Olketa Barava Willing for Volunteer Long New York

TU-THRI year go finis, Cesar and waef bilong hem, Rocio, tufala stap long California, and garem evri samting tufala needim. Cesar hem waka full-taem. Hem duim plumbing and air-conditioning waka. Rocio waka part-taem long office bilong wanfala doctor. Tufala garem haos bilong tufala seleva, and no garem eni pikinini. Bat wanfala samting happen long laef bilong tufala. Wanem nao happen?

Long October 2009, United States branch sendem wanfala leta long evri kongregeson long America for invaetem olketa wea garem savve saed long construction for apply for kamap temporary Bethelite. Diswan hem for extendim olketa branch building long Wallkill, New York. Olketa wea age bilong olketa winim 35 year tu savve apply for disfala waka. Cesar and Rocio sei: “Bikos long age bilong mitufala, mitufala savve maet mitufala bae no garem eni nara chance for waka long Bethel. Mitufala barava no laek for misstim disfala chance!” So stretawe tufala givim go application bilong tufala.

Bat bihaen wanfala year, Cesar and Rocio no kasem invitation yet for go long Bethel. Nomata olsem, tufala waka hard for mekem laef bilong tufala simpol bikos tufala laek for kasem datfala goal. Cesar sei: “Mitufala wakem smol rum for mitufala stap insaed, long ples wea mifala savve putim trak, mekem mifala savve putim haos bilong mifala for rent. Then mitufala muv aot from datfala haos wea hem 200 square meter wea mifala just wakem, and muv long datfala smol rum wea hem 25 square meter nomoa. From mitufala mekem laef hem simpol olsem, mitufala redi for go long Bethel sapos olketa invaetem mitufala.” Then wanem nao happen? Rocio sei: “Wanfala month bihaen mitufala muv long datfala smol rum, mitufala kasem invitation for kamap temporary Bethelite long Wallkill. Mitufala luksavve, from mitufala duim samting for mekem laef hem simpol, Jehovah hem blessim datwan.”

JEHOVAH BLESSIM OLKETA WEA WILLING

Staka brata and sista duim sem samting olsem Cesar and Rocio, mekem olketa fit for joinim construction waka wea gohed long New York State. Samfala long olketa help for extendim olketa branch building long Wallkill, and olketa narawan garem privilege for buildim world hedquarter long Warwick.a Staka hasband and waef salem naes haos, finis from gudfala waka, and leavim bihaen olketa nara samting, mekem olketa savve duim samfala samting moa long waka bilong Jehovah. Waswe, Jehovah blessim olketa? Barava nao!

Olsem example, Way, wanfala electrician, and Debra, wea tufala winim 50 year, tufala stap long Kansas. Tufala salem haos and staka nara samting bilong tufala, and muv go klosap long Wallkill and kamap Bethel commuter for help witim construction waka long there.b Nomata tufala mas changem staka samting long laef, bat tufala barava hapi for duim datwan. Debra sei olsem abaotem assignment bilong hem long Bethel: “Samfala taem mi feel olsem mi wanfala wea insaed olketa piksa long olketa pablikeson bilong iumi abaotem construction waka long Paradaes.”

Melvin and Sharon stap long South Carolina. Tufala salem haos and staka nara samting bilong tufala, mekem olketa savve help long Warwick. Nomata hem no isi for duim olketa samting hia, tufala sei hem nambawan privilege for help long disfala important waka. Tufala sei: “Mitufala barava hapi for duim disfala waka wea sapotim organization bilong Jehovah evriwea long world.”

Kenneth, wea hem wanfala builder wea retire finis, and Maureen, wea tufala winim 50 year, tufala lusim California for go waka long Warwick. Tufala askem wanfala sista long kongregeson for lukaftarem haos bilong tufala, and askem famili bilong tufala for lukaftarem dadi bilong Kenneth wea olo. Waswe, tufala sorre from tufala duim evri samting hia mekem tufala savve go waka long Bethel? Nomoa! Kenneth sei: “Mitufala kasem staka gud samting. Waswe, diswan minim waka long Bethel hem isi? Nomoa, bat mitufala hapi and satisfae, and mitufala encouragem olketa narawan tu for duim disfala waka.”

SAMTING WEA SAVVE STOPEM OLKETA FOR NO GO

Staka wea go waka long construction mas deal witim samfala samting wea savve stopem olketa for no go. Olsem example, William and Sandra, wea winim 60 year, tufala garem gudfala laef long Pennsylvania. Tufala garem wanfala bisnis wea gohed gud, and 17-fala pipol nao waka for tufala. Tufala stap long sem kongregeson wea tufala smol long hem, and staka relative bilong tufala stap long sem area tu. So taem chance hem kamap for tufala go waka long Wallkill, tufala savve tufala mas leavim bihaen evri samting hia. William sei: “Main samting wea barava hard long mifala nao hem for lusim evri samting wea mifala getius long hem.” Bat bihaen tufala prea abaotem diswan plande taem, tufala disaed for muv go long Wallkill. And tufala nating sorre from tufala duim datwan. William sei: “Hem nambawan privilege for waka witim Bethel famili. Mitufala Sandra hapi winim eni narataem!”

