Talem Thankiu Long Jehovah and Bae Hem Blessim Iu

1. Why nao hem fitim for iumi talem thankiu long Jehovah?

JEHOVAH givim iumi “evri gud and perfect present.” (Jas. 1:17) Hem lovem iumi, hem barava kaen, and givim iumi evri samting wea iumi needim. (Ps. 23:1-3) Hem “sef ples bilong iumi, and hem savve mekem iumi strong,” especially taem eni hard samting kasem iumi! (Ps. 46:1) Tru nao, hem barava fitim for iumi thankiu long Jehovah. Iumi garem sem feeling olsem man wea raetem psalm, wea sei: “Talem thankiu long Jehovah, bikos hem gudfala God. Love wea hem showimaot hem for olowe.”—Ps. 106:1.

2, 3. (a) Why nao hem important for iumi evritaem tinghae long olketa gud samting wea iumi kasem from Jehovah? (b) Wanem nao tufala kwestin wea bae iumi storyim long disfala study?

² Why nao hem important for iumi evritaem tinghae long olketa gud samting wea iumi kasem from Jehovah? Olsem Bible talem, long olketa last day distaem hem wei bilong staka pipol for “no savve tinghae.” (2 Tim. 3:2) Staka pipol no tinghae long olketa gudfala samting wea Jehovah duim for olketa. From world mekhae long olketa material samting and encouragem pipol for baem staka samting wea olketa no needim, staka pipol no satisfae long wanem olketa garem. Olsem olketa Israelite bifor, sapos iumi no keakea maet iumi tu savve garem wei for no tinghae long olketa gud samting wea iumi kasem from Jehovah and wei wea iumi fren witim hem.—Ps. 106:7, 11-13.

³ And tu, tingim wanem savve happen sapos eni hard samting kasem iumi. From iumi wari tumas maet iumi tingim nomoa olketa problem bilong iumi and no tingim nao olketa blessing wea iumi kasem. (Ps. 116:3) Wanem nao savve helpem iumi for gohed tinghae long olketa gud samting wea iumi kasem from Jehovah? Wanem nao savve helpem iumi for garem gudfala tingting taem eni hard samting kasem iumi? Bae iumi storyim olketa samting wea savve helpem iumi.

“JEHOVAH, IU DUIM PLANDE NAMBAWAN SAMTING”

4. Wanem nao savve helpem iumi for gohed tinghae long Jehovah?

⁴ Tufala samting nao savve helpem iumi for gohed tinghae long Jehovah. First samting, iumi mas luksavve long olketa wei wea Jehovah blessim iumi. Mek-tu samting, iumi mas ting raonem wei wea olketa blessing hia showimaot Jehovah hem barava lovem iumi. Taem man wea raetem psalm duim tufala samting hia, datwan helpem hem for tinghae long evri nambawan samting wea Jehovah duim for hem.—Readim Psalm 40:5; 107:43.

5. Wanem example nao aposol Paul showimaot long wei for tinghae long Jehovah?

⁵ Aposol Paul showimaot gudfala example long wei for tinghae long Jehovah. Iumi savve hem ting raonem olketa blessing wea hem kasem bikos taem hem prea hem evritaem talem thankiu long God for olketa blessing hia. Long bifor, Paul hem man for “tok spoelem God, [hem] spoelem pipol bilong hem, and [hem] nating showimaot respect.” Dastawe hem sei hem barava tinghae long wei wea God and Christ showimaot mercy long hem and givim hem privilege for duim preaching waka. (Readim 1 Timothy 1:12-14.) Paul hem tinghae tu long olketa brata and sista long kongregeson, and staka taem hem talem thankiu long Jehovah for gudfala wei bilong olketa and faithful waka bilong olketa. (Phil. 1:3-5, 7; 1 Thess. 1:2, 3) Paul no hol bak for thankiu long Jehovah for wei wea olketa nara Christian helpem hem taem hem kasem hard taem. (Acts 28:15; 2 Cor. 7:5-7) Paul encouragem olketa nara Christian for followim example bilong hem taem hem sei: “Showimaot iufala thankiu long God . . . , encouragem narawan long wei for singim olketa psalm, witim olketa song for praisem God, and olketa naesfala song for worshipim God.”—Col. 3:15-17.

TING RAONEM OLKETA BLESSING AND PREA

6. Wanem nao olketa blessing wea iu kasem from Jehovah wea iu tinghae long hem?

⁶ Hao nao iumi savve followim example bilong Paul? Iumi savve ting raonem olketa samting wea Jehovah duim for iumi. (Ps. 116:12) Tingim sapos samwan askem iu disfala kwestin: “Wanem nao olketa blessing wea iu kasem from Jehovah wea iu tinghae long hem?” Wanem nao bae ansa bilong iu? Waswe, bae iu sei iu tinghae long wei wea iu fren witim Jehovah? Waswe, bae iu sei iu tinghae long wei wea God forgivim olketa sin bilong iu bikos long ransom sakrifaes bilong Jesus? Waswe, bae iu storyim samfala brata and sista wea helpem iu taem iu kasem hard taem? Waswe, bae iu sei iu tinghae long hasband or waef bilong iu, or olketa pikinini bilong iu? Taem iumi ting raonem olketa nambawan blessing wea iumi kasem from Jehovah, datwan bae mekem iumi laek for sei thankiu long hem evriday.—Readim Psalm 92:1, 2.

