Olketa Samting wea Showimaot Jehovah Lovem Iumi
“Dadi hem barava lovem iumi!”—1 JOHN 3:1.
1. Wanem nao aposol John encouragem iumi for tinghae long hem, and why nao olsem?
APOSOL John encouragem iumi for barava tinghae long bigfala love wea Jehovah garem for iumi. Long 1 John 3:1, hem sei: “Dadi hem barava lovem iumi!” Taem iumi ting raonem wei wea Jehovah barava lovem iumi, and hao hem showimaot datfala love long iumi, datwan helpem iumi for barava lovem hem and fren gud witim hem.
2. Wanem nao mekem samfala pipol for tingse God no lovem olketa?
2 Bat samfala pipol sei God no lovem olketa bikos olketa tingse hem no tingim pipol. Maet olketa tingse God mekem nomoa olketa rul and panisim olketa wea no obeyim hem. Samfala pipol wea followim olketa laea teaching tingse God hem raf tumas and no eniwan savve lovem hem. Olketa narawan tingse God lovem evriwan nomata sapos olketa duim nogud samting or gud samting. Nomata olsem, bikos iumi studyim Bible iumi savve long olketa tru samting abaotem Jehovah. Iumi savve love nao hem main fasin bilong hem, dastawe hem givim Son bilong hem for dae for iumi. (John 3:16; 1 John 4:8) Bat from iumi savve kasem samfala hard samting long laef, maet datwan mekem iumi for no luksavve long wei wea Jehovah barava lovem iumi.
3. Wanem nao bae helpem iumi for savve Jehovah hem lovem iumi?
3 For helpem iumi savve Jehovah hem lovem iumi, firstaem iumi mas luksavve Jehovah nao wakem iumi. Hem nao givim laef long iumi. (Readim Psalm 100:3-5.) Dastawe Bible sei firstfala man hem “son bilong God.” (Luke 3:38) And Jesus teachim iumi for kolem Jehovah ‘Dadi bilong iumi long heven.’ (Matt. 6:9) So Jehovah hem Dadi bilong iumi, and hem lovem iumi olsem gudfala dadi wea lovem olketa pikinini bilong hem.
4. (a) Jehovah hem wanem kaen Dadi? (b) Wanem nao bae iumi storyim long disfala study and long nextfala study?
4 Samfala no ting long dadi bilong olketa olsem samwan wea lovem olketa. Maet from olketa tingim wei wea dadi raf long olketa taem olketa smol. Jehovah no savve duim datwan long olketa pikinini bilong hem. Hem Dadi wea barava lovem iumi. (Ps. 27:10) Hem lovem iumi tumas and hem lukaftarem iumi gud and givim iumi evri samting wea iumi needim. Taem iumi ting raonem wei wea Jehovah lovem iumi, datwan mekem iumi for barava lovem hem. (Jas. 4:8) Long disfala study, bae iumi storyim fofala wei wea Jehovah showimaot hem lovem iumi. And long nextfala study, bae iumi storyim fofala wei wea iumi savve showimaot iumi lovem hem.
JEHOVAH SHOWIMAOT LOVE AND HEM KAEN TUMAS
5. Wanem nao God givim long evri man?
5 Taem aposol Paul stap long Athens, long Greece, hem lukim staka idol wea pipol long there worshipim. Olketa ting long olketa idol hia olsem god wea givim laef long olketa. So Paul story long olketa abaotem “God wea wakem world and evri samting insaed.” Hem sei “hem nao mekem olketa man laef and savve brith and hem givim evri samting long olketa,” and “hem nao mekem iumi laef and savve wakabaot and duim samting.” (Acts 17:24, 25, 28) Jehovah givim evri samting wea iumi needim for stap laef and for enjoyim laef. Iumi bae storyim samfala samting wea hem givim long iumi bikos hem lovem iumi.
6. Long wanem wei nao earth hem barava spesol? (Lukim piksa long start bilong study.)
6 Olsem example, Jehovah givim naesfala ples for olketa man stap long hem. (Ps. 115:15, 16) Long evri planet wea God wakem, earth nao hem barava spesol. Olketa scientist wea studyim universe faendem staka planet, bat olketa no faendem eni nara planet wea olsem earth wea garem evri samting wea olketa man needim for stap laef. Jehovah wakem earth no for iumi stap laef nomoa long hem, bat hem mekem earth luk naes, for iumi stap gud, and hem sef ples for iumi enjoyim laef. (Isa. 45:18) Taem iumi ting raonem naesfala earth wea Dadi bilong iumi Jehovah givim long iumi, datwan mekem iumi barava sure Jehovah lovem iumi.—Readim Job 38:4, 7; Psalm 8:3-5.
