Olketa Barava Willing for Preach—Long Philippines
SAMTING olsem tenfala year go finis, wanfala hasband and waef, Gregorio and Marilou, wea winim 30 year, tufala pioneer long Manila and duim full-taem waka tu. Hem no isi bat tufala duim. Then Marilou kamap manager long bank wea hem waka long hem. Hem sei: “Mitufala garem gudfala waka, so mifala garem gudfala living.” Tufala disaed for buildim haos long wanfala naes area wea stap 19 kilometer east from Manila. Tufala garem kontrak witim wanfala company for buildim datfala haos and tufala agree for peim olketa evri month for tenfala year, and then bae tufala ownim datfala haos.
“MI FEEL OLSEM MI RAVEM JEHOVAH”
Marilou sei: “From mi iusim staka taem and strong long niu position bilong mi long waka, feeling for laekem olketa spiritual samting hem gogo daon. Mi feel olsem mi ravem Jehovah.” Hem sei moa: “Mi no savve spendem nao taem wea mi promisim long Jehovah for duim waka bilong hem.” From Gregorio and Marilou no hapi long datwan, tufala story abaotem wanem tufala duim long laef bilong tufala. Gregorio sei: “Mitufala laek for changem samfala samting bat mifala no savve wanem for duim. From mitufala no garem pikinini, mifala storyim wanem moa mifala savve duim long waka bilong Jehovah. Mitufala prea long Jehovah for helpem mifala long diswan.”
Long datfala taem, olketa herem samfala tok wea mekhae long wei for go long ples wea needim samfala pablisa moa. Gregorio sei: “Hem luk olsem Jehovah iusim olketa tok hia for ansarem prea bilong mifala.” Tufala prea long Jehovah for strongim faith bilong tufala mekem tufala no fraet for disaedem stret samting. Wanfala big problem nao haos bilong olketa no finis yet. Olketa peim datfala company evri month for thrifala year finis. Wanem nao bae tufala duim? Marilou sei: “Sapos mifala finisim datfala kontrak, bae mifala no kasem bak big selen wea mifala peim finis. Mifala mas chus for duim wanem Jehovah laekem or wanem mifala seleva laekem.” Bat from tufala tingim toktok bilong aposol Paul wea sei ‘iumi mas willing for lusim samting,’ tufala finisim datfala kontrak, finis from waka bilong tufala, salem klosap evri samting wea tufala garem, and muv go long wanfala vilij wea farawe long Palawan Island, wea hem samting olsem 480 kilometer south from Manila.—Phil. 3:8.
TUFALA “LANEM SAMTING WEA STAKA MAN NO SAVVE”
Bifor Gregorio and Marilou muv, tufala duim samfala samting for redyim tufala seleva for garem simpol laef. Nomata olsem, taem tufala kasem long there, hem barava difren from wanem tufala tingim. Marilou sei: “Mitufala sapraes. Datfala ples no garem paoa, and no garem olketa samting wea mekem laef hem isi. Mifala no savve iusim rice cooker, bat mifala mas katem firewood and kuki long fire. Mi misstim wei for go long olketa bigfala stoa, kaikai long restaurant, and duim olketa nara samting wea pipol long taon savve duim.” Nomata olsem, tufala no forgetim why tufala muv long there, and gogo tufala getius nao. Marilou sei: “Distaem mi enjoyim wei for lukluk long olketa samting wea Jehovah wakem wea luk naes tumas, olsem olketa star long naet. Winim evri samting, mifala laekem tumas for lukim pipol hapi taem mifala preach long olketa. Taem mifala stap long disfala assignment, mifala ‘lanem samting wea staka man no savve,’ hem nao for satisfae nomoa.”—Phil. 4:12.
“No eni samting winim hapi wea mifala kasem for lukim staka niu wan kam insaed kongregeson. Mifala hapi and satisfae winim eni narataem bifor.”—Gregorio and Marilou
Gregorio sei: “Fofala Witness nomoa long hia taem mifala arrive. Olketa hapi tumas taem mi start for givim pablik tok evri week and ringim guitar taem mifala singim olketa Kingdom song.” Insaed wan year nomoa, tufala lukim datfala smol grup kamap kongregeson wea garem 24 pablisa. Gregorio sei: “Mifala barava tinghae long love wea olketa long kongregeson showim long mitufala.” Tufala tingim sixfala year wea tufala stap finis long disfala assignment and sei: “No eni samting winim hapi wea mifala kasem for lukim staka niu wan kam insaed kongregeson. Mifala hapi and satisfae winim eni narataem bifor.”
“MI ‘TRUSTIM JEHOVAH AND LUKIM WEI WEA HEM GUD TUMAS’!”
Long Philippines, klosap 3,000 brata and sista muv go long ples wea needim samfala pablisa moa. Samting olsem 500 nao olketa singol sista. Wanfala hem Karen.
Karen, wea hem samting olsem 25 year, hem growap long Baggao, long Cagayan. Taem hem teenager, plande taem hem savve ting raonem wei for duim moa samting long ministry. Hem sei: “From mi savve lelebet taem nomoa hem stap and evri difren kaen pipol mas herem gud nius, mi laek for go long ples wea needim samfala pablisa moa.” Nomata samfala long famili bilong hem encouragem hem for garem hae education and no go long eni farawe ples for preach, Karen prea long Jehovah for helpem hem long datwan. Hem story tu witim samfala wea duim diswan finis. Taem hem 18 year, hem muv go long wanfala ples long bush wea hem 64 kilometer from hom bilong hem.
