Waswe, Iu “Strong for Duim Olketa Gud Samting”?

1, 2. Wanem nambawan privilege nao iumi Olketa Jehovah’s Witness garem, and hao nao iu ting long datfala privilege?

MAN wea kasem award for spesol samting wea hem duim, hem tinghae long datwan. Olsem example, samfala kasem Nobel Prize bikos olketa waka hard for mekem peace kamap midolwan tufala kantri. Bat wanfala big privilege wea winim datwan, hem for kamap wakaman bilong God for helpem pipol fren witim hem!

² Iumi Olketa Jehovah’s Witness nomoa garem datfala nambawan privilege. God and Christ iusim iumi for helpem pipol “fren bak moa witim God.” (2 Cor. 5:20) So Jehovah iusim iumi for leadim pipol kam long hem. From diswan, staka million pipol long winim 235 kantri fren witim God and garem hope for laef olowe. (Titus 2:11) Iumi strong for duim preaching waka and invaetem “eniwan wea laekem” for lanem truth. (Rev. 22:17) Iumi “strong for duim olketa gud samting,” wea minim iumi tinghae long waka wea iumi duim for Jehovah, and iumi traem best for mekem hem hapi. (Titus 2:14) Distaem bae iumi storyim hao strong bilong iumi for duim olketa gudfala samting savve helpem olketa narawan for savve long Jehovah. Wanfala wei nao hem preaching waka bilong iumi.

STRONG FOR DUIM WAKA OLSEM JEHOVAH AND JESUS

3. Toktok long Isaiah 9:7 showimaot Jehovah hem laek for duim wanem samting?

³ Isaiah 9:7 hem sei Son bilong God bae King and bae hem duim olketa gudfala samting for olketa man. Diswan bae happen bikos “Jehovah wea komanda bilong olketa army hem barava laek for duim.” Datfala toktok mekem iumi luksavve Jehovah hem barava laek for sevem olketa man. Iumi mas sapotim and strong for duim preaching waka bikos Jehovah God tu hem strong for duim samting. From iu wanfala wea waka tugeta witim God, waswe, iu traem best bilong iu for talemaot datfala gud nius?—1 Cor. 3:9.

4. Hao nao Jesus showimaot perfect example for gohed strong long ministry?

⁴ Jesus hem showimaot perfect example for gohed strong long ministry. Nomata pipol againstim Jesus and laek killim hem dae, hem strong for duim preaching waka go kasem taem hem dae. (John 18:36, 37) From Jesus savve datfala taem wea hem bae safa and dae hem klosap, hem duim moa samting for helpem pipol savve long Jehovah.

5. Hao nao Jesus hem olsem datfala wakaman long tokpiksa abaotem fig tree?

⁵ Long 32 C.E., Jesus talem wanfala tokpiksa abaotem man wea garem fig tree long grape planteison bilong hem wea no garem eni frut. Bihaen thrifala year, datfala man talem wakaman bilong hem for katem datfala tree, bat wakaman hia askem hem for givim hem moa taem for trae mekem datfala tree garem frut. (Readim Luke 13:6-9.) Taem Jesus storyim datwan, no staka pipol kamap disaepol bilong hem yet. Bat long datfala tokpiksa Jesus showimaot hem laek for duim moa samting long preaching waka bifor hem dae. So for sixfala month hem barava strong for preach long Judea and Perea. Tu-thri day bifor Jesus dae, hem krae bikos staka no acceptim message bilong hem.—Matt. 13:15; Luke 19:41.

6. Why nao iumi shud trae for duim moa samting long ministry?

⁶ From iumi barava klosap long end, iumi mas trae for duim moa samting long ministry. (Readim Daniel 2:41-45.) Iumi olketa Witness bilong Jehovah, and datwan hem nambawan privilege! From iumi nomoa savve hao olketa problem long world bae finis, iumi nomoa savve talem pipol abaotem datwan for givim hope long olketa. No longtaem go nomoa, wanfala woman wea raet long niuspepa sei no eniwan savve long why nao olketa nogud samting happen long gudfala pipol. Bible nao talem ansa bilong datwan, and hem privilege and responsibility bilong iumi olketa Christian for talem nara pipol. Iumi mas “letem holy spirit mekem [iumi] strong” for duim waka bilong Jehovah. (Rome 12:11) Jehovah bae blessim waka bilong iumi, and iumi savve helpem pipol for savve long hem and lovem hem.

SAMTING WEA IUMI DUIM HEM MEKHAE LONG JEHOVAH

7, 8. Hao nao wei wea iumi iusim taem and strong bilong iumi long ministry hem mekhae long Jehovah?