7. Hao nao wei wea Jehovah wakem iumi showimaot hem barava lovem iumi?
7 Narafala samting wea showimaot Jehovah lovem iumi, hem wei wea Jehovah wakem iumi long wei for showimaot olketa wei bilong hem. (Gen. 1:27) From datwan, iumi savve hem lovem iumi and iumi laek for showimaot iumi lovem hem. Hem savve datwan nao savve mekem iumi hapi. Olketa pikinini savve hapi taem olketa feel savve dadi and mami lovem olketa. And tingim, Jesus teachim iumi hao iumi bae hapi sapos iumi fren gud witim Dadi bilong iumi Jehovah. (Matt. 5:3) Jehovah “givim iumi evri samting for iumi hapi.” Tru nao, Jehovah hem lovem iumi and hem kaen tumas.—1 Tim. 6:17; Ps. 145:16.
JEHOVAH TEACHIM IUMI OLKETA TRU SAMTING
8. Why nao iumi laekem Jehovah for teachim iumi?
8 Olketa dadi lovem pikinini bilong olketa and no laekem eniwan for duim nogud samting long olketa. Bat plande dadi and mami no followim wanem Bible talem saed long wanem hem stret and no stret. From datwan, olketa no teachim stret samting long pikinini bilong olketa, and datwan mekem olketa long famili konfius and no hapi. (Prov. 14:12) Bat Jehovah teachim olketa gud samting long olketa pikinini bilong hem, bikos ‘God hem evritaem talem tru samting.’ (Ps. 31:5) Hem hapi for teachim iumi olketa tru samting abaotem hem and hao nao for iumi worshipim hem. And hem showim iumi wanem iumi savve duim mekem iumi garem gudfala laef. (Readim Psalm 43:3.) So wanem nao Jehovah teachim iumi wea showimaot hem barava lovem iumi?
Olketa Christian dadi followim example bilong Jehovah taem olketa teachim tru samting long pikinini bilong olketa, and helpem olketa for fren gud witim Dadi bilong olketa long heven (Paragraf 8-10 storyim diswan)
9, 10. (a) Why nao Jehovah teachim iumi olketa tru samting abaotem hemseleva? (b) Wanem nao plan bilong Jehovah for iumi olketa man?
9 First samting, Jehovah teachim iumi olketa tru samting abaotem hem. Hem laekem iumi for savve long hem. (Jas. 4:8) Hem talem iumi nem bilong hem. Long Bible, nem bilong God, Jehovah, hem kamap staka taem winim eni nara nem. And tu, Jehovah teachim iumi olketa wei bilong hem. Taem iumi lukim olketa samting wea hem wakem, iumi luksavve hem garem bigfala paoa and hem wise. (Rome 1:20) And taem iumi readim Bible, iumi luksavve hem evritaem duim samting wea stret and hem barava lovem iumi. Taem iumi savve long olketa naesfala wei bilong Jehovah, datwan mekem iumi fren gud witim hem.
10 Jehovah teachim iumi plan bilong hem for olketa man. Hem talem iumi, iumi insaed famili bilong hem. And hem storyim wanem hem laekem iumi for duim mekem iumi savve wan mind and stap gud tugeta insaed famili bilong hem. Bible sei God no wakem iumi for iumiseleva disaedem wanem hem gud and wanem hem nogud. (Jer. 10:23) Jehovah laekem iumi for kasem gud samting long laef. And taem iumi luksavve long datwan and iumi obeyim hem, bae iumi stap gud and iumi hapi. Jehovah teachim iumi disfala tru samting bikos hem lovem iumi.
11. Wanem nao Jehovah promisim for iumi long future?
11 Dadi wea lovem olketa pikinini laekem olketa for kasem gud samting long future. Hem laekem olketa for hapi. Bat staka pipol distaem wari abaotem wanem nao bae happen long future, and olketa aftarem olketa samting wea bae no helpem olketa. (Ps. 90:10) Iumi hapi bikos Dadi bilong iumi Jehovah teachim iumi for garem gudfala laef distaem and hem promisim nambawan laef for iumi long future!
JEHOVAH GIVIM KAONSEL AND STRETEM OLKETA PIKININI BILONG HEM
12. Wanem nao Jehovah duim for helpem Cain and Baruch?
12 Taem Jehovah lukim Cain barava kros long brata bilong hem, Jehovah laek for helpem Cain and hem sei: “Why nao iu barava kros tumas and why nao feis bilong iu change? Sapos iu change and duim gudfala samting, bae mi hapi long iu.” (Gen. 4:6, 7) Cain no laek for followim wanem Jehovah talem and hem kasem nogud samting. (Gen. 4:11-13) Nara taem, Jehovah lukim Baruch hem taed and wikdaon bikos hem garem rong tingting abaotem waka wea hem duim. So Jehovah talem Baruch for changem tingting bilong hem. Baruch followim kaonsel wea Jehovah givim and datwan sevem laef bilong hem.—Jer. 45:2-5.
13. Why nao Jehovah letem olketa wea worshipim hem for kasem hard taem?
13 Jehovah givim kaonsel and stretem iumi bikos hem lovem iumi. Hem stretem iumi long taem wea iumi needim datwan and hem trainim iumi tu. (Heb. 12:6) Insaed long Bible iumi read abaotem samfala wea worshipim Jehovah wea hem trainim olketa for duim gudfala waka. Olsem example, Joseph, Moses, and David kasem olketa hard taem and Jehovah helpem olketa. And hard taem wea olketa kasem trainim olketa for duim bigfala waka wea Jehovah markem olketa for duim. Taem iumi readim insaed long Bible wei wea Jehovah helpem and trainim pipol bilong hem, iumi luksavve Jehovah barava lovem iumi.—Readim Proverbs 3:11, 12.