Territory bilong smol kongregeson wea Karen go for helpem olketa garem olketa maunten long saedsea long Pacific Ocean. Karen sei: “For go long datfala niu kongregeson from Baggao, mifala mas wakabaot for thrifala day. Mifala wakabaot ap and daon long olketa maunten and akrosim olketa river winim 30 taem.” Hem sei: “For go long samfala Bible study, mi mas wakabaot for sixfala hour, sleep long haos bilong study long datfala naet, and then wakabaot kam bak for sixfala hour long next day.” Waswe, hem kasem eni gud samting from diswan? Karem smile and sei: “Nomata samfala taem leg bilong mi savve soa, mi garem samting olsem18-fala Bible study. Mi ‘trustim Jehovah and lukim wei wea hem gud tumas’!”—Ps. 34:8.
“MI LANE FOR DEPEND LONG JEHOVAH”
Wanem nao mekem Sukhi, wanfala singol sista wea hem winim 40 year and wea stap long United States, for muv go long Philippines? Long wanfala circuit assembly long 2011, speaker interviewim wanfala hasband and waef wea storyim hao tufala salem klosap evri samting and muv go long Mexico for help long preaching waka. Sukhi sei: “Taem mi herem datfala interview, mi start for ting raonem olketa goal wea mi no garem bifor.” Famili bilong Sukhi from India, so taem hem herem olketa long Philippines needim help for preach long Punjabi pipol wea stap long there, hem disaed for go helpem olketa. Waswe, datwan hem isi samting for duim?
Sukhi sei: “Hem no isi for mi disaedem wanem nao bae mi salem and wanem nao bae mi keepim. Nara samting tu, from mi stap seleva for 13 year and garem evri samting wea mi needim, hem no isi for mi go stap witim samfala famili member for lelebet taem. Bat datwan hem gudfala training for helpem mi garem simpol laef.” Wanem nao samfala hard samting wea hem kasem long Philippines? Hem sei: “Samting wea hard nao mi fraetem olketa insect, and mi misstim hom. Mi lane for depend long Jehovah winim enitaem bifor!” Waswe, hem kasem eni gud samting from diswan? Sukhi smile and sei: “Jehovah sei long iumi, ‘Iufala testim mi, and bae iufala lukim mi barava blessim iufala.’ Distaem mi luksavve disfala toktok hem barava tru taem mi preach and samwan sei, ‘Wanem taem nao bae iu kam bak? Mi garem staka kwestin.’ Taem mi helpem pipol wea laek for lane abaotem Jehovah, datwan mekem mi hapi tumas and satisfae!” (Mal. 3:10) Sukhi sei moa: “Taem mi ting go bak, samting wea barava hard nao hem for mekem datfala disison for muv. Bihaen mi disaed for muv, mi sapraes for lukim hao Jehovah helpem mi long evri nara samting.”
‘WEI WEA MI FRAET NO STOPEM MI’
Sime, wanfala brata wea marit wea distaem hem klosap 40 year, hem lusim Philippines and go long wanfala kantri long Middle East for duim waka wea garem big pei. Taem hem stap long there, hem kasem encouragement from circuit overseer and from tok bilong wanfala member bilong Governing Body for mekem worship bilong Jehovah first samting long laef bilong hem. Sime sei: “Bat taem mi ting for lusim datfala waka mi wari tumas.” Nomata olsem, hem lusim waka bilong hem and go bak long Philippines. Distaem, Sime and waef bilong hem, Haidee, preach long Davao del Sur, long south part bilong Philippines wea needim samfala pablisa moa for duim bigfala territory bilong olketa. Sime sei: “Taem mi ting go bak, mi hapi mi no letem wei wea mi fraet for lusim datfala waka stopem mi for mekem worship bilong Jehovah first samting long laef bilong mi. No eni nara samting long laef mekem man satisfae olsem wei for worshipim Jehovah long full heart!”
“MITUFALA BARAVA HAPI!”
Wanfala hasband and waef wea winim 30 year and wea pioneer hem Ramilo and Juliet. Taem tufala faendaot wanfala kongregeson wea 30 kilometer nomoa from hom bilong olketa needim help, olketa volunteer for help. So evri week, nomata taem hem rain tu, Ramilo and Juliet raedem motorbike for go long olketa meeting and duim preaching witim datfala kongregeson. Nomata hem no isi for gogo long olketa road wea nogud and olketa bridge wea olketa wakem from rope, tufala hapi for duim moa samting long ministry. Ramilo sei: “Mi and waef bilong mi garem 11-fala Bible study! Hem no isi for help long ples wea needim samfala pablisa moa, bat hem mekem mitufala barava hapi!”—1 Cor. 15:58.
Waswe, iu laekem moa information abaotem olketa ples wea needim samfala pablisa moa long kantri bilong iu or nara kantri? Sapos olsem, story witim circuit overseer bilong iu, and readim article, “Waswe, Iu Savve ‘Kam Long Macedonia for Helpem Mifala’?” long August 2011 Kingdom Ministry Bilong Iumi.