⁷ Taem Paul duim preaching waka samfala taem hem “no savve sleep long naet” or hem “no garem kaikai.” (2 Cor. 6:5) Olketa brata and sista bilong iumi tu kasem semkaen samting. Ministry hem first samting long laef bilong olketa pioneer, bat staka long olketa mas waka for selen tu. Tingim tu olketa missionary wea lusim kantri bilong olketa for helpem pipol long olketa difren kantri. (Phil. 2:17) Samfala taem olketa elder no kaikai witim famili or olketa sleep leit bikos olketa lukaftarem olketa brata and sista long kongregeson. Olketa olo long kongregeson and olketa wea sik traem best for attendim olketa meeting and duim preaching waka. Iumi barava tinghae long evriwan hia wea iusim taem and strong bilong olketa for duim ministry. Nara pipol tu luksavve ministry hem barava important long iumi.

⁸ Wanfala man wea no Witness hem raetem leta long wanfala niuspepa long United Kingdom. Hem sei: ‘Pipol no trustim olketa religion distaem. Mi no savve wanem nao olketa bigman bilong religion duim. Olketa no go for meetim pipol olsem Christ hem duim. Olketa Jehovah’s Witness nomoa tingim pipol and go for meetim pipol and preachim tru samting.’ Hem wei bilong pipol long world for duim samting wea olketa seleva nomoa laekem and no tingim narawan. Bat from iumi willing for iusim taem and strong bilong iumi for preach, iumi mekhae long Jehovah God.—Rome 12:1.

9. Wanem nao savve helpem iumi for gohed strong for duim olketa gud samting long ministry?

⁹ Bat wanem nao iumi savve duim sapos distaem iumi no strong for duim preaching waka olsem bifor? Iumi shud ting raonem olketa gud samting wea kamaot from disfala waka wea Jehovah givim long iumi. (Readim Rome 10:13-15.) For pipol sev, olketa mas garem faith long Jehovah and prea long hem. Bat hard for olketa duim olsem sapos iumi no go preach long olketa. Diswan shud mekem iumi gohed strong for duim olketa gud samting, and for traem best bilong iumi for talemaot gud nius abaotem Kingdom.

GUDFALA WEI BILONG IUMI MEKEM PIPOL LAEK SAVVE LONG GOD

10. Hao nao gudfala wei bilong iumi mekem pipol laek savve long God?

¹⁰ Nomata iumi strong for duim ministry, iumi mas duim olketa nara samting tu for mekem pipol laek savve long God. Mek-tu samting wea helpem olketa hem gudfala wei bilong iumi olketa Christian. Paul storyim why hem important for iumi garem gudfala wei. Hem sei: “Mifala no duim eni samting for spoelem tingting bilong pipol mekem olketa no tok againstim waka wea mifala duim.” (2 Cor. 6:3) Maet gudfala toktok and wei bilong iumi mekem pipol laek worshipim Jehovah. (Titus 2:10) Plande taem iumi herem story hao pipol acceptim truth from olketa lukim iumi followim wei bilong Christ.

11. Why nao iumi shud tingting gud and prea abaotem wei bilong iumi and hao nao datwan affectim nara pipol?

¹¹ Bat sapos wei bilong iumi hem nogud, datwan savve mekem pipol no laek savve long Jehovah. So nomata iumi long waka, haos, or long skul, iumi mas mek sure iumi no duim eni samting wea bae mekem pipol no interest long Jehovah. Sapos iumi “gohed for duim sin” bae iumi spoelem for olowe wei wea iumi fren witim Jehovah. (Heb. 10:26, 27) Diswan shud mekem iumi tingting gud and prea abaotem wei bilong iumi and hao nao datwan affectim nara pipol. Taem wei bilong pipol hem gohed for worse moa, datwan shud helpem pipol for “luksavve man wea worshipim God hem difren from man wea no worshipim hem.” (Mal. 3:18) Tru nao, gudfala wei bilong iumi olketa Christian hem wanfala important wei for helpem pipol laek fren witim God.

12-14. Taem pipol lukim iumi no givap nomata iumi kasem test, hao nao olketa ting long truth? Storyim example.

¹² Long mek-tu leta bilong Paul for olketa long Corinth, hem sei hem kasem trabol, pipol killim hem, and putim hem long prison bikos long ministry bilong hem. (Readim 2 Corinth 6:4, 5.) Taem iumi kasem olketa test and iumi no givap, datwan savve helpem nara pipol for acceptim truth. Samfala year bifor, samfala pipol trae for finisim Olketa Jehovah’s Witness long wanfala ples long Angola. Olketa whipim nogud tufala Witness wea baptaes and 30 pipol wea interest go kasem taem body bilong olketa blood. Olketa duim olsem tu long olketa woman and pikinini. Olketa forcem olketa lokol pipol for lukluk taem olketa whipim olketa for mekem olketa fraet for lisin long Olketa Jehovah’s Witness. Bat bihaen datwan, staka pipol long datfala community askem olketa Witness for studyim Bible witim olketa! From datwan, preaching waka hem gohed gud, and namba bilong olketa pablisa hem go ap wea mekem olketa brata kasem staka blessing.

¹³ Disfala example showimaot sapos iumi no fraet taem iumi kasem hard samting, maet diswan mekem pipol wea lukim datwan acceptim truth. Maet wei wea Peter and olketa nara aposol no fraet hem encouragem olketa narawan for fren witim God. (Acts 5:17-29) Maet olketa skulfren, pipol iumi waka witim or samfala long famili bilong iumi acceptim truth from olketa lukim iumi no fraet taem pipol againstim iumi.

