“Luksavve Long Olketa Samting wea Barava Important”

1, 2. Wanem profesi abaotem olketa last day nao maet olketa disaepol interest tumas long hem, and why nao olsem?

JESUS talem olketa disaepol bilong hem temple long Jerusalem bae distroe. Peter, James, John, and Andrew tingting strong abaotem samting wea hem talem. (Mark 13:1-4) So taem olketa stap seleva witim Jesus, olketa sei: “Mifala laek savve, Wanem taem nao olketa samting hia bae happen and wanem nao saen wea bae showimaot iu stap and world hem gogo for finis?” (Matt. 24:1-3) Jesus storyim olketa samting wea bae happen bifor Jerusalem hem distroe, and tu, olketa samting wea bae happen long olketa last day bilong world bilong Satan. Jesus sei olketa nogud samting bae happen olsem war, bigfala hangre, and plande pipol bae duim olketa samting wea no stret. Bat Jesus sei wanfala gud samting bae happen tu. Hem sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”—Matt. 24:7-14.

² Olketa disaepol bilong Jesus gogo witim hem finis for preachim gud nius abaotem Kingdom. (Luke 8:1; 9:1, 2) And maet olketa tingim toktok bilong Jesus, taem hem sei: “Staka samting nao stap for harvestim, bat no staka wakaman stap for duim datwan. So askem man wea ownim planteison for sendem go olketa wakaman for harvestim planteison bilong hem.” (Luke 10:2) Bat hao nao bae olketa preach “long evri ples long world mekem pipol long evri kantri mas herem”? Hu nao bae duim datfala waka? Long datfala taem, olketa disaepol bilong Jesus nating savve datfala toktok long Matthew 24:14 bae kamap tru long bigfala wei!

3. Why nao samting wea Jesus talem long Luke 21:34 hem barava important for iumi distaem, and wanem kwestin nao hem gud for iumi wanwan tingim?

³ Profesi bilong Jesus hem kamap tru long taem bilong iumi. Plande million disaepol bilong Jesus preachim gud nius abaotem Kingdom long evri ples long world. (Isa. 60:22) Bat Jesus sei tu bae hem no isi for samfala mek sure preaching waka hem first samting long laef bilong olketa. Bae olketa busy tumas for duim olketa nara samting and bae olketa “no garem stretfala tingting.” (Readim Luke 21:34.) Samting wea Jesus talem hem barava important for iumi distaem bikos samfala pipol bilong God no strong for duim olketa samting wea barava important. Diswan showaot klia long samting olketa disaedem abaotem waka, hae education, or olketa material samting. Samfala spendem staka taem long sports or hapitaem. Olketa narawan no busy long waka bilong God bikos olketa wari tumas abaotem olketa samting saed long living. So iumi wanwan need for tingim: ‘Waswe, samting wea God laekem nao hem first samting long laef bilong mi?’

4. (a) Wanem nao Paul talem long prea for olketa Christian long Philippi, and why nao olsem? (b) Wanem nao bae iumi storyim long disfala study and long next study, and why nao olsem?

⁴ Olketa Christian long first century mas waka hard for mek sure waka bilong God hem first samting long laef bilong olketa. Dastawe aposol Paul prea long Jehovah for helpem olketa long Philippi for “luksavve long olketa samting wea barava important.” (Readim Philippi 1:9-11.) Staka Christian followim example bilong Paul and “no fraet nao for talemaot toktok bilong God.” (Phil. 1:12-14) Staka long iumi distaem tu no fraet for talemaot toktok bilong God. Nomata olsem, disfala study bae storyim hao Jehovah iusim organization bilong hem distaem for mekem toktok bilong Matthew 24:14 kamap tru. Diswan bae encouragem iumi and helpem iumi for gohed strong for duim preaching waka. Wanem nao organization bilong Jehovah hem duim distaem, and hao nao datwan encouragem iumi and famili bilong iumi? Long next study, bae iumi storyim olketa samting wea savve helpem iumi for no givap for duim waka bilong God, and for gohed followim organization bilong Jehovah.

ORGANIZATION BILONG JEHOVAH LONG HEVEN

5, 6. (a) Why nao Jehovah mekem olketa wakaman bilong hem lukim olketa vision abaotem olketa samting wea happen long heven? (b) Wanem nao Ezekiel lukim long vision?

⁵ Staka samting nao Jehovah no putim insaed Bible. Olsem example, Bible no storyim staka samting abaotem brain bilong man or universe. Bat Jehovah talem information wea iumi needim for minim plan bilong hem and for iumi savve obeyim hem. (2 Tim. 3:16, 17) Wanfala interesting samting nao, Jehovah disaed for talem iumi abaotem organization bilong hem long heven wea iumi no savve lukim. Iumi interest tumas for read abaotem diswan long Bible long olketa buk bilong Isaiah, Ezekiel, Daniel, and Revelation. (Isa. 6:1-4; Ezek. 1:4-14, 22-24; Dan. 7:9-14; Rev. 4:1-11) Why nao Jehovah laekem iumi for savve abaotem samfala samting wea happen long heven?

