“No Givap”

1, 2. Olketa vision abaotem organization bilong Jehovah long heven and earth encouragem iumi for duim wanem samting?

HEM spesol privilege for iumi stap insaed wanfala organization wea barava big, wea stap long heven and earth. Long nambawan wei, olketa vision long Ezekiel chapter 1 and Daniel chapter 7 showimaot olketa samting wea Jehovah duim for mekem plan bilong hem kamap tru. Jesus nao leadim organization bilong Jehovah long earth for duim preaching waka, for teachim and encouragem olketa wea duim disfala waka, and for helpem nara pipol worshipim Jehovah. Diswan mekem iumi trustim organization bilong Jehovah!—Matt. 24:45.

² Waswe, iu gohed followim example bilong organization bilong Jehovah for busy long waka bilong hem? Maet iu luksavve iu start for no strong tumas for duim waka bilong Jehovah distaem. Diswan nao samting wea kasem samfala Christian long first century, so aposol Paul storyim example bilong Jesus. Hem sei diswan bae helpem olketa for no “taed and wikdaon.” (Heb. 12:3) Long study bifor diswan, iumi storyim nambawan waka wea organization bilong Jehovah duim distaem. Example bilong Christ hem encouragem olketa Christian long first century, and example bilong organization bilong Jehovah distaem savve helpem iumi for no givap long waka bilong God and for gohed strong tu.

3. Wanem nao iumi mas duim mekem iumi no taed and wikdaon, and wanem nao bae iumi storyim long disfala study?

³ Bat for iumi no “taed and wikdaon” long waka bilong God, hem no inaf for iumi ting abaotem example bilong organization bilong God nomoa. Paul sei iumi mas gohed for “duim gudfala samting.” (Gal. 6:9) Bae iumi storyim faevfala samting wea iumi mas duim for gohed strong and followim organization bilong Jehovah. Then iumi wanwan or famili bilong iumi savve ting raonem wanem iumi savve duim for kamap gud long olketa samting hia.

HIPAP FOR ENCOURAGEM NARAWAN AND FOR WORSHIP

4. Wanem nao showimaot wei for hipap tugeta hem important part bilong tru worship?

⁴ Start from bifor kam, wei for hipap tugeta hem barava important samting for pipol bilong Jehovah duim. Long heven, olketa angel savve kam hipap front long Jehovah. (1 Ki. 22:19; Job 1:6; 2:1; Dan. 7:10) Long Israel bifor, God talem olketa Israelite for hipap tugeta mekem “olketa savve lisin and lane.” (Deut. 31:10-12) Long first century, olketa Jew savve hipap evritaem long sinagog for readim olketa Holy Raeting. (Luke 4:16; Acts 15:21) Taem Christian kongregeson hem start, wei for hipap tugeta hem important part bilong worship, and kam kasem distaem hem important part long worship bilong iumi tu. Olketa tru Christian “tingim narawan mekem [olketa] savve encouragem olketa for showimaot love and duim olketa gudfala samting.” From iumi stap long olketa last day, iumi need for “encouragem narawan.”—Heb. 10:24, 25.

5. Wanem nao iumi savve duim for encouragem olketa narawan long olketa meeting bilong iumi?

⁵ Wanfala important wei wea iumi savve encouragem narawan long olketa meeting hem for givim olketa koment. Olsem example, iumi savve ansarem kwestin bilong paragraf, storyim scripture, or talem experience wea showimaot wei wea olketa Bible principle savve helpem iumi. (Ps. 22:22; 40:9) Nomata iumi just lanem truth or stap long truth for longfala taem finis, evri koment wea iumi herem long olketa meeting from olketa wea olo and olketa young wan tu, barava encouragem iumi.

6. Long olketa wanem wei nao olketa meeting helpem iumi?

⁶ Olketa meeting, assembly, and convention helpem iumi long staka nara wei tu. Olsem example, iumi kasem strong for no fraet for preach nomata pipol long territory againstim iumi or no interest. (Acts 4:23, 31) Olketa Bible tok wea iumi herem long olketa hipap hia strongim faith bilong iumi. (Acts 15:32; Rome 1:11, 12) Wei for hipap witim olketa brata and sista barava mekem iumi hapi and comfortim iumi. (Ps. 94:12, 13) Teaching Komiti bilong Governing Body redyim evri spiritual program hia for teachim pipol bilong Jehovah. Iumi barava tinghae long nambawan spiritual kaikai wea iumi kasem long olketa meeting evri week!

7, 8. (a) Wanem nao main reason why iumi go long olketa meeting? (b) Hao nao olketa meeting helpem iu?

