Simpol English Wastaoa Why Nao Olketa Wakem?

FOR staka year finis, pipol evriwea long world kasem gud samting from Wastaoa magasin. Long July 2011, olketa start for wakem Wastaoa study magasin long simpol English. Insaed firstfala simpol English Wastaoa magasin hem sei: “Bae mifala wakem disfala magasin for wanfala year firstaem, and sapos hem helpem staka pipol, bae mifala gohed for printim.”

Distaem mifala hapi tumas for talem hao mifala disaed for gohed pablisim simpol English Wastaoa. Gogo bae olketa pablisim simpol Wastaoa long French, Portuguese, and Spanish languis tu.

STAKA TINGHAE LONG HEM

Bihaen olketa kasem datfala simpol English Wastaoa, samfala long South Pacific sei: “Distaem olketa brata fit for minim gud Wastaoa.” Wanfala sista long nara kantri storyim hao bifor, famili bilong hem spendem staka taem for iusim dictionary for faendem mining bilong olketa word and for minim olketa toktok insaed olketa study. Bat distaem, olketa savve iusim datfala taem for minim gud olketa scripture and hao olketa join witim study.

Wanfala sista long America wea kasem big education hem sei for 18 year, taem hem raetem or storyim eni samting, hem savve iusim toktok wea pipol wea garem big education nomoa savve minim. Hem sei hem kamap wei bilong hem for story long wei wea no simpol. Hem sei: “Mi luksavve mi mas changem tingting bilong mi and wei bilong mi for story.” Disfala simpol Wastaoa helpem hem for teachim gud Bible long nara pipol. Hem sei: “Datfala simpol Wastaoa barava helpem mi. Hem showimaot nambawan example long hao for story abaotem samting long simpol wei.”

Wanfala sista long England wea baptaes long 1972 raet olsem abaotem simpol Wastaoa magasin: “Taem mi readim firstfala magasin, mi feel olsem Jehovah sidaon saed long mi and putim hand bilong hem raonem shoulder bilong mi and mitufala read tugeta. Hem olsem taem wanfala dadi readim story long pikinini bifor pikinini sleep.”

Wanfala sista long Bethel long America wea baptaes winim 40 year sei simpol Wastaoa helpem hem for minim gud Bible. Olsem example, long simpol Wastaoa bilong September 15, 2011, datfala box “Some Expressions Explained” storyim disfala toktok “bigfala cloud bilong olketa witness” wea stap long footnote long Hebrew 12:1. Hem sei Bible kolem olketa witness wanfala “bigfala cloud” bikos “olketa staka tumas so hem hard for kaontem olketa.” Sista hia sei: “Datwan helpem mi for minim gud datfala verse.” Hem sei olsem tu abaotem meeting bilong olketa: “Nomata sapos wanfala pikinini readim nomoa ansa from simpol Wastaoa taem hem givim koment, olketa word wea hem iusim hem difren from olketa word long nara Wastaoa magasin wea staka long audience luk followim. So audience bae interest for herem koment bilong hem.”

Nara sista long Bethel raet olsem: “Mi barava luk forward for herem koment bilong olketa pikinini long kongregeson. Datfala simpol Wastaoa helpem olketa for givim koment from heart bilong olketa. Toktok bilong olketa barava encouragem mi.”

Wanfala sista wea baptaes long 1984 wea tinghae long simpol Wastaoa magasin, hem sei: “Mi feel olsem olketa raetem disfala magasin for miseleva. Hem isi for minim samting wea mi readim. Distaem mi no fraet for givim koment long Wastaoa Study.”

BIGFALA HELP FOR DADI AND MAMI

Mami bilong wanfala boy wea seven year sei: “Long bifor, taem mitufala redyim Wastaoa tugeta, hem savve tek longtaem and hem bigfala waka for mi minim kam long hem.” Hao nao simpol Wastaoa helpem disfala mami? Hem barava sapraes bikos hem isi for boy bilong hem readim olketa paragraf. And bikos olketa sentence long magasin no long tumas and no iusim olketa hard word, boy bilong hem savve minim and interest long olketa study. Datfala mami sei: “Distaem hem savve redyim samfala koment seleva, and hem no lus interest taem Wastaoa Study gohed.”

Mami bilong wanfala gele wea naen year raet olsem: “Bifor, mifala mas helpem hem redyim samfala koment. Distaem hem redyim olketa koment seleva. Samfala taem nomoa mifala need for helpem hem minim information long study. From hem minim datfala information hem feel olsem hem tu savve join insaed long Wastaoa Study.”

WANEM NAO TINGTING BILONG OLKETA PIKININI?

Staka pikinini feel olsem simpol Wastaoa hem especially for olketa. Rebecca, wea hem twelv year, sei: “Plis gohed pablisim disfala magasin! Mi laekem tumas datfala sekson ‘Some Expressions Explained.’ Hem isi for olketa pikinini minim.”

Nicolette, wea hem seven year, feel olsem tu. Hem sei: “Long bifor hem no isi for mi minim Wastaoa magasin. Distaem mi fit for givim plande koment seleva, and mi no needim eniwan for helpem mi.” Emma, wea hem naen year, sei: “Hem barava helpem mi and brata bilong mi, wea hem six year, for minim Wastaoa study! Thankiu tumas!”

Wastaoa magasin helpem staka pipol start kam long 1879. Olketa experience hia showimaot staka pipol kasem gud samting from disfala niu simpol Wastaoa magasin, wea iusim olketa word and toktok wea isi for minim. From hem helpem plande pipol, Governing Body bae gohed pablisim disfala simpol Wastaoa.