⁶ Jehovah laekem iumi for tingim evritaem hao iumi insaed wanfala organization wea stap long heven and long earth. Organization bilong Jehovah long heven wea iumi no savve lukim hem waka hard for gohed duim wanem Jehovah laekem. Olsem example, Ezekiel lukim long vision wanfala maeti chariot wea piksarem organization bilong Jehovah long heven. Disfala chariot savve muv fast and kwiktaem changem gogo bilong hem. (Ezek. 1:15-21) Ezekiel lukim tu man wea raedem datfala chariot. Hem sei: “Mi lukim samting olsem metal wea shaen, wea fire stap raonem.” Hem sei moa: “Hem luk olsem glory bilong Jehovah.” (Ezek. 1:25-28) Masbi Ezekiel hem barava sapraes taem hem lukim datfala vision! Hem lukim Jehovah nao kontrolem organization bilong hem and iusim holy spirit bilong hem for directim datwan. Datfala chariot wea savve muv hem barava helpem iumi for minim organization bilong Jehovah long heven!

7. Hao nao vision wea Daniel lukim hem helpem iumi for trustim Jehovah and Jesus?

⁷ Daniel tu lukim wanfala vision wea helpem iumi for trustim Jehovah and Jesus. Hem lukim Jehovah, “datfala man from bifor kam,” hem sidaon long throne wea garem olketa wheel. (Dan. 7:9) Jehovah laekem Daniel for lukim organization bilong Jehovah hem muv, wea minim hem gohed duim wanem Jehovah laekem. Then Daniel lukim “samwan wea luk olsem wanfala son bilong man,” wea hem nao Jesus. Hem kasem paoa ovarem organization bilong Jehovah long earth. Jesus bae no rul ovarem olketa man for tu-thri year nomoa. “Hem bae rul for olowe, and no eniwan bae spoelem kingdom bilong hem.” (Dan. 7:13, 14) Disfala vision helpem iumi for trustim Jehovah and luksavve long olketa samting wea hem duim. And from Jesus kasem paoa for rul from Jehovah, disfala vision hem mekem iumi trustim Jesus wea hem Leader bilong iumi.

8. Ezekiel and Isaiah ting hao long olketa vision abaotem organization bilong Jehovah, and hao nao iumi shud ting long olketa vision hia?

⁸ Iumi shud ting hao long olketa vision hia abaotem organization bilong Jehovah? Olsem Ezekiel, iumi tinghae long samting wea Jehovah hem duim. (Ezek. 1:28) Profet Isaiah tu lukim wanfala vision abaotem samting wea happen long heven, and hem hapi for storyim datwan long olketa narawan. (Readim Isaiah 6:5, 8.) From Jehovah helpem Isaiah, Isaiah savve no eni samting savve stopem hem for duim waka olsem profet. Olsem Isaiah, iumi tu laekem tumas for duim moa samting long waka bilong Jehovah for sapotim organization bilong hem. Iumi hapi tumas for savve iumi insaed wanfala organization wea gohed busy for duim wanem Jehovah laekem!

ORGANIZATION BILONG JEHOVAH LONG EARTH

9, 10. Why nao Jehovah needim wanfala organization long earth?

⁹ Jehovah iusim Son bilong hem for startim wanfala organization long earth wea waka tugeta witim organization bilong hem long heven. Hem duim diswan mekem samting wea Jesus storyim long Matthew 24:14 savve kamap tru. Why nao Jehovah needim wanfala organization long earth for duim disfala waka? Tingim thrifala reason.

¹⁰ Firstfala reason, Jesus sei olketa disaepol bilong hem bae preach “long evri farawe ples long earth.” (Acts 1:8) Mek-tu reason, olketa wea duim datfala preaching waka bae needim spiritual kaikai and encouragement. (John 21:15-17) Mek-thri reason, olketa bae need for hipap tugeta for worshipim Jehovah and for lanem hao for duim disfala preaching waka. (Heb. 10:24, 25) For duim olketa samting hia, olketa disaepol bilong Jesus mas organize gud.

11. Hao nao iumi savve showimaot iumi sapotim organization bilong Jehovah?

¹¹ Hao nao iumi savve showimaot iumi sapotim organization bilong Jehovah? Wanfala important wei hem for trustim olketa brata wea lead long disfala waka for preach. Jehovah and Jesus trustim olketa brata hia, so iumi tu mas trustim olketa. Olketa brata hia savve iusim taem and strong bilong olketa for stretem olketa problem bilong disfala world, bat datwan hem no goal bilong olketa. Bae iumi storyim wanem nao goal bilong organization bilong Jehovah long earth kam kasem distaem.