7. (a) Why nao iumi shud talem thankiu long Jehovah taem iumi prea? (b) Wanem gud samting nao bae iu kasem sapos iu talem thankiu long Jehovah taem iu prea?

⁷ Taem iumi ting raonem olketa blessing wea iumi kasem, datwan bae mekem iumi laek for prea long Jehovah for talem thankiu long hem. (Ps. 95:2; 100:4, 5) Samfala pipol prea long God nomoa taem olketa needim samting. Bat Jehovah hem hapi taem iumi talem thankiu long hem for olketa samting wea hem givim long iumi. Bible storyim staka wea worshipim Jehovah, olsem Hannah and Hezekiah, wea talem thankiu long Jehovah taem olketa prea. (1 Sam. 2:1-10; Isa. 38:9-20) Iumi shud followim example bilong olketa, and thankiu long Jehovah for evri samting wea hem duim for iumi. (1 Thess. 5:17, 18) Wei for duim olsem bae strongim iumi and love wea iumi garem for Jehovah, and bae helpem iumi for gohed fren gud witim hem.—Jas. 4:8.

8. Wanem nao savve mekem iumi no tinghae long evri samting wea Jehovah givim long iumi?

⁸ Sapos iumi no keakea, maet bae iumi start for no tinghae long olketa gud samting wea iumi kasem from Jehovah. Hao nao olsem? From iumi no perfect hem isi tumas for iumi garem wei for no tinghae olsem Adam and Eve. Jehovah givim Adam and Eve naesfala ples for stap insaed and evri samting wea tufala needim. Sapos tufala obey, tufala fit for laef olowe long earth wea garem peace. (Gen. 1:28) Bat tufala no tinghae long olketa blessing wea Jehovah givim long tufala. Tufala greedy and laek for kasem moa samting. Gogo tufala lusim evri samting. (Gen. 3:6, 7, 17-19) From iumi stap long world wea staka pipol no tinghae, sapos iumi no keakea maet iumi tu savve start for no tinghae long evri samting wea Jehovah duim for iumi. Maet iumi no tinghae long wei wea iumi fren gud witim God, or privilege wea iumi garem for stap insaed organization bilong hem. Maet olketa samting long world start for switim iumi. (1 John 2:15-17) For no foldaon insaed long datfala trap, iumi mas ting raonem staka blessing wea iumi kasem and evritaem talem thankiu long God for privilege wea iumi garem for worshipim hem.—Readim Psalm 27:4.

TAEM HARD SAMTING KASEM IUMI

9. Taem hard samting kasem iumi, why nao hem gud for ting raonem olketa blessing wea iumi kasem?

⁹ Wei for tinghae bae helpem iumi for gohed faithful taem barava hard samting kasem iumi. Maet iumi faendem hem barava no isi for deal witim samfala hard samting wea kasem iumi. Olsem example, maet marit partner hem no faithful, iumi kasem bigfala sik, samwan wea iumi lovem hem dae, or natural disaster hem kasem ples wea iumi stap. Sapos iumi ting raonem olketa blessing wea iumi kasem from Jehovah, datwan bae comfortim iumi and strongim iumi for gohed faithful. Distaem bae iumi storyim experience bilong samfala brata and sista wea duim diswan.

10. Hao nao wei wea Irina ting raonem olketa blessing wea hem kasem hem helpem hem?

¹⁰ Irina,a hem wanfala regular pioneer long United States. Hasband bilong Irina wea hem wanfala elder hem duim adultery, and hem lusim hem and olketa pikinini bilong tufala. Wanem nao helpem Irina for gohed faithful long Jehovah? Hem sei: “Mi tinghae long wei wea Jehovah tingim and lukaftarem mi. From mi disaed for ting raonem olketa blessing wea mi kasem evriday, mi luksavve mi garem nambawan privilege for savve long Dadi bilong iumi long heven, and for savve hem lovem and protectim mi. Mi savve bae hem nating lusim mi.” Nomata Irina kasem staka nogud samting long laef bilong hem, wei for garem gudfala tingting helpem hem for gohed faithful, and example bilong hem encouragem olketa narawan.

11. Wanem nao helpem Kyung-sook for deal witim bigfala sik wea kasem hem?

¹¹ Kyung-sook, wea stap long Asia, hem pioneer witim hasband bilong hem for winim 20 year. Wanday hem faendaot hem garem lung cancer, and doctor sei bae hem laef for thri go kasem six month nomoa. Nomata hem and hasband bilong hem kasem olketa difren hard taem bifor, no enitaem tufala garem big sik. Hem sei: “Taem mi faendaot mi garem disfala sik, mi barava wari. Mi sorre fogud and mi barava fraet tu.” Wanem nao helpem Kyung-sook for deal witim datfala hard samting? Hem sei: “Evri naet bifor mi sleep, mi go ap long ruf long haos bilong mifala, and mi prea big and story abaotem faevfala samting wea mi kasem long datfala day wea mi tinghae long hem. Datwan comfortim mi and mekem mi laek for talem Jehovah mi lovem hem.” Long wanem wei nao olketa prea bilong Kyung-sook helpem hem? Hem sei: “Mi savve Jehovah hem strongim iumi for deal witim olketa hard taem, and mi luksavve olketa blessing wea iumi kasem hem staka winim olketa hard samting.”

