“Brata Bilong Iu Bae Laef Bak”!

1. Wat nao wanfala boy talem abaotem hope blo hem for resurrection?

WANFALA boy wea nem blo hem Matthew kasem staka operation bikos hem garem wanfala big sik. Taem hem seven years old, hem watchim wanfala program lo JW Broadcasting^® witim famili blo hem. Gogo for end blo datfala program, olketa lukim wanfala music video wea showim samfala wea welkamim olketa famili member wea resurrect.b Bihaen olketa watchim program hia, hem go holem hand blo parents blo hem and sei: “Mami and Dadi, iu lukim? Nomata mi dae, bae mi wekap moa lo taem blo resurrection. Iu savve weit for mi, bae mi olraet.” Tingim hao parents hia mas hapi tumas for savve hao son blo tufala garem strong faith lo resurrection hope!

2-3. Why nao hem gud for ting raonem promis blo God abaotem resurrection?

² Samfala taem hem gud for ting raonem promis lo Bible abaotem resurrection lo future. (John 5:28, 29) Why nao olsem? Bikos iumi no savve wat taem maet wanfala big sik kasem iumi or seknomoa iumi lusim samwan wea iumi lovem lo dae. (Eccl. 9:11; Jas. 4:13, 14) Resurrection hope savve helpem iumi for deal witim olketa challenge olsem. (1 Thess. 4:13) Bible helpem iumi for luksavve Dadi blo iumi lo heven savve gud lo iumi and barava lovem iumi. (Luke 12:7) Samting wea showimaot Jehovah barava savve gud lo iumi, hem nao wei wea hem bae givim bak memory and evri wei blo iumi taem hem resurrectim iumi. Jehovah lovem iumi tumas dastawe hem givim iumi chance for kasem laef olowe. And nomata iumi dae, bae hem resurrectim iumi!

³ Lo disfala article, first samting wea iumi bae discussim hem why iumi bilivim promis blo God abaotem resurrection. Then, bae iumi ting raonem wanfala Bible story wea savve strongim faith blo iumi and wea join witim theme text blo iumi wea sei: “Brata bilong iu bae laef bak.” (John 11:23) Last samting, bae iumi storyim hao for strongim faith blo iumi lo resurrection hope.

WHY IUMI FIT FOR BILIVIM PROMIS BLO GOD ABAOTEM RESURRECTION

4. For bilivim wanfala promis, wat nao iumi mas sure lo hem? Storyim example.

⁴ Iumi savve bilivim wanfala promis if iumi sure man wea mekem datfala promis barava laek for duim and garem paoa, or savve, for duim datwan. For example, tingim if wanfala strong wind hem damagem haos blo iu. Then wanfala fren kam lo iu and promis for buildim bak haos blo iu. Hem showimaot hem laek for helpem iu, and iu sure hem laek for duim datwan. Bat if hem savve hao for build and garem olketa tul, iu barava sure bae hem helpem iu. So iu bilivim promis blo hem. Waswe lo promis blo God abaotem resurrection? Waswe, hem barava laek for fulfillim datfala promis and hem garem paoa for duim datwan?

5-6. Why nao iumi sure Jehovah barava laek for resurrectim olketa wea dae?

⁵ Waswe, Jehovah barava laek for resurrectim olketa wea dae? For sure, hem barava laek for duim datwan. Hem iusim samfala man wea raetem Bible for raetem daon promis blo hem abaotem resurrection lo future. (Isa. 26:19; Hos. 13:14; Rev. 20:11-13) Taem Jehovah mekem wanfala promis, hem evritaem kamap tru. (Josh. 23:14) Jehovah barava laek for resurrectim olketa wea dae finis. Hao nao iumi savve lo datwan?

