Waswe, Iu Tingim Yet?
Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:
Long wanem wei nao samfala pipol iusim Bible, and wanem nao tingting bilong olketa Christian abaotem diswan?
Samfala pipol bilivim sapos olketa openem Bible long eni page, first verse wea olketa lukim bae talem olketa wanem olketa need for duim. Olketa tru Christian no tingse Bible garem magic paoa. Olketa studyim Bible for kasem stretfala savve and help from God.—12/15, page 3.
Wanem nao “world” wea bae finis?
“World” hem no disfala earth, bat hem minim evri pipol long world wea no duim samting wea God laekem. (1 John 2:17) Earth and pipol wea faithful long God bae no finis.—1/1, page 5-7.
Nomata Abel dae finis, hao nao hem gohed teachim iumi? (Heb. 11:4)
Abel hem firstfala man wea showimaot faith. Iumi savve lane from wei wea hem showimaot faith and followim example bilong hem. So example bilong hem nao gohed teachim iumi kam kasem distaem.—1/1, page 12.
Wanem nao samfala samting wea iumi mas disaed gud long hem mekem iumi no spoelem wei wea iumi fren witim God?
Samfala samting hia nao: Waka for selen, hapitaem, wei for associate witim relative wea disfellowship, wei for iusim technology, health, rong tingting abaotem selen, and wei for tinghae tumas long savve bilong iumiseleva.—1/15, page 12-21.
Wanem nao iumi savve lanem from wei wea Moses hem hambol?
Nomata Moses garem paoa, hem no praod bat hem depend long God and no long savve bilong hemseleva. Iumi mas keakea nogud iumi praod long paoa wea iumi kasem or savve wea iumi garem, bat iumi mas trust long Jehovah. (Prov. 3:5, 6)—2/1, page 5.
Taem Bible sei heart bilong olketa Israelite hem no circumcise, wanem nao datwan minim? (Jer. 9:26)
Olketa bighed and need for aotem samting wea no klin from heart bilong olketa, wea diswan minim olketa mas aotem eni tingting and feeling wea mekem olketa no obeyim God. (Jer. 5:23, 24)—3/15, page 9-10
Hao nao laef bilong Jesus showimaot hem hapi and satisfae?
Hem kam for duim wanem God laekem. Hem lovem tumas Dadi bilong hem and hem lovem pipol. Jesus savve Dadi bilong hem lovem hem and hapi long hem. Olketa samting hia nao savve mekem man hapi and satisfae.—4/1, page 4-5.
Hu nao insaed organization bilong God long earth?
Governing Body, olketa branch komiti, olketa traveling overseer, olketa elder, olketa kongregeson, and olketa pablisa.—4/15, page 29.
Taem God judgem pipol, waswe, datwan showimaot hem no kaen?
Jehovah hem nating hapi taem nogud pipol dae. (Ezek. 33:11) Wei wea God judgem nogud pipol long bifor showimaot hao evritaem God warnim pipol bifor hem duim samting. Diswan givim iumi hope for stap sef long eni judgment bilong God wea bae kamap long future.—7/1, page 5-6.
Waswe, olketa Israelite hangem olketa criminal long post for killim olketa dae?
Nomoa. Olketa nara nation duim datwan bat no olketa Israelite. Bifor Jesus kam long earth, olketa mas killim dae olketa criminal firstaem bifor olketa hangem olketa long post. Maet olketa sutim hem dae witim ston. (Lev. 20:2, 27) Then maet olketa hangem dead body long post wea evriwan savve lukim for warnim olketa.—5/15, page 13.
Why nao world no garem peace?
Nomata olketa man savve tumas hao for duim staka samting, olketa no fit for rulim olketa seleva. (Jer. 10:23) Full world stap anda long paoa bilong Satan, dastawe hard for olketa man mekem peace kamap. (1 John 5:19)—7/1, page 16.