“Hem Nao Wanem Iu Laekem”

1. Wanem nao mekem Jesus hapi tumas? (Lukim piksa long start bilong study.)

TINGIM samting wea happen. “God givim holy spirit long Jesus and datwan mekem hem hapi tumas.” Masbi hem smile big and barava luk hapi. Wanem nao mekem Jesus for hapi olsem? No longtaem go nomoa, hem sendem 70 disaepol bilong hem for preachim gud nius abaotem Kingdom bilong God. Hem barava laek for savve wanem nao happen taem olketa duim datfala waka, bikos staka bigman long religion and olketa man wea teachim law barava no laekem datfala gud nius. Olketa bigman hia wea garem bigfala savve mekem pipol for ting daonem Jesus olsem wanfala carpenter nomoa, and olketa disaepol olsem olketa man wea “no skul gud.” (Acts 4:13; Mark 6:3) Nomata olsem, olketa disaepol barava hapi taem olketa kam bak. Olketa preach nomata pipol and olketa demon tu againstim olketa! Wanem nao mekem olketa for hapi olsem and no fraet?—Readim Luke 10:1, 17-21.

2. (a) Why nao Jesus sei olketa disaepol olsem olketa smol pikinini? (b) Wanem nao helpem olketa disaepol for minim olketa deep spiritual samting long Bible?

² Jesus sei long Jehovah: “Mi praisem iu Dadi, wea iu nao rulim heven and earth, bikos iu haedem olketa samting hia from olketa wea wise and skul gud and iu showimaot long olketa wea hambol olsem olketa smol pikinini. Hem tru ia Dadi, iu duim olsem bikos hem nao wanem iu laekem.” (Matt. 11:25, 26) Why nao Jesus sei olketa disaepol bilong hem olsem smol pikinini? Bikos olketa disaepol willing for lane olsem olketa smol pikinini, and datwan mekem olketa hambol and no praod. Olketa no olsem olketa Pharisee and olketa wea teachim law wea skul gud and tingse olketa wise. (Matt. 18:1-4) From olketa disaepol hambol, Jehovah iusim holy spirit for helpem olketa minim olketa deep spiritual samting long Bible. Bat olketa bigman bilong Jew religion wea ting daonem olketa disaepol no garem disfala savve bikos Satan blindim olketa and olketa praod.

3. Wanem nao bae iumi storyim long disfala study?

³ Jesus hem hapi tumas for lukim wei wea Jehovah helpem pipol wea hambol for minim olketa deep spiritual samting long Bible nomata olketa skul gud or nomoa. Kam kasem distaem, Jehovah hem no change. Wanem nao showimaot Jehovah still laek for teachim pipol long wei olsem? Long disfala study bae iumi storyim wanem Jehovah duim distaem for teachim olketa deep spiritual samting long pipol wea hambol.

EXPLAINIM OLKETA DEEP SPIRITUAL SAMTING

4. Hao nao simplified Watchtower magasin hem olsem wanfala spesol present?

⁴ Long olketa year wea go pas, organization bilong God mekhae long wei for teachim pipol long wei wea hem klia and isi for minim. Iumi bae storyim thrifala example. Firstfala example hem datfala simplified Watchtower magasin.a Disfala magasin hem olsem wanfala spesol present. Hem helpem olketa wea no savve read gud or wea faendem hem hard for minim gud wanfala languis. Olketa famili hed lukim taem olketa pikinini iusim datfala magasin, olketa barava minim gud. Staka raetem leta long Governing Body for talemaot olketa tinghae long diswan. Wanfala sista sei, bifor, hem savve fraet for givim koment long Wastaoa Study, bat distaem hem no fraet nao! Hem iusim simplified Watchtower magasin and hem sei: “Distaem mi nating fraet and mi savve givim tu-thri koment! Mi thankiu long Jehovah and long iufala.”

5. Wanem nao samfala gud samting abaotem revised English New World Translation of the Holy Scriptures?

⁵ Mek-tu example, long annual meeting wea kamap long October 5, 2013, olketa releasem revised English New World Translation of the Holy Scriptures.b Staka scripture insaed disfala Bible no garem staka word olsem bifor bat mining hem semsem and hem klia tu. Olsem example, long firstaem Job 10:1 garem 27-fala word bat distaem hem garem 19-fala word nomoa. Long firstaem Proverbs 8:6 garem 20-fala word bat distaem hem garem 13-fala word nomoa. Distaem tufala verse hia hem barava klia. Wanfala anointed brata wea faithful for staka year hem sei: “Mi just readim finis buk bilong Job long disfala revised Bible, and distaem nao mi minim gud winim bifor!” Staka brata and sista tu talem semkaen toktok.