⁶ Tingim toktok blo datfala faithful man Job. Hem sure nomata hem dae Jehovah barava laek for mekem hem laef bak. (Job 14:14, 15) Jehovah garem sem feeling for evriwan wea worshipim hem wea dae finis. Hem barava laek for mekem olketa laef bak and for stap healthy and hapi. Waswe, lo staka billion pipol wea dae finis wea no garem chance for lanem truth abaotem Jehovah? God blo iumi hem laek for resurrectim olketa tu. (Acts 24:15) Hem laekem olketa for garem chance for kamap fren blo hem and laef olowe lo earth. (John 3:16) Tru nao, Jehovah barava laek for resurrectim olketa wea dae.

7-8. Why nao iumi sure Jehovah garem paoa for resurrectim olketa wea dae?

⁷ Waswe, Jehovah garem paoa tu for resurrectim olketa wea dae? Barava nao! Hem nao “Olmaeti God.” (Rev. 1:8) So hem garem bigfala paoa for winim eni enemy, even dae tu. (1 Cor. 15:26) Datwan barava comfortim and strongim iumi. Tingim experience blo Sista Emma Arnold. Lo World War II, Emma and famili kasem olketa bigfala test saed lo faith blo olketa. From samfala wea olketa lovem dae insaed Nazi concentration camp, Emma comfortim dota blo hem and sei olsem: “If man no savve laef bak, datwan minim enemy blo iumi, dae, hem garem paoa winim God, iaman?” Bat no eni samting hem strong winim Jehovah! From olmaeti God nao creatim laef hem isi nomoa for hem givim bak laef lo olketa wea dae.

⁸ Nara reason why iumi savve Jehovah fit for resurrectim olketa wea dae hem bikos memory blo hem no garem limit. Hem savve lo nem blo evri star. (Isa. 40:26) And hem rememberim tu olketa wea dae finis. (Job 14:13; Luke 20:37, 38) Hem isi nomoa for hem rememberim evri smol samting abaotem olketa wea hem bae resurrectim, olsem wei, lukluk, experience, and memory blo olketa.

9. Why nao iu bilivim promis blo Jehovah abaotem resurrection lo future?

⁹ So hem fitim for iumi bilivim promis blo Jehovah abaotem resurrection lo future bikos iumi savve, hem barava laek for duim and hem garem paoa for duim datwan. Tingim nara reason why iumi bilivim promis blo God abaotem resurrection: Hem bikos Jehovah bin duim finis. Bible storyim hao hem givim paoa lo samfala faithful man, and Jesus tu, for resurrectim samfala wea dae. Bae iumi storyim wanfala resurrection wea Jesus duim wea stap lo John chapter 11.

KLOS FREN BLO JESUS DAE

10. Wat nao happen taem Jesus preach lo narasaed lo Jordan, and wat nao hem duim? (John 11:1-3)

¹⁰ Readim John 11:1-3. Tingim samting wea happen lo Bethany klosap lo end blo 32 C.E. Lazarus, Mary, and Martha, wea hem olketa klos fren blo Jesus, olketa stap lo disfala vilij. (Luke 10:38-42) Lazarus hem barava sik. From tufala sista blo hem barava wari, tufala sendem message lo Jesus wea hem lo narasaed lo Jordan. For kasem Jordan, man mas wakabaot tufala day. (John 10:40) Taem Jesus kasem message hia, luk olsem Lazarus hem dae nao. Nomata Jesus savve fren blo hem just dae, hem disaed for stap for tufala day moa, then hem just go lo Bethany. Taem Jesus arrive lo Bethany, Lazarus hem dae for fofala day finis. Jesus ting for duim samting wea bae helpem olketa fren blo hem and for mekhae lo God.​—John 11:4, 6, 11, 17.