12. Wanem nao helpem Jason bihaen waef bilong hem dae?

¹² Jason, wea hem waka long wanfala branch office long Africa, hem insaed full-taem service for winim 30 year. Hem sei: “Sevenfala year go finis, waef bilong mi hem dae, and nomata kam kasem distaem mi still feel barava sorre samfala taem. Sapos mi tingim olowe wei wea hem safa taem datfala cancer kasem hem, datwan savve mekem mi feel wikdaon.” Wanem nao helpem Jason for deal witim disfala hard taem? Hem sei: “Wantaem mi tingim wanfala naes samting wea mitufala waef bilong mi duim, and mi prea long Jehovah for talem thankiu long hem for datwan. Datwan comfortim mi and bihaen mi start for talem thankiu long Jehovah for olketa gudfala samting wea mitufala duim. Wei for tinghae olsem hem barava helpem mi for no sorre tumas. Mi still savve sorre samfala taem, bat samting wea helpem mi for garem gudfala tingting nao hem for talem thankiu long Jehovah for gudfala marit bilong mitufala, and privilege wea mi garem for worshipim Hem witim samwan wea barava lovem hem.”

13. Wanem nao helpem Sheryl for deal witim barava hard taem wea kasem hem?

¹³ Long November, 2013, bigfala cyclone Haiyan hem kasem Philippines. Sheryl, wea hem 13 year long datfala taem, hem lusim staka samting. Hem sei: “Haos bilong mifala hem distroe, and staka long famili bilong mi nao dae.” Dadi, mami, wanfala brata, and tufala sista bilong Sheryl nao dae long datfala cyclone. Wanem nao helpem Sheryl for deal witim diswan and no feel kros long samting wea happen? Sheryl tinghae long Jehovah bikos hem ting raonem evri blessing wea hem kasem. Hem sei: “Mi lukim olketa brata and sista duim staka samting for helpem and encouragem olketa wea disaster kasem olketa. Mi savve olketa brata and sista raonem world gohed prea for mi.” Hem sei tu: “Mi hapi tumas from Jehovah nao hem God bilong mi. Evritaem hem givim iumi wanem iumi needim.” Tru tumas, taem iumi tinghae long olketa blessing wea iumi kasem, datwan savve helpem iumi for no letem wei for sorre for barava spoelem iumi. Diswan savve helpem iumi for no givap taem eni hard samting kasem iumi.— Eph. 5:20; readim Philippi 4:6, 7.

“MI BAE HAPI LONG JEHOVAH”

14. Wanem nambawan hope nao iumi garem? (Lukim piksa long start bilong study.)

¹⁴ Long bifor, and distaem tu, pipol bilong Jehovah tinghae long olketa blessing wea olketa kasem from hem. Olsem example, bihaen Jehovah sevem olketa Israelite from Pharaoh and army bilong hem long Red Sea, olketa barava hapi and singsing for praisem and talem thankiu long Jehovah. (Ex. 15:1-21) Long distaem, wanfala samting wea mekem iumi barava hapi nao hem from iumi savve Jehovah bae finisim evri samting wea mekem iumi safa. (Ps. 37:9-11; Isa. 25:8; 33:24) Tingim hao iumi bae feel taem Jehovah hem finisim evri enemy bilong hem, and iumi stap insaed niu world wea garem peace and evriwan bae raeteous. Bae iumi barava talem thankiu long Jehovah taem datwan happen!—Rev. 20:1-3; 21:3, 4.

15. Wanem nao hem gud for iumi duim long 2015?

¹⁵ Long 2015, bae iumi kasem staka spiritual blessing from Jehovah. Maet bae iumi kasem samfala hard taem tu. Nomata wanem nao maet happen, iumi savve Jehovah bae nating lusim iumi. (Deut. 31:8; Ps. 9:9, 10) Hem bae givim iumi evri samting wea iumi needim for gohed faithful for worshipim hem. So iumi laek for garem sem tingting olsem profet Habakkuk, wea sei: “Nomata fig tree hem no garem flaoa, and olketa grape tree no garem frut, and nomata olketa olive tree no garem frut, and no eni kaikai grow long olketa garden, and nomata no eni sheepsheep or buluka stap insaed long olketa fence, bat mi bae hapi long Jehovah. Mi bae hapi long God wea sevem mi.” (Hab. 3:17, 18) Tru nao, long disfala year, iumi laek for gohed ting raonem olketa blessing wea iumi kasem from Jehovah and duim wanem disfala yeartext for 2015 hem talem, wea sei: “Talem thankiu long Jehovah, bikos hem gudfala God.”—Ps. 106:1.