6. Hao nao tingting bilong iu abaotem wei wea mining bilong Matthew 24:45-47 hem kamap klia winim bifor?

⁶ Mek-thri example, tingim samfala change wea kamap no longtaem go nomoa saed long wei wea iumi minim samfala scripture. Olsem example, Wastaoa bilong July 15, 2013, hem explainim klia hu nao “datfala wakaman wea faithful and wise.” (Matt. 24:45-47) Datfala article sei datfala wakaman wea faithful hem nao Governing Body. And “olketa nara wakaman” nao hem olketa anointed wan and “olketa nara sheepsheep” wea kasem spiritual kaikai from datfala wakaman wea faithful. (John 10:16) Iumi hapi for lanem olketa tru teaching hia and for teachim tu long nara pipol! Wanem nao olketa nara samting wea showimaot Jehovah laekem kaen wei olsem for teach wea klia and isi for minim?

EXPLAINIM OLKETA STORY LONG BIBLE LONG WEI WEA KLIA AND ISI FOR MINIM

7, 8. Wanem nao samfala story long Bible wea piksarem samting?

⁷ Sapos iu insaed truth for staka year finis, maet iu luksavve wei wea olketa pablikeson bilong iumi explainim samfala story long Bible distaem hem difren from wei wea olketa explainim bifor. Long bifor, staka taem olketa sei samfala story long Bible hem piksarem samting. Waswe, Bible sapotim diskaen wei for explainim olketa story long Bible? Yes. Olsem example, Jesus story abaotem “mirakol wea happen long profet Jonah.” (Readim Matthew 12:39, 40.) Jesus sei thrifala day and thrifala naet wea Jonah stap long bele bilong fish hem piksarem haomas day hem bae stap insaed long grev.

⁸ Olketa nara story long Bible tu hem piksarem samting. Aposol Paul storyim samfala long olketa story hia. Olsem example, hem sei wei wea Abraham deal witim Hagar and Sarah hem piksarem wei wea Jehovah deal witim nation bilong Israel and organization bilong God long heven. (Gal. 4:22-26) Paul sei tu datfala tabernacle and temple, Atonement Day, hae priest, and olketa nara samting wea Law storyim hem “shadow nomoa bilong olketa gudfala samting” wea bae kam. (Heb. 9:23-25; 10:1) Taem iumi studyim olketa story hia and wanem olketa piksarem, hem barava strongim faith bilong iumi. Bat waswe, diswan minim evriwan wea Bible storyim, evri samting wea happen, and evri samting wea Bible story abaotem piksarem samwan or samting?

9. Long bifor, hao nao olketa pablikeson bilong iumi explainim mining bilong story bilong Naboth?

⁹ Long bifor, hem nao hao olketa pablikeson bilong iumi explainim olketa story long Bible. Olsem example, tingim datfala story abaotem Naboth, wea nogud Queen Jezebel givim order for killim hem dae. Jezebel duim datwan mekem hasband bilong hem, Ahab, savve tekem planteison bilong Naboth. (1 Ki. 21:1-16) Long 1932, The Watchtower hem sei Ahab and Jezebel piksarem Satan and organization bilong hem, Naboth hem piksarem Jesus, and dae bilong Naboth hem piksarem dae bilong Jesus. Bat long 1961, datfala buk “Let Your Name Be Sanctified,” sei Naboth hem piksarem olketa anointed Christian, and Jezebel hem piksarem olketa religion wea sei olketa Christian. And tu, wei wea Naboth kasem persecution hem piksarem wei wea olketa anointed wan kasem persecution long olketa last day. Wei wea olketa pablikeson bilong iumi explainim olketa story hia hem strongim faith bilong pipol bilong God for staka year. So why nao wei wea olketa pablikeson bilong iumi explainim olketa story long Bible hem difren distaem?

10. (a) Hao nao datfala wakaman wea faithful hem careful long hao hem explainim samfala story long Bible distaem? (b) Distaem wanem nao main samting wea olketa pablikeson bilong iumi mekhae long hem?

¹⁰ Kam kasem distaem, Jehovah helpem “datfala wakaman wea faithful and wise” for kamap moa wise. Datwan mekem wakaman hia barava careful long hao hem explainim olketa story long Bible. So distaem datfala wakaman bae sei wanfala story long Bible hem piksarem samting only sapos olketa narafala scripture sapotim datwan. Long bifor, taem datfala wakaman explainim samfala story long Bible wea piksarem samting, hem no isi for minim, rememberim, or for followim datwan. And staka taem, wanem iumi savve lanem from olketa story hia hem no klia tu. So distaem, taem olketa pablikeson bilong iumi explainim olketa story long Bible, main samting wea olketa mekhae long hem nao hem wanem iumi savve lanem from olketa story hia saed long wei for garem faith, no givap, lovem God, and olketa nara gudfala wei wea iumi savve followim.c

11. (a) Wanem nao mining bilong story bilong Naboth distaem, and hao nao example bilong hem helpem iumi? (b) Why nao olketa pablikeson distaem no storyim tumas wei wea olketa story long Bible piksarem samting? (Lukim “Kwestin From Reader” long page 17.)