Ricky, wea hem project manager bilong wanfala construction company long Hawaii, hem kasem invitation for kamap Bethel commuter long construction project long Warwick. Waef bilong hem Kendra laekem olketa for go. Bat tufala tingim boy bilong tufala Jacob wea hem 11 year. Tufala no sure sapos hem wise samting for full famili muv go long New York State, and sapos son bilong tufala bae hapi for stap long datfala ples.

Ricky sei: “Wanfala main samting wea mifala tingim nao hem for faendem kongregeson wea garem olketa young wan wea gohed gud long spiritual wei. Mifala laekem Jacob for garem olketa gudfala fren.” Bat gogo kongregeson wea olketa muv long hem garem tu-thri young wan nomoa. Nomata olsem, samfala Bethelite nao go long datfala kongregeson. Ricky sei: “Bihaen firstfala meeting, mi luksavve no eni young wan wea sem age witim Jacob stap long datfala niu kongregeson, so mi askem Jacob tingting bilong hem abaotem datfala kongregeson. Jacob sei long mi, ‘No wari, Dadi. Bae mi fren witim olketa young brata long Bethel.’”

And hem nao samting wea happen. Jacob fren gud witim olketa young brata long Bethel. Wanem gud samting nao kamaot from diswan? Ricky sei: “Wanfala naet mi go pasim rum bilong son bilong mi and lukim laet bilong hem on yet. Mi tingse hem pleim computer game batawea hem readim Bible bilong hem! Taem mi askem Jacob wanem nao hem duim, hem sei, ‘Mi wanfala Bethelite tu, and bae mi readim full Bible insaed wanfala year.’” Ricky and Kendra barava hapi, no bikos Ricky hem joinim construction nomoa bat bikos son bilong tufala hem gohed gud long spiritual wei tu.—Prov. 22:6.

NO WARIM WANEM BAE HAPPEN BIHAEN CONSTRUCTION

Gogo olketa construction project long Wallkill and Warwick bae hem finis, so olketa wea kam for volunteer savve datfala assignment bae no gohed for olowe. Waswe, olketa brata and sista hia warim wanem nao bae happen long olketa bihaen construction hem finis? Nomoa nao! Staka garem sem tingting olsem fofala hia from Florida, wea winim 50 year. John, wea hem wanfala construction manager, and waef bilong hem, Carmen, wea tufala volunteer long Warwick, sei: “Kam kasem distaem mifala lukim Jehovah hem lukaftarem mifala gud tumas. Mifala sure Jehovah bae no lusim mifala bihaen disfala project hem finis.” (Ps. 119:116) Luis, wea designim olketa fire sprinkler system, and waef bilong hem, Quenia, volunteer long Wallkill. Tufala sei: “Mitufala lukim finis wei wea Jehovah provaedem evri samting wea mifala needim long physical wei. Nomata mifala no savve wanem Jehovah bae duim long future, mifala sure hem bae gohed for lukaftarem mifala.”—Ps. 34:10; 37:25.

IU BAE KASEM “BIGFALA BLESSING”

Staka wea volunteer long construction waka long New York State maet savve faendem olketa reason for no go. Nomata olsem, olketa duim samting wea Jehovah talem iumi evriwan for duim. Hem sei: “Plis iufala traem duim samting wea mi talem long iufala, and bae iufala lukim mi kapsaetem barava bigfala blessing from heven long iufala. Iufala bae no short long eni samting.”—Mal. 3:10.

Waswe, iu tu bae traem duim samting wea Jehovah talem mekem iu kasem bigfala blessing from hem? Prea long Jehovah abaotem diswan and ting raonem wanem iu savve duim for volunteer long eni construction waka, maet long New York, or long eni nara ples, and lukim wei wea Jehovah bae blessim iu.—Mark 10:29, 30.

Dale, wanfala civil engineer, and Cathy, from Alabama, encouragem olketa narawan for duim disfala waka tu. Tufala volunteer long Wallkill, and sei: “Sapos iu willing for traem niu samting, bae iu lukim hao Jehovah hem blessim iu.” And wanem nao bae helpem iu for duim datwan? Dale sei: “Waka hard for mekem laef bilong iu simpol. Bae iu nating sorre from iu duim datwan!” Gary, from North Carolina, hem wanfala construction manager for 30 year. Hem and waef bilong hem Maureen sei wanfala long olketa blessing wea tufala kasem long Warwick hem nao for “meetim and waka witim staka brata and sista wea waka long Bethel for longtaem finis.” Gary sei tu: “For waka long Bethel iu mas garem simpol laef, and datwan nao hem best laef for garem long olketa last day distaem.” Jason, wanfala electrician, and Jennifer, from Illinois, sei taem tufala waka long Bethel long Wallkill hem “olsem olketa stap long niu world nao.” Jennifer sei tu: “Mitufala hapi tumas from mifala savve Jehovah hem tinghae long evri samting wea mifala duim and bae hem no forgetim waka bilong mifala. Jehovah hem God wea evritaem blessim pipol bilong hem.”