Olketa Barava Willing for Preach Long Mexico

IUMI hapi tumas for lukim staka young Witness mekem laef bilong olketa simpol for duim moa samting long ministry bilong olketa. (Matt. 6:22) Wanem nao samfala samting wea olketa changem? Wanem nao samfala hard samting wea olketa feisim? Bae iumi story abaotem samfala wea duim full-taem service long Mexico distaem.

“MIFALA MAS CHANGEM SAMFALA SAMTING”

Dustin and Jassa, wea kam from America, tufala marit long January 2007. No longtaem bihaen, tufala kasem wanfala goal wea olketa garem for longfala taem. Hem nao for peim wanfala sailing boat and for stap long hem olsem haos bilong tufala. Boat bilong olketa anka long harbor klosap long Astoria, Oregon, long America, wanfala taon long saedsea wea barava luk naes. Hem garem olketa maunten witim snow and hem klosap long Pacific Ocean. Dustin sei: “Evriwea iu luk, hem luk naes tumas!” Tufala tingse tufala garem simpol laef and depend long Jehovah. Olketa garem datfala tingting bikos olketa stap long wanfala smol boat, waka part-taem, joinim kongregeson wea iusim difren languis, and samfala taem tufala auxiliary pioneer. Bat gogo, tufala luksavve tufala laea long tufala seleva nomoa. Dustin sei: “Staka taem mifala busy nomoa for fixim boat bilong mifala, and no sapotim kongregeson. Mifala luksavve sapos mifala laekem waka bilong Jehovah hem first samting long laef bilong mifala, mifala mas changem samfala samting.”

Jassa sei: “Bifor mi marit, mi stap long Mexico and mi joinim English languis kongregeson. Mi hapi taem mi stap long there, and mi barava laek for go bak.” For strongim tufala for laek go long nara kantri wea needim samfala pablisa moa, taem Dustin and Jassa duim famili worship tufala readim olketa laef story bilong olketa brata and sista wea muv long nara kantri for helpem pipol wea interest. (John 4:35) Dustin sei: “Mitufala tu laek hapi olsem olketa.” Taem olketa fren long Mexico story abaotem wanfala niu grup wea needim help, Dustin and Jassa disaed for go. Tufala resign from waka, salem sailing boat bilong tufala, and muv long Mexico.

“BEST SAMTING WEA MITUFALA DUIM”

Dustin and Jassa go stap long wanfala taon wea nem bilong hem Tecomán. Hem klosap long Pacific Ocean bat hem samting olsem 4,345 kilometer south from Astoria. Dustin sei: “No eni naes wind blow kam and mifala no lukim nao eni maunten, bat mifala hot tumas, and evriwea hem lemon tree nomoa.” Firstaem tufala no savve faendem waka. From olketa short long selen, olketa kaikaim nomoa rice and bean tufala taem long wanfala day for plande week. Jassa sei: “Taem mifala wiki nao for kaikaim rice and bean, olketa Bible study bilong mifala start for givim mifala olketa mango, banana, and pawpaw, and hem hard for miss nao, olketa full bag lemon tu!” Gogo, tufala duim waka long Internet for wanfala languis skul wea stap long Taiwan. Selen wea tufala kasem from datfala waka hem barava fitim for tufala kasem need bilong tufala.

Hao nao tingting bilong Dustin and Jassa abaotem laef bilong tufala long there? Tufala sei: “Diswan hem best samting wea mitufala duim. Wei wea mitufala fren witim Jehovah and witim each other hem strong winim bifor. Evriday mitufala go long preaching waka tugeta, storyim hao for helpem olketa Bible study, and prepare tugeta for olketa meeting. And tu, mifala no garem olketa hevi wea mifala garem bifor.” Tufala sei moa: “Distaem nao mitufala savve long mining bilong datfala promis long Psalm 34:8, wea sei: ‘Trustim Jehovah mekem iufala savve lukim wei wea hem gud tumas.’”

WHY NAO KLOSAP THRI THOUSAND WILLING FOR DUIM WAKA?

Winim 2,900 brata and sista, wea samfala marit and samfala singol, and wea age bilong olketa 20 go kasem 40 year, olketa muv long olketa difren ples long Mexico wea needim samfala pablisa moa. Why nao olketa willing for feisim samfala hard samting for duim disfala waka? Olketa talem thrifala main reason. Wanem nao olketa reason hia?

For showimaot love for Jehovah and for pipol. Leticia hem baptaes taem hem 18 year. Hem sei: “Taem mi dedicate long Jehovah, mi luksavve diswan minim mi mas worshipim hem long full heart and soul. So for showimaot mi barava lovem Jehovah, mi laek for duim moa samting and spendem moa taem long waka bilong hem.” (Mark 12:30) Hermilo, wea hem maritim Leticia, hem winim 20 year nomoa taem hem muv go long ples wea needim samfala pablisa moa. Hem sei: “Mi luksavve wei for helpem pipol for savve long God hem best wei for showimaot love for pipol.” (Mark 12:31) So hem lusim Monterrey, wanfala rich taon long Mexico wea hem waka long bank and garem gudfala living, and hem muv go long wanfala smol taon.

For kasem trufala hapi for olowe. No longtaem bihaen Leticia hem baptaes, hem go witim wanfala pioneer sista long wanfala smol taon for preach for wan month. Leticia sei: “Mi barava sapraes. Taem mi lukim pipol interest tumas long Kingdom message, datwan mekem mi barava hapi. Long end bilong datfala month, mi savve diswan nao samting mi laek duim long full laef bilong mi!” Essly, wanfala singol sista wea winim 20 year hem lukim olketa wea duim disfala waka olketa barava hapi. Taem hem long secondary skul yet, hem meetim samfala Witness wea barava hapi bikos olketa go long ples wea needim samfala pablisa moa. Hem sei: “Taem mi lukim olketa brata and sista hia hapi, datwan mekem mi laek for duim sem samting.” Staka sista duim sem samting wea Essly duim. Long Mexico, winim 680 singol sista muv go long ples wea needim samfala pablisa moa. Olketa showimaot nambawan example for olketa wea young and olo!