⁷ Hem tru, iumi kasem olketa gud samting from olketa meeting bilong iumi, bat main reason why iumi go long olketa meeting hem for worshipim Jehovah. (Readim Psalm 95:6.) Hem spesol privilege for singsing for praisem nambawan God bilong iumi! (Col. 3:16) Iumi praisem Jehovah tu taem iumi givim olketa koment. Hem barava fitim for iumi worshipim Jehovah long olketa wei olsem. (Rev. 4:11) Dastawe hem important for iumi no misstim eni meeting!—Heb. 10:25.

⁸ Olketa meeting bilong iumi hem present from Jehovah for helpem iumi gohed strong go kasem taem hem finisim disfala nogud world. Waswe, hem nao tingting bilong iu abaotem olketa meeting? Sapos iumi garem datkaen tingting, bae iumi traem best bilong iumi for attendim evri meeting nomata iumi garem staka nara samting tu for duim. (Phil. 1:10) Hem barava important for iumi mas no misstim eni meeting.

STRONG FOR PREACH

9. Hao nao iumi savve preaching waka hem important?

⁹ Taem iumi strong for duim preaching waka, datwan bae helpem iumi for gohed followim organization bilong Jehovah. Jesus nao startim preaching waka taem hem stap long earth. (Matt. 28:19, 20) Start long datfala taem, waka for preach and teachim pipol for kamap disaepol hem wanfala main samting wea organization bilong Jehovah long heven and earth hem duim. Staka experience showimaot olketa angel sapotim waka wea iumi duim and helpem iumi for faendem olketa wea laek for kasem laef olowe. (Acts 13:48; Rev. 14:6, 7) Reason why Jehovah garem wanfala organization long earth nao hem for organizem and sapotim disfala preaching waka. Waswe, disfala waka hem barava important samting long laef bilong iu tu?

10. (a) Wanem nao wanfala brata duim for strongim wei wea hem tinghae long truth? (b) Hao nao ministry bilong iu strongim wei wea iu tinghae long truth?

¹⁰ Taem iumi strong for preach, datwan bae strongim wei wea iumi tinghae long truth. Datwan nao hem tingting bilong Mitchel wea hem wanfala elder and pioneer for longfala taem finis. Hem sei: “Mi laekem tumas for story abaotem truth long nara pipol. Taem mi tingim olketa article insaed long olketa niu Wastaoa and Awake! magasin, mi tinghae tumas long wisdom and savve long information hia, and wei wea hem barava fitim. Mi laek go long preaching waka mekem mi lukim wanem nao tingting bilong pipol abaotem olketa magasin hia, and hao mi savve story for mekem olketa interest.” Mitchel sei tu ministry helpem hem for mek sure olketa important samting hem first samting long laef bilong hem, and hem no letem eni samting stopem hem for duim ministry. Iumi tu bae no givap sapos iumi busy for duim waka bilong God long olketa last day distaem.—Readim 1 Corinth 15:58.

KASEM GUD SAMTING FROM SPIRITUAL KAIKAI

11. Why nao iumi shud readim olketa pablikeson bilong iumi and ting raonem wanem iumi readim?

¹¹ Wanfala wei wea Jehovah strongim iumi nao hem olketa spiritual kaikai wea iumi kasem long olketa pablikeson bilong iumi. Maet iu tingim wanfala taem wea iu readim samting insaed pablikeson bilong iumi and ting olsem: ‘Diswan barava fitim mi nao!’ Iu feel olsem bikos Jehovah iusim olketa pablikeson hia for teachim and leadim iumi. Jehovah sei: “Bae mi teachim iu for garem stretfala tingting and bae mi teachim iu stretfala wei for iu followim.” (Ps. 32:8) Waswe, iu traem best for readim evri pablikeson iumi kasem and ting raonem wanem iu readim? Diswan bae helpem iumi for no givap and gohed strong for duim waka bilong God long olketa last day wea laef hem no isi.—Readim Psalm 1:1-3; 35:28; 119:97.

12. Wanem nao bae helpem iumi for tinghae long olketa pablikeson bilong iumi?

¹² Sapos iumi ting raonem bigfala waka wea olketa brata and sista duim for wakem olketa pablikeson bilong iumi, bae iumi tinghae long olketa pablikeson hia. Olketa mas duim research, raetem, chekim gud, putim piksa, and transleitim evri pablikeson wea iumi printim or putim long Web site bilong iumi. Raeting Komiti bilong Governing Body nao lukaftarem disfala waka. Then olketa branch wea printim olketa pablikeson sendem go long olketa kongregeson. Evri waka hia hem for wanem? Hem for pipol bilong Jehovah kasem spiritual kaikai wea olketa needim for gohed faithful. (Isa. 65:13) Iumi mas traem best for kasem gudfala samting from evri spiritual kaikai wea kam from organization bilong Jehovah.—Ps. 119:27.

