nao no obeyim king taem hem les for go long waef bilong hem? ‘Heart wea savve giaman’ bae iusim enikaen reason olsem excuse for sin.—Jeremiah 17:9; 2 Samuel 11:25.
Olketa Rong Step wea Lead Go Long Sin
Hao nao David, wea lovem raeteous fasin, lusim klin fasin and duim adultery and killim man dae? Luk olsem olketa seed bilong sin bin grow insaed planti year. Maet iumi tingting why nao David no stap witim olketa man bilong hem, saportim olketa long war againstim olketa enemy bilong Jehovah. Bat, David relax nomoa long haos, farawe from eni wari abaotem war wea fit for aotem rong feeling for wantem waef bilong wanfala faithful soldia. Distaem, hem wanfala protection for olketa tru Christian for busy long spiritual samting witim kongregeson bilong olketa and for share evritaem long preaching waka.—1 Timothy 6:12.
King bilong Israel kasem instruction for mekem wanfala copy bilong Law and readim evriday. Bible givim reason for diswan: “For mekem hem lane for fraet long God bilong hem Jehovah, for keepim evri toktok bilong disfala law and olketa rul hia long wei for followim; so heart bilong hem no apim hemseleva winim olketa brata bilong hem and mekem hem no go difren from datfala komandment long raet or long left.” (Deuteronomy 17:18-20) Luk olsem maet David no followim datfala instruction long taem wea hem duim olketa barava nogud sin hia. Wei for studyim and ting raonem Word bilong God evritaem bae barava help for protectim iumi for no duim sin long olketa hard taem distaem.—Proverbs 2:10-12.
And tu, last wan long Tenfala Komandment talem stret: “Iu mas no wantem waef bilong neiba.” (Exodus 20:17) Long datfala taem David garem planti waef and concubine. (2 Samuel 3:2-5) Bat datwan no protectim hem for no laekem nara woman wea luk naes. Disfala story mekem iumi tingim hao serious nao toktok bilong Jesus: “Evriwan wea go ahed for lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:28) Winim wei for keepim olketa nogud feeling, letem iumi kwiktaem aotem olketa from mind and heart.
Wei for Repent and Mercy
Trufala story long Bible abaotem sin bilong David hem no stap for satisfaem interest bilong samwan saed long sex. Datfala story hem givim iumi chance for lukim wanfala strongfala wei wea Jehovah showimaot wanfala main fasin bilong hem—mercy.—Exodus 34:6, 7.
Bihaen Bath-sheba bornem wanfala son, Jehovah sendem profet Nathan for tok long David. Diswan showimaot mercy. Sapos no eniwan go long David and hem stap kwaet, luk olsem hem bae kamap hard long gogo bilong sin. (Hebrews 3:13) Bat iumi hapi, from David acceptim mercy bilong God. Kleva bat klia toktok bilong Nathan sutim conscience bilong David, and hem talem long hambol wei hao hem sin againstim God. Tru nao, David hem raetem Psalm 51, wea storyim sin bilong hem witim Bath-sheba, bihaen hem repent and konfesim nogud sin bilong hem. Iumi mas nating letem heart for kamap hard sapos iumi duim wanfala serious sin.—2 Samuel 12:1-13.
David kasem forgiveness, bat hem no missim discipline or samting wea kamaot from sin bilong hem. (Proverbs 6:27) Hao nao bae hem no kasem discipline? Sapos God ting smol nomoa long evri samting, pipol bae lusim olketa standard bilong hem. Bae hem olsem Hae Priest Eli nao, wea hotem lelebet olketa wicked son bilong hem and then letem olketa go ahed duim nogud samting. (1 Samuel 2:22-25) Bat, Jehovah no stopem loving-kaeness from man wea repent. Mercy bilong hem, wea olsem fresh cold wata, bae helpem man wea sin for deal witim samting wea kamaot from sin. Forgiveness from God and wei for kaban witim olketa nara Christian wea buildimap hem bae helpem man for gud bak long spiritual wei. Yes, long faondeson bilong ransom bilong Christ, man wea repent savve kasem “nambawan kaeness bilong [God] wea man no fit for kasem.”—Ephesians 1:7.
“Wanfala Klinfala Heart” and “Wanfala Niufala Spirit”
Bihaen David hem konfes, hem no feel olsem hem iusles. Toktok bilong hem long olketa psalm wea hem raetem abaot wei for konfes showimaot wei wea hem feel gud and disaed strong for servem God long faithful wei. Olsem example, lukim Psalm 32. Long verse 1, iumi read: “Hapi nao man wea kasem forgiveness for bighed fasin bilong hem, wea sin bilong hem finis nao.” Nomata hao serious nao sin hia, hapi samting savve kamaot sapos man hem repent long honest wei. Wanfala wei for showimaot hem honest hem taem man acceptim full responsibility for samting wea hem duim, olsem David. (2 Samuel 12:13) Hem no trae for mekem excuse for hemseleva front long Jehovah or trae for pushim blame long nara man. Verse 5 hem sei: “Gogo mi talemaot sin bilong mi long iu, and mi no haedem mistek bilong mi. Mi sei: ‘Mi bae talemaot rong bilong mi long Jehovah.’ And iu nao letem mi free from mistek bilong olketa sin bilong mi.” For konfes long honest wei hem mekem man feel gud, from distaem conscience no mekem hem feel nogud from rong wea hem duim bifor.
Bihaen hem begim Jehovah for forgiveness, David ask olsem: “Wakem insaed long mi wanfala klinfala heart, O God, and putim insaed long mi wanfala niufala spirit, wanfala strong wan.” (Psalm 51:10) Wei for askem “wanfala klinfala heart” and “wanfala niufala spirit” showim hao David luksavve hem garem feeling for duim sin and hem needim God for helpem hem klinim heart bilong hem and start niu moa. Winim wei for feel sorre long seleva, hem disaed for go ahed strong for servem God. Hem prea olsem: “O Jehovah, letem iu openem lip bilong mi, mekem mouth bilong miseleva savve talemaot praise bilong iu.”—Psalm 51:15.
Hao nao feeling bilong Jehovah taem David repent long honest wei and disaed strong for servem hem? Hem givim disfala promis for comfortim David: “Mi bae mekem iu garem fasin for luksavve and teachim iu long wei wea iu mas followim. Mi bae givim advaes and lukluk long iu.” (Psalm 32:8) Diswan hem promis wea Jehovah sei hem nao bae lukaftarem feeling and need bilong man wea repent. Jehovah duim samting for givim moa savve long David, for lukluk go moa winim samting long aotsaed nomoa. Sapos hem kasem temptation long future, hem bae fit for luksavve wanem nao bae kamaot from samting hem duim and hao datwan bae affectim narawan, and hem bae fit for duim samting long wise wei.
Disfala story long laef bilong David hem for encouragem evriwan wea duim serious sin. Wei for konfesim sin and showimaot iumi repent long honest wei, minim iumi savve kasem bak spesol samting wea iumi garem bifor, wei for fren witim Jehovah God. Pain and shame wea iumi maet kasem for lelebet taem hem moabeta winim pain wea kamap sapos iumi stap kwaet, or nogud samting wea kamaot sapos iumi letem iumiseleva for kamap hard from gogo bilong nogud fasin. (Psalm 32:9) Winim datwan, iumi savve kasem forgiveness from God wea garem love and mercy, “Dadi bilong olketa kaenfala mercy and God bilong evri comfort.”—2 Corinthians 1:3.
[Piksa long page 31]
David hope for missim olketa samting wea kamaot from sin bilong hem taem hem sendem Uriah for go dae