¹¹ Distaem story bilong Naboth hem klia and isi for minim. Naboth no dae bikos hem piksarem Jesus or olketa anointed Christian, bat hem dae bikos hem laekem tumas for gohed faithful long God. Hem barava faithful for obeyim olketa Law bilong Jehovah nomata wanfala ruler wea garem bigfala paoa barava againstim hem. (Num. 36:7; 1 Ki. 21:3) Naboth showimaot nambawan example for pipol bilong God distaem wea maet feisim semkaen hard samting. (Readim 2 Timothy 3:12.) Evri Christian savve minim, rememberim, and followim example bilong Naboth, and diswan savve strongim faith bilong olketa.

12. (a) Distaem olketa pablikeson bilong iumi mekhae long wanem samting? (b) Wanem nao mekem iumi fit for minim olketa deep samting long Bible? (Lukim footnote.)

¹² So waswe, diswan minim olketa story long Bible hem for teachim iumi nomoa olketa samting wea savve helpem iumi, and no eni nara samting moa? Nomoa. Nomata olsem, staka taem olketa pablikeson bilong iumi distaem mekhae long wanem iumi savve lanem from olketa story long Bible, and olketa no storyim tumas wanem nao olketa story hia piksarem. Olsem example, wei wea Naboth hem faithful nomata hem kasem hard taem and dae, hem mekem iumi tingim wei wea Christ and olketa anointed Christian tu olketa faithful. And story bilong Naboth mekem iumi tingim tu wei wea “olketa nara sheepsheep” olketa faithful. Diswan showimaot wei wea Jehovah teachim iumi hem klia and isi for minim.d

EXPLAINIM OLKETA TOKPIKSA BILONG JESUS LONG WEI WEA ISI FOR MINIM

13. Olketa wanem example nao showimaot datfala wakaman wea faithful explainim samfala tokpiksa bilong Jesus long wei wea klia and isi for minim?

¹³ Jesus Christ hem nambawan Teacher wea winim eni nara man. Taem hem teach, hem laekem tumas for iusim tokpiksa and olketa example. (Matt. 13:34) Olketa tokpiksa savve helpem man for minim samting wea no isi for minim and savve affectim heart bilong hem. Long olketa year wea go pas, olketa pablikeson bilong iumi explainim olketa tokpiksa bilong Jesus long wei wea hem klia and isi for minim. Olsem example, Wastaoa bilong July 15, 2008 helpem iumi for minim gud moa olketa tokpiksa bilong Jesus abaotem seed bilong mustard tree, yeast, and datfala net. Distaem iumi luksavve olketa samting hia piksarem Kingdom bilong God, wea helpem staka pipol for lusim disfala nogud world and kamap disaepol bilong Christ.

14. (a) Long bifor, hao nao olketa pablikeson bilong iumi explainim tokpiksa abaotem man long Samaria wea kaen? (b) Hao nao olketa pablikeson bilong iumi explainim datfala tokpiksa bilong Jesus distaem?

¹⁴ Waswe long olketa tokpiksa bilong Jesus wea storyim staka samting? Samfala story hia piksarem samting and samfala story teachim iumi olketa samting wea savve helpem iumi. Bat hao nao bae iumi luksavve sapos wanfala story hem piksarem samting or nomoa? Long olketa year wea go pas, ansa for datfala kwestin hem kamap moa klia. Olsem example, tingim wei wea olketa pablikeson bilong iumi explainim tokpiksa abaotem datfala man long Samaria wea kaen. (Luke 10:30-37) Long 1924, The Watch Tower sei datfala man long Samaria hem piksarem Jesus. Datfala road long Jerusalem wea go daon long Jericho hem piksarem laef bilong olketa man wea kamap worse start kam long Eden. Olketa man for steal wea followim datfala road, piksarem olketa bigfala bisnis and olketa greedy bisnisman. And datfala priest and Levite piksarem olketa religion wea sei olketa Christian. Bat distaem, olketa pablikeson bilong iumi iusim datfala tokpiksa for teachim olketa Christian for no favorim narawan bat for helpem evriwan, especially for helpem pipol savve long God. Iumi barava hapi for lukim hao Jehovah teachim iumi long wei wea klia and isi for minim.

15. Wanem nao bae iumi storyim long nextfala study?

¹⁵ Long nextfala study, bae iumi storyim tokpiksa bilong Jesus abaotem tenfala gele. (Matt. 25:1-13) Jesus laekem olketa disaepol bilong hem wea stap long olketa last day for minim datfala tokpiksa long wanem wei? Waswe, evriwan insaed datfala tokpiksa, olketa samting wea happen, and olketa samting wea datfala tokpiksa story abaotem, hem piksarem samting? Or waswe, Jesus laekem iumi for lanem olketa samting wea savve helpem iumi long olketa last day distaem? Bae iumi storyim diswan long nextfala study.