Followim Example Bilong Jesus Mekem Iu Hapi and Satisfae

OLSEM iumi storyim finis, Jesus hem hapi and satisfae. So sapos iumi laek for hapi and satisfae, hem gud for followim example and olketa advaes bilong hem.

Jehovah barava laekem iumi for duim datwan, olsem datfala scripture antap showimaot. Iumi shud followim example bilong Jesus long evri samting wea iumi duim. Sapos iumi duim olsem, God bae hapi long iumi and bae iumi hapi and satisfae.

Long Sermon long Maunten Jesus storyim staka principle wea savve helpem iumi for followim example bilong hem. Bae iumi storyim samfala long olketa principle hia and hao iumi savve followim long laef bilong iumi.

PRINCIPLE: “Olketa wea luksavve olketa needim God bae hapi.”—Matthew 5:3.

HAO PRINCIPLE HIA HELPEM IUMI FOR HAPI AND SATISFAE:

Wanem Jesus talem showimaot God wakem iumi olketa man for laek savve long hem. Dastawe iumi laek for savve long ansa bilong olketa kwestin olsem: Why nao iumi laef? Why nao staka pipol safa? Waswe, God tingim iumi? Waswe, man savve gohed for laef bihaen hem dae? Iumi need for savve long ansa bilong olketa kwestin hia mekem iumi hapi and satisfae. Jesus savve olketa ansa wea iumi savve trustim hem stap long Bible. Taem Jesus prea long Dadi bilong hem, hem sei: ‘Toktok bilong iu hem tru.’ (John 17:17) Waswe, Bible savve helpem iumi for savve long God?

EXAMPLE:

Wanfala man wea nem bilong hem Esa hem singsing long wanfala band wea pipol laekem tumas. Esa garem chance for kamap wanfala rock star. Nomata olsem, Esa hem no satisfae. Hem sei: “Nomata mi duim staka samting wea mi enjoyim, mi no barava hapi and satisfae.” Gogo, Esa meetim wanfala Jehovah’s Witness. Esa sei: “Mi askem staka kwestin long hem and from hem talem olketa klia ansa wea kam from Bible, mi willing for hem studyim Bible witim mi.” Wanem Esa lanem from Bible barava helpem hem and gogo hem dedicatem laef bilong hem long Jehovah and baptaes. Hem sei: “Long bifor, staka taem mi kasem problem, bat bihaen mi studyim Bible mi hapi and satisfae nao.”

PRINCIPLE: “Olketa wea showimaot mercy bae hapi.”—Matthew 5:7.

HAO PRINCIPLE HIA HELPEM IUMI FOR HAPI AND SATISFAE:

For showimaot mercy hem minim for tingim narawan and kaen long olketa. Jesus showimaot mercy long olketa wea needim help. Hem barava sorre tumas long olketa so hem helpem olketa. (Matthew 14:14; 20:30-34) Taem iumi followim example bilong Jesus for showimaot mercy long pipol, iumi bae hapi and satisfae. (Acts 20:35) Iumi savve showimaot mercy long olketa narawan taem iumi duim gud samting for helpem olketa and kaen long olketa. Disfala example showimaot wei for showimaot mercy savve helpem iumi for hapi.

EXAMPLE:

Maria and hasband bilong hem Carlos, tufala showimaot gud example long wei for showimaot mercy. Mami bilong Maria hem dae so dadi bilong hem stap seleva. Gogo dadi bilong hem barava sik fogud and no savve wakabaot. Maria and Carlos tekem hem go long haos bilong tufala for lukaftarem hem. Staka taem tufala no savve sleep gud long naet and taem sik bilong hem kasem hem big, tufala mas kwiktaem tekem hem go long hospital. Tufala sei samfala taem tufala taed fogud. Bat olsem Jesus talem, tufala hapi and satisfae. Diswan hem bikos tufala lukaftarem gud dadi bilong Maria.

PRINCIPLE: “Olketa wea no raoa and wea stap gud witim narawan bae hapi.” —Matthew 5:9.

HAO PRINCIPLE HIA HELPEM IUMI FOR HAPI AND SATISFAE:

Hao nao olketa wea no raoa and wea stap gud witim narawan savve hapi and satisfae? Taem iumi stap gud witim narawan iumi bae fren gud witim olketa. Hem gud sapos iumi followim wanem Bible talem. Hem sei: “Traem best bilong iufala for stap gud witim olketa narawan.” (Rome 12:18) “Olketa narawan” hia hem minim olketa wea no garem sem biliv olsem iumi. Insaed diswan hem olketa famili member bilong iumi and olketa nara pipol. Disfala example showimaot olketa wea no raoa and wea stap gud witim “olketa narawan” savve hapi and satisfae.

EXAMPLE:

Tingim samting wea happen long wanfala woman wea nem bilong hem Nair. For plande year hem kasem staka problem insaed long famili, so hem mas traem best bilong hem for no raoa and stap gud witim olketa. Hasband bilong hem lusim hem for samting olsem 15 year finis and hemseleva nao lukaftarem olketa pikinini. Wanfala son bilong hem iusim drug and staka taem hem kros and laek for killim Nair and gele bilong hem. Nair sei wanem hem lanem from Bible helpem hem for no raoa and stap gud witim famili, nomata hem kasem olketa hard taem olsem. Hem traem best for kaen and tingim narawan. (Ephesus 4:31, 32) Hem sei from hem stap gud and no raoa witim olketa narawan datwan nao helpem famili bilong hem for hapi.

TINGIM WANEM BAE HAPPEN LONG FUTURE

Sapos iumi followim olketa teaching bilong Jesus, iumi bae hapi and satisfae. Bat for iumi barava hapi and satisfae iumi mas savve tu long wanem nao bae happen long future. Distaem iumi savve iumi bae kamap olo, sik and dae. Datwan no mekem iumi hapi and satisfae.

Bat gud nius hem stap! Jehovah bae blessim evriwan wea traem best for “barava followim gud” example bilong Jesus. Klosap nao bae Jehovah mekem earth kamap paradaes and pipol wea faithful long hem bae kamap perfect and stap for olowe. Bible sei: “Tent bilong God hem stap witim olketa man. Hem bae stap witim olketa and olketa bae kamap pipol bilong hem, and God nao bae stap witim olketa. Hem bae draem evri tias long eye bilong olketa. No eniwan bae dae and no enitaem bae pipol sorre or krae or feelim pain tu. Olketa samting wea happen bifor hem nomoa nao.”—Revelation 21:3, 4.

Maria wea iumi storyim finis long first article, hem barava luk forward long taem wea datfala profesi bae kamap tru. Waswe, iu laek for savve moa abaotem “datfala tru laef” wea pipol bae enjoyim anda long Kingdom bilong God? (1 Timothy 6:19) Sapos olsem, story witim Olketa Jehovah’s Witness long ples bilong iu or raet go long olketa wea pablisim disfala magasin.a