For satisfae and garem gudfala laef. Bihaen Essly finisim secondary skul, hem kasem scholarship for go long university. Olketa nara young wan encouragem hem for acceptim datfala scholarship mekem hem savve garem degree, bigfala waka, car, and savve travel ovasea. Bat hem no duim datwan. Essly sei: “Samfala young wan long kongregeson aftarem olketa samting hia, and mi lukim gogo datwan mekem olketa no tinghae nao long olketa spiritual goal. Mi lukim hao gogo olketa no hapi tu bikos long olketa problem wea olketa kasem from olketa busy long disfala world. Mi laek for iusim young laef bilong mi for duim waka bilong Jehovah.”

Essly tekem samfala course mekem hem savve faendem waka for kasem need bilong hem taem hem pioneer, and then hem muv go long wanfala ples wea needim samfala pablisa moa. And tu, hem lanem languis bilong olketa Otomi and Tlapaneco pipol. Hem ting bak long thrifala year wea hem preach long olketa farawe ples and hem sei: “For duim waka bilong Jehovah long ples wea needim samfala pablisa moa hem mekem mi satisfae and garem gudfala laef. Samting wea moa important, diswan hem mekem mi barava fren gud witim Jehovah.” Phillip and Racquel, wanfala hasband and waef from America wea winim 30 year, garem sem tingting olsem Essly. Tufala sei: “From olketa samting wea happen long world savve change kwiktaem, laef bilong pipol savve change kwiktaem tu. Bat from mifala stap long ples wea staka pipol interest long message bilong Bible, datwan mekem mifala garem gudfala laef. Mifala barava hapi!”

HAO FOR DEAL WITIM OLKETA HARD SAMTING

Hem tru, olketa wea go preach long ples wea needim samfala pablisa moa mas deal witim olketa hard samting tu. Olsem example, maet hem no isi for faendem waka. Man mas willing for acceptim waka wea maet difren from waka wea hem duim bifor. Verónica, wanfala pioneer hem sei: “Long wanfala assignment bilong mi, mi kukim and salem kaikai. Long nara ples, mi salem kaleko and katem hair bilong pipol. Distaem, mi haosgele and tu mi tekem wanfala class for teachim parents for story gud witim pikinini bilong olketa.”

Wei for stap witim olketa native pipol long wanfala farawe ples wea culture and kastom hem barava difren, hem nara hard samting. Datwan nao Phillip and Racquel mas deal witim taem olketa stap long ples wea pipol iusim Nahuatl languis. Philip sei: “Kastom bilong olketa barava difren.” Wanem nao helpem tufala? Philip sei moa: “Mifala tingim evritaem wei bilong olketa Nahuatl pipol hem for fren gud insaed long famili, olketa honest, and olketa kaen tumas.” Racquel sei: “Mifala lanem staka samting taem mifala waka tugeta witim olketa brata and sista for helpem olketa native pipol long there.”

WANEM FOR DUIM FOR REDYIM IUSELEVA

Sapos iu laek for muv go long farawe ples wea needim samfala pablisa moa, wanem nao iu savve duim for redyim iuseleva? Olketa brata and sista wea duim diswan finis sei, bifor iu muv, iu mas mekem laef bilong iu simpol and lane for satisfae. (Phil. 4:11, 12) Wanem moa iu savve duim? Leticia sei: “Mi no acceptim eni kontrak saed long waka for stap longfala taem long wanfala ples. Mi laek free for muv long enitaem and long eni ples wea need hem stap.” Hermilo sei: “Mi lane for kuki, and wasim and ironim olketa kaleko.” Verónica sei: “Taem mi stap long haos witim dadi and mami and olketa brata and sista bilong mi, mi help for duim klining and mi lane for kukim kaikai wea simpol and healthy. Mi lane tu for sevem selen.”

Levi and Amelia wea kam from America and wea marit for eitfala year finis talem wanfala samting wea helpem tufala for redi for muv go long Mexico. Hem nao wei for barava talem stret long Jehovah wanem olketa laekem taem olketa prea. Levi sei: “Mifala wakem budget for luksavve haomas selen mifala bae needim for stap long Mexico for wanfala year. Then mifala askem Jehovah for helpem mifala for kasem datfala selen.” Insaed samfala month nomoa, tufala kasem selen wea tufala talem long prea, and olketa muv nao. Levi sei: “Jehovah barava ansarem prea bilong mitufala, so mifala mas duim nao wanem mifala talem.” Amelia sei tu: “Mifala tingse bae mifala stap long hia for wanfala year nomoa, bat distaem hem sevenfala year finis, and mifala no plan for go bak! Taem mifala stap long hia, mifala barava lukim Jehovah helpem mifala. Evriday mifala lukim hao Jehovah hem kaen tumas.”

Adam and Jennifer from America, preach long pipol long Mexico wea iusim English languis. Tufala tu sei prea hem barava helpem tufala for redi for go long there. Olketa sei: “No tingse evri samting long laef bilong iu mas sete bifor iu go. Prea long Jehovah abaotem plan bilong iu, and then duim samting followim prea bilong iu. Mekem laef bilong iu simpol, raet go long branch office bilong kantri wea iu laek go long hem, and bihaen iu lukluk gud raonem evri samting, iu go nao!”a Sapos iu duim datwan, bae iu garem laef wea interesting and bae iu kasem staka spiritual blessing.