Waswe, hem fitim for olketa Christian celebratem Easter?

Long Encyclopædia Britannica hem sei Easter hem “main celebration wea olketa Christian duim for rememberim taem wea Jesus Christ hem resurrect.” Bat waswe, hem fitim for olketa Christian celebratem Easter?

For mek sure samting hem stret, hem important for savve long olketa samting abaotem datwan. Long sem wei tu, for iumi savve sapos hem fitim olketa Christian for celebratem Easter, hem important for savve long olketa samting abaotem Easter.

First samting, Jesus no talem olketa disaepol for celebratem taem wea hem resurrect bat for tingim dae bilong hem. Aposol Paul kolem datwan, “evening kaikai bilong Lord.”—1 Corinth 11:20 footnote; Luke 22:19, 20.

Nara samting, disfala buk Britannica storyim hao staka samting wea pipol duim long taem bilong Easter hem “no join witim” resurrection bilong Jesus, “bat hem followim olketa kastom bilong man.” Olsem example, long staka kantri olketa iusim olketa rabbit and egg for celebratem Easter. The Encyclopedia of Religion hem sei: “Egg hem piksarem niu laef wea kamaot from shell bilong egg.” Datfala buk sei tu: “Rabbit hem savve garem staka pikinini dastawe hem piksarem spring [taem wea olketa plant start for grow].”

Philippe Walter, wanfala savveman, explainim hao gogo olketa samting hia join witim Easter. Hem sei “taem olketa laekem olketa heathen for kamap olketa Christian,” olketa joinim wei wea Jesus hem resurrect witim wanfala heathen celebration wea olketa celebratem “taem cold season hem finis and spring season hem start.” Philippe sei tu taem olketa joinim “olketa Christian celebration” witim date bilong olketa heathen celebration, datwan hem mekem plande heathen laek for kamap Christian.

Datwan no happen long taem bilong olketa aposol bikos olketa aposol “stopem” kastom biliv for no kam insaed Christian kongregeson. (2 Thessalonica 2:7) Aposol Paul talem olketa Christian bihaen hem ‘lusim olketa samfala bae talem olketa samting wea no stret for mekem olketa disaepol followim olketa.’ (Acts 20:29, 30) Long end bilong first century, aposol John sei samfala man trae for trikim olketa Christian. (1 John 2:18, 26) Gogo olketa kastom biliv start for kam insaed long Christian kongregeson.

Samfala sei wei for joinim olketa heathen kastom witim Easter hem stret nomoa bikos datwan bae helpem olketa heathen for minim gud resurrection bilong Jesus. Bat Paul bae no agree long datwan. Taem Paul go long olketa kantri wea Rome rulim, hard for hem followim eni heathen kastom bilong olketa for mekem olketa savve long Jesus. Bat hem warnim olketa Christian taem hem sei: “Iufala mas no join witim olketa wea no biliv. Hem hard tumas for samting wea raeteous hem join witim samting wea no stret, or for laet hem stap tugeta witim darkness. Jehovah hem sei: ‘So iufala mas go aot from olketa and no stap witim olketa moa. No tasim samting wea no klin.’”—2 Corinth 6:14, 17.

So from iumi lanem staka samting abaotem Easter, waswe, hem fitim for olketa Christian celebratem Easter? Hem barava klia, hem no stret for olketa Christian celebratem Easter.