11. Wat nao disfala story teachim iumi abaotem friendship?

¹¹ Disfala story teachim iumi wanfala leson abaotem friendship. Tingim: Taem Mary and Martha sendem message lo Jesus, olketa no askem hem for kam lo Bethany. Olketa just sei fren blo hem sik. (John 11:3) Jesus savve resurrectim nomoa Lazarus nomata hem stap farawe. Bat Jesus chus for go lo Bethany for sapotim olketa fren blo hem Mary and Martha. Waswe, iu garem eni fren wea bae helpem iu nomata iu no askem hem? If iu garem fren olsem, iu savve iu fit for depend lo hem for “helpem yu long hadtaem.” (Provebs 17:17, SIPB) Olsem Jesus, iumi laek for helpem olketa fren blo iumi! Distaem bae iumi lukim next samting wea happen insaed disfala story.

12. Wat nao Jesus promisim lo Martha, and why nao Martha fit for bilivim datfala promis? (John 11:23-26)

¹² Readim John 11:23-26. Taem Martha herem Jesus klosap kasem Bethany, hem ran go for meetim hem and sei: “Lord, sapos iu long hia, hard for brata bilong mi dae.” (John 11:21) Hem tru, Jesus savve healim hem, bat Jesus ting for duim wanfala spesol samting. Hem promis olsem: “Brata bilong iu bae laef bak.” Hem talem nara samting tu wea mekem Martha for bilivim promis blo hem. Hem sei: “Mi nao givim laef long pipol and mekem olketa for laef bak moa.” God givim paoa lo Jesus for resurrectim pipol. Hem bin resurrectim wanfala young gele no long taem bihaen hem dae and hem mekem wanfala young man for laef bak, luk olsem lo sem day wea hem dae. (Luke 7:11-15; 8:49-55) Bat waswe, hem fit for resurrectim samwan wea dae for fofala day and wea body blo hem start for rotten finis?

“LAZARUS, IU KAMAOT!”

13. Olsem John 11:32-35 storyim, wat no Jesus duim taem Mary and olketa narawan krae? (Lukim tu piksa.)

¹³ Readim John 11:32-35. Tingim next samting wea happen. Mary, nara sista blo Lazarus, hem go for meetim Jesus and repeatim sem toktok wea Martha talem. Hem sei: “Lord, sapos iu long hia, hard for brata bilong mi dae.” Hem and olketa narawan barava sorre. Taem Jesus lukim and herem olketa krae, hem sorre tumas. From hem tingim and lovem olketa fren blo hem, hem tu krae. Hem minim feeling blo olketa wea lusim samwan wea olketa lovem lo dae. Datwan mekem iumi sure, hem barava laek for finisim dae wea kosim olketa for krae!

14. Wat nao iumi savve lanem abaotem Jehovah from wanem Jesus duim taem Mary krae?

¹⁴ Wanem Jesus duim taem hem lukim Mary krae hem teachim iumi hao Jehovah hem God wea tingim and lovem iumi. Why nao iumi sei olsem? Olsem iumi lanem lo article bifor diswan, Jesus showimaot tingting and feeling blo Dadi blo hem. (John 12:45) Taem iumi read abaotem hao Jesus krae bikos hem tingim and lovem olketa fren blo hem, datwan mekem iumi sure Jehovah tu barava sorre taem hem lukim iumi krae. (Ps. 56:8) Datwan mekem iu laek for fren witim God wea lovem iumi, iaman?

15. Olsem John 11:41-44 storyim, wat nao happen front lo tomb blo Lazarus? (Lukim tu piksa.)

¹⁵ Readim John 11:41-44. Taem Jesus kasem tomb blo Lazarus, hem askem olketa for aotem ston wea satem datfala tomb. Martha sei body blo hem mas smel nao ia. Jesus sei: “Sapos iu biliv, bae iu lukim paoa bilong God.” (John 11:39, 40) Jesus luk ap lo heven and prea front lo evriwan. Hem laekem evriwan for luksavve Jehovah nao duim samting wea redi for happen. Then Jesus singaot olsem: “Lazarus, iu kamaot!” And Lazarus wakabaot kamaot from datfala tomb! Jesus duim samting wea pipol tingse hem hard for happen.​—Lukim study note lo John 11:17.