14. Taem iumi duim samting wea no stret, hao nao Jehovah showimaot hem lovem iumi?
14 Nomata iumi duim samting wea no stret, Jehovah gohed for showimaot hem lovem iumi. Sapos iumi followim wanem Jehovah talem and iumi repent, hem “bae barava forgivim” iumi. (Isa. 55:7) Hao nao Jehovah savve barava forgivim iumi? David storyim wei wea Jehovah forgivim man taem hem sei: “Hem forgivim evri sin bilong iu and hem healim evri sik bilong iu. Hem sevem laef bilong iu from grev, hem showimaot mercy long iu and hem lovem iu. Hem putim olketa sin bilong iumi farawe from iumi, olsem ples wea sun kamap hem farawe from ples wea sun go daon.” (Ps. 103:3, 4, 12) Jehovah kaonselem and stretem iumi long staka difren wei. Waswe, iu kwiktaem for followim kaonsel? Tingim diswan, Jehovah hem stretem iumi bikos hem lovem iumi.—Ps. 30:5.
JEHOVAH PROTECTIM IUMI
15. Wanem nao nara samting wea Jehovah duim wea showimaot hem lovem iumi?
15 Dadi wea lovem famili bilong hem protectim olketa from eni samting wea savve spoelem olketa. Hem nao wanem Dadi bilong iumi Jehovah duim for iumi. Man wea raetem psalm hem sei olsem abaotem Jehovah: “Hem lukaftarem pipol wea faithful long hem and hem no letem rabis pipol for spoelem olketa.” (Ps. 97:10) Olsem example, taem wanfala samting hem flae kam long eye bilong iu, iu savve kwiktaem duim samting for protectim, bikos eye bilong iu hem important samting long iu. Jehovah tu savve kwiktaem duim samting for protectim pipol bilong hem bikos olketa important long hem.—Readim Zechariah 2:8.
16, 17. Hao nao Jehovah protectim pipol bilong hem long bifor and long distaem?
16 Wanfala wei wea Jehovah protectim pipol bilong hem long bifor and long distaem, hem wei wea hem iusim olketa angel for duim datwan. (Ps. 91:11) Long wanfala naet nomoa, wanfala angel hem killim dae 185,000 soldia bilong Assyria and sevem pipol bilong God. (2 Ki. 19:35) Long first century, olketa angel aotem Peter, Paul, and olketa nara aposol from prison. (Acts 5:18-20; 12:6-11) No longtaem go nomoa, war hem kamap long wanfala kantri long Africa. Evri samting hem olobaot long datfala kantri bikos pipol faet, olketa steal, olketa rapem olketa woman, and killim dae pipol. Nomata no eni brata or sista bilong iumi hem dae, staka long olketa lusim evri samting wea olketa garem. Bat olketa savve Jehovah hem lovem olketa and hem lukaftarem olketa gud. Nomata olketa safa tumas, olketa hapi nomoa. Wanfala brata from world hedquarter visitim olketa brata and sista long there. Hem askem hao nao olketa, then olketa sei, “Mifala olraet nomoa, mifala thankiu long Jehovah from hem lukaftarem mifala!”
17 Nomata olsem, samfala wea worshipim Jehovah olsem Stephen and olketa nara disaepol, olketa dae bikos olketa faithful long Jehovah. Samfala taem, Jehovah savve letem kaen samting olsem for happen. Bat hem protectim pipol bilong hem olsem wanfala grup taem hem warnim olketa abaotem olketa samting wea Satan savve iusim for trikim olketa. (Eph. 6:10-12) Iumi kasem olketa warning hia taem iumi readim Bible and olketa pablikeson wea organization bilong Jehovah provaedem. Olsem example, iumi lane abaotem wei for no iusim Internet long rong wei, no laekem tumas selen, no lukim olketa movie or readim olketa buk wea storyim or showim raf fasin and pipol durong, or pleim olketa raf sport. Tru nao, Jehovah lovem iumi and laek for protectim iumi.
NAMBAWAN PRIVILEGE
18. Hao nao tingting bilong iu abaotem wei wea Jehovah hem lovem iu?
18 Taem Moses ting raonem olketa year wea hem faithful for worshipim Jehovah, hem luksavve Jehovah barava lovem hem. Moses sei: “Evri morning iu showimaot iu lovem mifala, mekem mifala savve sing big and hapi evriday.” (Ps. 90:14) Iumi hapi tumas bikos iumi savve Jehovah barava lovem iumi. Wei wea Jehovah lovem iumi hem nambawan privilege! Iumi garem sem feeling olsem aposol John wea sei: “Dadi hem barava lovem iumi!”—1 John 3:1.