WASWE, IU TINGIM YET?

Waswe, iu readim olketa Wastaoa magasin wea iumi kasem no longtaem go nomoa and ting raonem samting wea iu readim? Trae for ansarem olketa kwestin hia:

Wanem nao iumi savve duim evri year for mek redi for Memorial?

Wanfala wei for mek redi nao hem for duim Memorial Bible reading. Narafala wei hem for spendem moa taem long ministry. And tu, iumi savve prea and ting raonem hope wea iumi garem.—1/15, page 15-16.

Wanem nao happen long tufala man long Egypt wea stap long prison wea talem dream bilong tufala long Joseph?

Joseph talem man wea lukaftarem wine bilong Pharaoh hem bae kasem bak waka bilong hem. Bat Joseph talem man wea wakem bred, bae Pharaoh killim hem dae and hangem hem long post. Samting wea Joseph talem hem happen long tufala. (Gen. 40:1-22)—3/1, page 12-14.

Wanem spesol present nao olketa brata and sista long Japan kasem?

Olketa kasem wanfala buk wea garem title Gospel Bilong Bible Buk Matthew, wea kam from New World Translation Bible long Japanese languis. Olketa iusim disfala buk long ministry and givimaot long staka pipol wea no savve long Bible. —2/15, page 3.

Wanem nao samfala samting wea mekem hem isi for olketa Christian long first century for talemaot gud nius?

Datfala Pax Romana mekem olketa kantri wea Rome rulim for garem peace. Olketa Christian savve travel long olketa road wea gavman bilong Rome wakem. Staka pipol long datfala taem savve hao for story long Greek languis wea datwan mekem hem isi for staka pipol herem gud nius, nomata olketa Jew wea stap long olketa farawe ples tu. And olketa Christian savve iusim law bilong Rome for defendim datfala gud nius.—2/15, page 20-22.

Why nao olketa tru Christian no celebratem Easter?

Jesus no talem olketa disaepol for celebratem taem wea hem resurrect bat for tingim dae bilong hem. (Luke 22:19, 20)—3/1, page 8.

Long bifor, staka taem olketa pablikeson bilong iumi sei samfala story long Bible hem piksarem samting, bat distaem olketa no duim datwan tumas. Why nao olsem?

Bible hem storyim samfala man and woman wea piksarem samwan or samting. Wanfala example bilong diswan nao hem long Galatia 4:21-31. Bat iumi shud no sei wanfala story long Bible hem piksarem samting sapos no eni nara scripture long Bible hem sapotim datwan. Nomata olsem, hem gud for iumi tingim wanem iumi savve lanem from olketa story long Bible and from pipol wea Bible story abaotem. (Rome 15:4)—3/15, page 17-18.

Why nao iumi interest long wanfala smol pis papyrus wea olketa faendem long wanfala ples long Egypt for torowem rabis?

Long mek-20 century samfala savveman faendem wanfala smol pis papyrus wea garem toktok wea kam from Gospel bilong John. Luk olsem olketa raetem toktok long disfala papyrus no longtaem bihaen John raetem buk bilong hem, and toktok hia hem semsem witim wanem iumi readim long Gospel bilong John distaem. Diswan showimaot iumi savve trustim wanem Bible talem.—5/1, page 14-15.

Why nao wei for disfellowshipim man wea no repent hem showimaot love?

Bible storyim reason why man mas disfellowship and gud samting wea savve kamaot from datwan. (1 Cor. 5:11-13) Diswan hem mekhae long nem bilong Jehovah, protectim and keepim kongregeson klin, and maet mekem datfala man kasem bak gudfala tingting bilong hem.—4/15, page 29-30.