OLKETA DUIM “SAMTING WEA BARAVA IMPORTANT” FIRSTAEM

12, 13. Hao nao olketa elder wea leadim preaching waka long kantri wea olketa stap duim waka bilong olketa, and hao nao example bilong olketa encouragem iu?

¹² Long evri kantri, samfala mature elder garem responsibility for organizem and leadim preaching waka long kantri wea olketa stap. Hao nao olketa duim datwan? Bifor olketa disaedem samting, olketa prea long Jehovah for helpem olketa, and lukluk long wanem Bible hem talem wea mekem Bible hem ‘wanfala lamp for leg bilong olketa and wanfala laet for road bilong olketa.’ From olketa duim diswan, organization bilong Jehovah long heven nao hem leadim olketa.—Ps. 119:105; Matt. 7:7, 8.

¹³ Disfala waka for “talemaot message bilong God” hem important tumas long olketa elder hia, olsem olketa elder long first century tu. (Acts 6:4) Olketa barava hapi for lukim preaching waka gohed gud long ples wea olketa stap and raonem full world. (Acts 21:19, 20) Olketa no mekem staka rul for pipol bilong God. Bat taem olketa mekem olketa arrangement for preaching waka hem gohed gudfala, olketa followim wanem Bible talem, and holy spirit nao leadim olketa. (Readim Acts 15:28.) Taem olketa duim diswan, olketa brata hia showimaot nambawan example for evriwan long olketa kongregeson.—Eph. 4:11, 12.

14, 15. (a) Olketa wanem waka nao hem gohed wea helpem iumi for preachim gud nius evriwea long earth? (b) Hao nao tingting bilong iu abaotem waka wea iu duim for sapotim preaching waka?

¹⁴ Staka brata bilong iumi waka evriday for redyim olketa buk, meeting, and convention. Olsem example, staka thousand volunteer waka hard for transleitim spiritual kaikai long winim 600 languis. Diswan mekem staka pipol fit for lane abaotem “olketa nambawan samting wea God duim” long languis bilong olketa seleva. (Acts 2:7-11) Olketa young brata and sista waka hard for printim and redyim olketa buk hia. Then olketa sendem olketa buk hia long olketa kongregeson evriwea long earth.

¹⁵ Staka arrangement stap for helpem iumi busy for gohed preachim gud nius witim olketa brata and sista long kongregeson. Olsem example, staka thousand duim volunteer waka for buildim olketa niu Kingdom Hall and Assembly Hall. Olketa narawan helpem olketa wea kasem natural disaster and olketa wea stap long hospital. Samfala organizem olketa assembly and convention bilong iumi, and samfala moa teachim olketa Bible skul. Why nao pipol bilong Jehovah duim evri waka hia? Evri waka hia hem for helpem iumi preachim gud nius, kamap strongfala Christian, and for helpem staka moa pipol for worshipim Jehovah. Organization bilong Jehovah long earth barava gohed strong for duim olketa samting wea barava important!

FOLLOWIM EXAMPLE BILONG ORGANIZATION BILONG JEHOVAH

16. Iu savve duim research abaotem wanem long famili worship or taem iu duim study seleva?

¹⁶ Waswe, samfala taem iumi savve ting raonem bigfala waka wea organization bilong Jehovah duim? Maet taem iu duim famili worship or study seleva, iu savve duim research abaotem organization and ting raonem wanem iu lanem. Olsem example, iu bae barava enjoyim wei for studyim olketa vision wea Isaiah, Ezekiel, Daniel, and John lukim. Iumi savve lanem staka interesting samting tu abaotem organization bilong Jehovah long datfala buk Jehovah’s Witnesses—Proclaimers of God’s Kingdom, and long olketa nara buk and DVD tu.

17, 18. (a) Wanem gud samting nao iu kasem from disfala study? (b) Olketa wanem kwestin nao iumi wanwan shud tingim?

¹⁷ Hem gud for iumi ting raonem wei wea Jehovah iusim organization bilong hem for sapotim preaching waka. Iumi tu laek for olsem disfala nambawan organization, long wei for mek sure olketa samting wea barava important hem first samting long laef bilong iumi. Sapos iumi duim olsem, bae iumi garem sem tingting olsem Paul, wea sei: “God givim disfala ministry long mifala from hem showimaot mercy long mifala. Dastawe mifala no givap.” (2 Cor. 4:1) Hem sei tu long olketa wea waka tugeta witim hem: “Iumi mas gohed for duim gudfala samting, bikos long taem wea God markem, bae iumi kasem gud samting sapos iumi no givap.”—Gal. 6:9.

¹⁸ Waswe, iu or famili bilong iu need for changem samfala samting for mek sure olketa samting wea barava important hem first samting long laef bilong iu evriday? Waswe, iu savve mekem laef bilong iu simpol mekem iu savve duim moa samting long preaching waka? Long next study, bae iumi storyim faevfala samting wea bae helpem iumi gohed followim example bilong organization bilong Jehovah long wei for gohed strong for duim waka bilong God.