¹⁴ Evriday pipol againstim and spoelem samfala brata and sista bilong iumi. Olsem example, distaem, long Armenia, samting olsem 40 brata stap long prison bikos olketa no teksaed. Luk olsem staka moa long datfala kantri bae go long prison long olketa month wea bae kam. Long Eritrea, 55 brata and sista stap long prison, and age bilong samfala hem winim 60 year. Long South Korea, samting olsem 700 Witness stap long prison bikos olketa no teksaed. For 60 year finis, gavman long there putim olketa brata bilong iumi long prison. Hem gud tumas for iumi prea for olketa brata long olketa kantri olsem for olketa gohed faithful mekem olketa savve givim glory long God, and for diswan helpem olketa narawan acceptim truth.—Ps. 76:8-10.

15. Storyim experience wea showimaot hao wei for honest savve mekem pipol laek savve long truth.

¹⁵ Wei wea iumi honest tu savve mekem pipol laek savve long truth. (Readim 2 Corinth 6:4, 7.) Olsem example, wanfala sista hem putim selen insaed long ticket machine long bas, and wanfala woman sei hem shud no peim ticket bikos hem no go farawe nomoa. Datfala sista sei hem stret for peim ticket nomata hem bae go daon long next bas stop nomoa. Bihaen datwan, woman hia go daon from bas. Then nomoa, bas draeva askem datfala sista: “Waswe, iu wanfala Jehovah’s Witness?” Sista hia sei: “Ia, hao nao iu savve?” Bas draeva sei: “Mi herem story bilong iu witim datfala woman abaotem ticket, and mi savve no staka pipol honest, bat iufala Olketa Jehovah’s Witness evritaem peim ticket and honest long evri samting.” Tu-thri month bihaen, wanfala man askem datfala sista long meeting: “Hao, iu luksavve long mi? Mi nao datfala bas draeva wea story witim iu abaotem ticket. From mi lukim iu honest, mi disaed for studyim Bible witim Olketa Jehovah’s Witness.” Taem pipol luksavve iumi honest, olketa trustim tu datfala gud nius wea iumi preach abaotem.

WEI BILONG IU MAS EVRITAEM MEKHAE LONG GOD

16. (a) Wanem nao savve happen taem iumi patient, showimaot love, and kaen? (b) Wanem nao samfala bigman bilong religion duim?

¹⁶ Taem iumi patient, showimaot love, and kaen, maet samfala wea lukim wei bilong iumi laek for lane abaotem Jehovah, plan bilong hem, and pipol bilong hem. Tingting and wei bilong olketa tru Christian hem mekhae long God. Samfala bigman bilong religion act olsem olketa garem gudfala wei and tingting. Bat olketa laea long olketa member bilong church and tekem selen bilong olketa. Samfala iusim datfala selen for peim olketa expensive haos and trak. Wanfala bigman hia hem peim air-con for haos bilong dog bilong hem tu! Olketa no followim komand bilong Christ for “no askem selen for samting wea [olketa] duim.” (Matt. 10:8) Olketa olsem olketa nogud priest long Israel, wea “teach for kasem selen” and teachim olketa laea samting abaotem God. (Mic. 3:11) Hard tumas for olketa bigman hia helpem eniwan for fren witim God.

17, 18. (a) Hao nao gudfala wei bilong iumi savve mekhae long Jehovah? (b) Why nao iu laek for gohed strong for duim olketa gudfala samting?

¹⁷ Taem pipol luksavve iumi teachim olketa tru samting and iumi kaen long nara pipol, datwan savve mekem olketa laek fren witim God. Olsem example, taem wanfala pioneer meetim wanfala olo widow woman long preaching waka, woman hia stretawe sei hem no interest. Hem sei taem brata hia noknok long door, hem antap long ladder for changem laet bulb. Brata hia sei long hem: “Hem danger for iuseleva duim datwan.” So pioneer hia changem datfala laet bulb and hem go long next haos. Taem datfala woman storyim diswan long son bilong hem, hem tinghae and trae for faendem datfala brata for sei thankiu long hem. Gogo, son hia studyim Bible nao.

¹⁸ Why nao iu laek for gohed strong for duim olketa gudfala samting? Maet wanfala reason hem bikos iu savve finis taem iu gohed strong long ministry and garem gudfala wei, bae iu mekhae long Jehovah and helpem olketa narawan for sev. (Readim 1 Corinth 10:31-33.) Nara reason why iumi strong for duim preaching waka and garem gudfala wei hem bikos iumi barava laek for showimaot iumi lovem God and nara pipol. (Matt. 22:37-39) Sapos iumi strong for duim olketa gud samting bae iumi hapi and satisfae distaem. And tu, iumi savve luk forward long taem wea evri man bae hapi for worshipim and mekhae long Creator bilong iumi, Jehovah.