SAPOTIM ORGANIZATION BILONG JEHOVAH

13, 14. Hu nao olketa long heven wea sapotim olketa arrangement bilong Jehovah, and hao nao iumi savve duim sem samting long earth?

¹³ Long wanfala vision, John lukim Jesus raedem horse wea kala bilong hem white. Hem go for faetem olketa wea againstim Jehovah and hem win. (Rev. 19:11-15) Hem lukim tu olketa faithful anointed Christian wea kasem finis reward bilong olketa long heven and olketa faithful angel raedem olketa horse bihaen long Jesus. Diswan showimaot olketa sapotim Jesus wea hem nao Leader bilong olketa. (Rev. 2:26, 27) Iumi lane from nambawan example bilong olketa hao iumi shud sapotim olketa wea Jehovah iusim for lead insaed organization bilong hem.

¹⁴ Datfala big crowd tu barava sapotim waka bilong olketa anointed brata bilong Christ wea stap yet long earth. (Readim Zechariah 8:23.) Wanem nao iu savve duim for showimaot iu sapotim organization bilong Jehovah? Wanfala wei hem for obeyim olketa wea lead. (Heb. 13:7, 17) Waswe, toktok bilong iumi abaotem olketa elder long kongregeson encouragem olketa narawan for respectim olketa and waka bilong olketa? Waswe, iumi teachim olketa pikinini bilong iumi for respectim olketa elder hia and followim advaes bilong olketa? Iumi savve showimaot iumi sapotim organization long olketa nara wei tu. Olsem example, waswe, famili bilong iumi markem samfala selen for givim olsem donation for helpem preaching waka wea gohed evriwea long world? (Prov. 3:9; 1 Cor. 16:2; 2 Cor. 8:12) Waswe, iumi help for klinim and lukaftarem tu Kingdom Hall? Taem Jehovah lukim iumi sapotim organization bilong hem long olketa wei olsem, hem givim holy spirit long iumi. And spirit bilong hem strongim iumi for no givap long olketa last day distaem.—Isa. 40:29-31.

LAEF BILONG IUMI MAS MEKEM GOD HAPI

15. Why nao iumi mas no givap for duim samting wea stret?

¹⁵ Sapos iumi laek for gohed strong and followim organization bilong Jehovah, iumi mas duim samting wea mekem Jehovah hapi. (Eph. 5:10, 11) Hem no isi for iumi duim samting wea stret bikos iumi no perfect, iumi stap long disfala nogud world, and Satan hem againstim iumi. Samfala long iufala olketa brata and sista mas faet hard evriday for gohed fren gud witim Jehovah. Jehovah lovem iu from iu traem best for duim stret samting. No givap! Taem iumi duim samting wea mekem Jehovah hapi, iumi duim gud samting long laef bilong iumi and iumi savve hapi, and iumi sure Jehovah hapi long iumi.—1 Cor. 9:24-27.

16, 17. (a) Wanem nao iumi shud duim sapos iumi duim bigfala sin? (b) Wanem nao iumi savve lanem from example bilong Anne?

¹⁶ Bat waswe sapos iu duim bigfala sin? No haedem. Kwiktaem ask for help. Tingim feeling bilong David taem hem trae for haedem sin wea hem duim. Hem sei: “Mi barava wiki from mi krae long heart evriday.” (Ps. 32:3) Sapos iumi trae for haedem olketa big sin, bae iumi no hapi and maet iumi spoelem tu wei wea iumi fren witim Jehovah. Bat sapos iumi talemaot olketa sin bilong iumi, bae iumi “kasem mercy” from Jehovah.—Prov. 28:13.

¹⁷ Tingim example bilong Anne.a Taem Anne hem teenager and hem regular pioneer, hem start for duim olketa nogud samting. Diswan mekem hem for garem guilty konsens. Hem sei: “Mi no hapi and mi sorre olowe nomoa.” Long wanfala meeting, olketa story abaotem James 5:14, 15. Anne luksavve hem needim help. Wanem nao hem duim? Hem followim toktok bilong datfala scripture and hem go story witim olketa elder. Datwan hem no isi, bat Anne sei hem olsem hem sik and Jehovah givim medicine wea hem needim. Hem sei: “Hem no isi for drinkim datfala medicine, bat hem savve healim man.” Distaem Anne gohed strong moa for worshipim Jehovah and hem garem gudfala konsens.

18. Wanem nao iumi mas traem best for duim?

¹⁸ Hem nambawan privilege for stap insaed organization bilong Jehovah long olketa last day distaem! Iumi and famili bilong iumi laek traem best for no misstim eni meeting, strong for preach, and kasem gud samting from evri pablikeson bilong iumi. Iumi laek sapotim tu olketa wea lead, and duim samting wea mekem Jehovah hapi. Sapos iumi duim olketa samting hia, iumi followim organization bilong Jehovah, and bae iumi no givap.