16. Hao nao story lo John chapter 11 strongim faith blo iumi lo resurrection hope?

¹⁶ Story lo John chapter 11 strongim faith blo iumi lo resurrection hope. Hao nao olsem? Tingim wat Jesus promisim lo Martha: “Brata bilong iu bae laef bak.” (John 11:23) Olsem Dadi blo hem, Jesus laek duim wanem hem promisim and hem garem paoa for duim datwan. Olketa tias blo Jesus showimaot hem laek for finisim dae and sorre wea kamaot from datwan. And taem Lazarus wakabaot kamaot from datfala tomb, datwan pruvim go moa hao Jesus garem paoa for resurrectim pipol. And tingim tu wanem Jesus talem lo Martha: “Sapos iu biliv, bae iu lukim paoa bilong God.” (John 11:40) Iumi garem gud reason for bilivim hao God bae fulfillim promis blo hem abaotem resurrection. Bat wat nao iumi savve duim for strongim faith blo iumi lo resurrection hope?

HAO FOR STRONGIM FAITH BLO IUMI LO RESURRECTION HOPE

17. Wat nao iumi shud tingim taem iumi readim olketa story lo Bible abaotem resurrection?

¹⁷ Read abaotem olketa resurrection lo bifor and ting raonem. Bible storyim eitfala resurrection wea happen lo earth.c Hem gud for studyim each wan lo olketa story hia. Remember, olketa man, woman, and pikinini hia olketa really stap bifor. Trae for lanem samting from olketa story hia. Tingim hao each story showimaot God barava laek for resurrection pipol and hem garem paoa for duim datwan. Barava important resurrection wea iumi need for ting raonem nao, hem resurrection blo Jesus. Remember, staka handred pipol nao witnessim dat Jesus hem laef bak, and datwan hem strong faondeson lo faith blo iumi.​—1 Cor. 15:3-6, 20-22.

18. Wat nao iu savve duim witim olketa song blo iumi wea storyim resurrection? (Lukim tu footnote.)

¹⁸ Lisin, singim, and ting raonem olketa song wea storyim resurrection hope.d (Eph. 5:19) Olketa song hia savve strongim faith blo iumi lo resurrection hope. Lisin lo olketa, practicem, and discussim olketa word lo olketa song hia lo famili worship. Memorizim olketa word and ting raonem for hem strongim faith and kasem heart blo iu. Then if iu feisim eni situation wea maet iu lusim laef, or iu lusim samwan lo dae, spirit blo Jehovah bae helpem iu for rememberim olketa song hia and datwan bae comfortim and barava strongim iu.

19. Wat nao maet iumi savve imaginim abaotem resurrection? (Lukim box “Wat Kaen Kwestin Nao Bae Iu Askem Olketa?”)

¹⁹ Iusim imagination blo iu. Jehovah givim iumi wei for imaginim samting mekem iumi savve tingim go taem iumi lo niu world. Wanfala sista sei: “Mi spendem staka taem for imaginim miseleva lo niu world and hem olsem mi savve smelem olketa rose flaoa lo Paradaes.” Imaginim if iu meetim olketa faithful man and woman wea Bible storyim. Hu nao iu luk forward for meetim? Wanem kwestin nao bae iu askem hem? Imaginim tu, taem iu lukim moa olketa wea iu lovem wea dae finis. Tingim go hao bae iu meetim olketa, first toktok wea iu talem, taem iu hagem olketa, and iu krae from iu hapi tumas.

20. Wat nao iumi laek for gohed duim?

²⁰ Iumi thankiu lo Jehovah for datfala promis blo hem for resurrectim olketa wea dae. Iumi sure disfala promis bae kamap tru bikos Jehovah barava laek for duim and garem paoa for duim datwan. Iumi laek gohed strongim faith blo iumi lo datfala nambawan hope. Taem iumi duim datwan, iumi bae fren gud witim God wea talem disfala promis lo each wan lo iumi, ‘Olketa wea iu lovem bae laef bak!’