Wat Nao Bible Talem Abaotem Easter?

Ansa from Bible

Easter celebration hem no base lo Bible. If iu lukluk gud lo history blo celebration hia, bae iu faendaot wea nao Easter hem really kam from—hem wanfala tradition wea pipol bifor followim mekem olketa savve garem staka pikinini. Tingim olketa samting hia.

1. Nem: Buk Encyclopædia Britannica sei: “Datfala English nem Easter, iumi no really savve wea nao hem kam from. Anglo-Saxon priest wea nem blo hem, Venerable Bede, lo 8th century hem tekem nem hia from Anglo-Saxon woman god blo spring wea nem blo hem Eostre.” Olketa nara buk sei datfala nem olketa tekem from Astarte, wea hem Phoenician woman fertility god, wea sem woman god hia olketa lo Babylon kolem hem lo Ishtar.

2. Olketa hare, and olketa rabbit: Tufala hia symbol blo fertility “wea pipol iusim bifor lo olketa ceremony blo olketa, and tufala symbol blo olketa European and Middle Eastern pagan spring festival.”​—Encyclopædia Britannica.

3. Olketa egg: Followim wat Funk & Wagnalls Standard Dictionary of Folklore, Mythology and Legend talem, wei for haedem and lukaotem olketa Easter egg, wea olketa sei Easter rabbit nao tekem kam, “hem no game for olketa pikinini nomoa, bat hem connect lo wanfala fertility tradition.” Pipol lo olketa nara kantri bilivim dat wei for decoratem olketa Easter egg “hem magic samting wea savve mekem man hapi, rich, healthy, and kasem protection.”—Traditional Festivals.

4. Niu Easter kaleko: “Pipol ting dat if samwan no werem niu kaleko taem hem greetim Scandinavian woman god blo Spring, wea nem blo hem Eastre, datwan no showim respect and bae olketa kasem bad luck.”—The Giant Book of Superstitions.

5. Olketa service lo taem blo sunrise: Pipol sei olketa service hia hem connect witim olketa sun worshiper bifor wea olketa savve duim diswan for welkamim sun, and big paoa blo hem for givim niu laef lo evriting wea grow. Olketa savve duim olketa service hia lo taem lo year wea olketa kolem lo vernal equinox.”—Celebrations—The Complete Book of American Holidays.

The American Book of Days hem describem gud origin blo Easter. Hem sei: “No eni daot stap dat Church lo bifor hem acceptim olketa old pagan kastom and followim lo religion blo olketa.”

Bible givim warning againstim wei for followim olketa tradition and kastom wea God no hapi lo hem taem iumi worshipim hem. (Mark 7:6-8) Second Corinthians 6:17 sei: “‘Separatem iufala seleva from olketa,’ diswan nao wanem Jehovah talem, ‘and stop for tasim olketa samting wea no klin.’” Easter hem wanfala pagan holiday wea eniwan wea laek for mekem God hapi bae avoidim.