KAVA SUBJECT: WASWE, IU SAVVE HAPI AND SATISFAE?
Waswe, Man Savve Hapi and Satisfae?
“Laef bilong mifala savve kasem seventi year, and sapos body bilong man hem barava strong, hem savve kasem eiti year. Nomata olsem, laef bilong mifala hem fulap witim trabol wea mekem mifala safa.”—Psalm 90:10.
TOKTOK hia hem barava tru! Staka taem laef bilong iumi distaem hem ‘fulap witim trabol wea mekem iumi safa.’ Maet iu garem tingting olsem, ‘Waswe, man savve hapi and satisfae?’
Tingim Maria. Hem wanfala strong woman bifor, bat distaem hem 84 year and from hem sik hem stap nomoa long haos. Hem laek duim olketa samting bat from hem no strong for duim olketa samting hia, hem no hapi and satisfae.
Waswe, iu hapi and satisfae long laef bilong iu? Maet iu duim sem waka evriday and iu taed and boring. Maet iu tingse no eniwan luksavve iu waka hard. Nomata laef bilong iu hem gud distaem, maet iu warim wanem nao bae happen long future. Maet samfala taem iu feel lonely and sorre. Famili bilong iu maet no hapi and raoa. Maet samwan wea iu lovem hem dae. Wanfala man wea nem bilong hem André hem barava fren gud witim dadi bilong hem, bat seknomoa dadi sik and hem dae nao. André sorre tumas and hem misstim dadi bilong hem.
Nomata wanem nao maet kasem iumi, iumi barava laek for savve sapos man savve hapi and satisfae. Olketa samting wea Jesus Christ duim samting olsem 2,000 year go finis, savve helpem iumi for savve long ansa bilong datfala kwestin. Nomata Jesus kasem staka hard taem, hem hapi and satisfae. So iumi tu savve hapi and satisfae sapos iumi followim example bilong hem.