Hem ‘Savve Finis Long Road’

GUY HOLLIS PIERCE, wea hem member bilong Governing Body bilong Olketa Jehovah’s Witness, hem finisim waka wea hem duim long earth long Tuesday, March 18, 2014, taem hem 79 year. From hem wanfala brata bilong Christ, hem laef bak and stap witim Christ long heven.—Heb. 2:10-12; 1 Pet. 3:18.

Guy Pierce hem born long Auburn, California, U.S.A., long November 6, 1934, and hem baptaes long 1955. Hem maritim waef bilong hem wea hem lovem tumas, Penny, long 1977, and tufala garem olketa pikinini. Hem kaen and man for tingim olketa narawan. Long 1982, hem and Penny start for pioneer, and long 1986 hem start for duim circuit waka long United States. Hem duim datfala waka for 11-fala year.

Long 1997, Guy and Penny Pierce kamap Bethelite long United States Branch. Brata Pierce waka long Service Department, and long 1998, hem kasem assignment for kamap helper for Personnel Komiti bilong Governing Body. Long October 2, 1999, long annual meeting, olketa announcem Brata Pierce hem kamap member bilong Governing Body. Long olketa year wea go pas, hem waka long Personnel Komiti, Raeting Komiti, Publishing Komiti, and Coordinators’ Komiti.

Brata Pierce savve smile long evriwan and hem man for mekfani. Pipol from staka difren kaen ples and kantri savve laekem hem. Bat olketa main samting wea mekem pipol tinghae long Brata Pierce nao hem wei wea hem hambol, love wea hem showimaot, wei wea hem respectim olketa law bilong God and olketa Bible principle, and strongfala faith bilong hem long Jehovah. Brata Pierce barava trustim olketa promis bilong Jehovah, and hem laekem tumas for helpem olketa narawan tu for trustim Jehovah.

Brata Pierce hem barava waka hard for Jehovah. Hem savve start early long waka and staka taem hem savve waka long naet tu. Hem travel long staka kantri long world for encouragem olketa brata and sista, and hem evritaem willing for spendem taem witim eniwan wea askem advaes and help from hem. Nomata bihaen staka year, plande brata and sista still tingim wei wea hem kaen and welkamim olketa, and wei wea hem iusim Bible for encouragem olketa.

Brata Pierce leavim bihaen waef bilong hem and sixfala pikinini bilong tufala, and tu olketa granpikinini and great granpikinini. Hem garem staka spiritual pikinini tu. Long Saturday, March 22, 2014, Mark Sanderson, wea hem tu member bilong Governing Body, givim tok for rememberim Brata Pierce long Brooklyn Bethel. Wanfala samting wea Mark Sanderson storyim long datfala tok nao hem hope bilong Brata Pierce for go long heven. Hem readim disfala scripture: “Haos bilong Dadi bilong mi garem staka spes. . . . Bihaen mi go redyim ples for iufala, bae mi kam bak moa and tekem iufala go long ples wea mi stap, mekem iufala tu stap long ples wea mi stap. Iufala savve finis long road for kasem ples wea mi bae go long hem.”—John 14:2-4.

Iumi bae barava missim Brata Pierce. Nomata olsem, iumi hapi tumas from hem ‘savve finis long road’ for kasem ples wea hem bae stap long hem for olowe.