Iu Savve Stap Klin Saed Long Fasin
“Diswan nao mining bilong love bilong God, for iumi obeyim evri komandment bilong hem.”—1 JOHN 5:3.
1. Wanem difren fasin nao iumi lukim long pipol distaem?
LONGTAEM go finis, profet Malachi talem profesi abaotem wanfala taem wea fasin bilong pipol bilong God bae difren tumas from pipol wea no servem God. Datfala profet raet olsem: “Iufala bae lukim moa wei wea raeteous man hem difren from wicked man, wei wea man wea servem God hem difren from man wea no servem hem.” (Malachi 3:18) Datfala profesi hem fulfill distaem. Wei for obeyim olketa komandment bilong God, insaed diswan for klin saed long fasin, hem wise and hem nao stretfala gogo long living. Bat, hem no gogo wea isi evritaem. Dastawe Jesus sei olketa Christian mas barava trae hard for kasem salvation.—Luke 13:23, 24.
2. Wanem hevi wea stap raonem iumi nao mekem hard for samfala stap klin saed long fasin?
2 Why nao hem hard for stap klin saed long fasin? Wanfala reason hem olketa hevi wea stap raonem iumi. Olketa entertainment company showimaot dirty fasin olsem stael samting, samting for kasem hapi, and samting wea showimaot man hem full-grown, bat olketa no showim nogud samting wea kamaot from diswan. (Ephesians 4:17-19) Planti taem wei for duim sex wea olketa showim hem midolwan long tufala wea no marit. Planti taem olketa movie and television showim wei for tufala duim sex nomata olketa no feelim love and no want for acceptim responsibility for tingim wan wea olketa duim sex witim. Planti taem, feeling and respect no insaed diswan. Planti lukim kaen fasin olsem from taem olketa pikinini. And tu, strongfala hevi kam from olketa fren for followim fasin bilong distaem for free saed long fasin, and olketa mekfani or tok nogud tu long eniwan wea no olsem.—1 Peter 4:4.
3. Wanem nao samfala reason why planti long world duim dirty fasin?
3 Hevi from iumiseleva tu mekem hem hard for stap klin saed long fasin. Jehovah creatim olketa man witim feeling for laekem sex, and olketa feeling hia savve barava strong. Feeling for laekem samting hem kamaot from tingting bilong iumi, and dirty fasin hem join witim wei for tingting wea no fitim tingting bilong Jehovah. (James 1:14, 15) Olsem example, report wea olketa just pablisim insaed magasin British Medical Journal sei planti wea duim sex for firstaem olketa laek faendaot nomoa long hao nao sex. Olketa narawan tingse staka wea sem age witim olketa go ahed for duim sex, so olketa tu laek for duim. Samfala moa sei feeling bilong olketa nao ova tumas or olketa “lelebet drunk long dat taem.” Sapos iumi laek for mekem God hapi, iumi mas ting long difren wei. Wanem kaen tingting nao bae helpem iumi for keepim wei for klin saed long fasin?
Buildim Strong Biliv
4. For stap klin saed long fasin, wanem nao iumi mas duim?
4 For stap klin saed long fasin, iumi mas luksavve hao wei for followim kaen living olsem hem gud samting. Diswan hem fitim samting wea aposol Paul raetem for olketa Christian long Rome: “Pruvim long iufala seleva, gudfala and stretfala and perfect will bilong God.” (Romans 12:2) For luksavve hao wei for stap klin saed long fasin hem gud samting hem minim moa samting winim wei for savve Word bilong God tok againstim dirty fasin. Hem minim tu wei for luksavve long olketa reason why God tok strong againstim dirty fasin and hao iumi kasem gud samting sapos iumi stap klia long hem. First article bin story abaotem samfala long olketa reason hia.
5. For wanem main reason nao olketa Christian laek for stap klin saed long fasin?
5 Bat, for olketa Christian, barava strongfala reason for stap klia long dirty fasin hem from wei wea iumi fren witim God. Iumi lanem hao hem nao savve wanem hem best for iumi. Love bilong iumi for hem bae helpem iumi for heitim samting wea nogud. (Psalm 97:10) God nao Man wea givim “evri gudfala present and evri perfect present.” (James 1:17) Hem lovem iumi. Taem iumi obeyim hem, iumi showimaot iumi lovem hem and tinghae long evri samting wea hem duim finis for iumi. (1 John 5:3) No enitaem iumi want for mekem Jehovah feel sorre and pain from wei for brekem olketa raeteous komand bilong hem. (Psalm 78:41) Iumi no laek for duim wanfala samting wea bae mekem pipol tok nogud abaotem holy and raeteous wei bilong hem for worship. (Titus 2:5; 2 Peter 2:2) Taem iumi go ahed for stap klin saed long fasin, iumi mekem Most Hae Wan barava hapi.—Proverbs 27:11.
6. Wei for talemaot long nara pipol olketa standard bilong iumi saed long fasin hem help long wanem wei?
6 Taem iumi disaed for stap klin saed long fasin, nara protection hem for talemaot datwan long nara pipol. Letem pipol savve iu wanfala servant bilong Jehovah God and iu disaed strong for keepim hae standard bilong hem. Hem laef bilong iu, body bilong iu, disison bilong iu. Wanem nao stap long danger? Spesol wei wea iu fren witim Dadi bilong iu long heven. So showimaot klia hao faithful wei bilong iu saed long fasin hem kanduit change. Tinghae long wei wea iu stand for God taem iu saportim olketa principle bilong hem. (Psalm 64:10) No feel shame for story long nara pipol abaotem olketa biliv bilong iu saed long fasin. Wei for tokaot savve strongim iu, protectim iu, and encouragem nara pipol for followim example bilong iu.—1 Timothy 4:12.
7. Hao nao iumi savve go ahed for keepim wei wea iumi disaed strong for stap klin saed long fasin?
7 Next wan, bihaen iumi disaed for keepim hae standard saed long fasin and iumi talemaot diswan, iumi mas duim samting for followim samting iumi disaedem. Wanfala wei for duim diswan hem for careful taem iumi chusim olketa fren. “Man wea wakabaot witim wise pipol bae kamap wise,” Bible hem talem. Kaban witim olketa wea garem sem mark olsem iu saed long fasin; olketa bae strongim iu. Datfala scripture sei tu: “Bat man wea kaban witim stupid pipol bae kasem trabol.” (Proverbs 13:20) Long evri wei wea fitim, stap klia long pipol wea maet daonem samting wea iu disaedem.—1 Corinthians 15:33.
8. (a) Why nao iumi mas feedim mind bilong iumi long olketa gud samting? (b) Wanem nao iumi mas stap klia long hem?
8 And samting moa, maet iumi need for feedim tingting bilong iumi long olketa samting wea tru, important, raeteous, klin, samting wea iumi fit for lovem, samting wea pipol tok gud abaotem, gudfala samting, and samting wea fit for kasem praise. (Philippians 4:8) Iumi duim datwan taem iumi chusim gud wanem iumi lukluk long hem and readim and music wea iumi lisin long hem. For sei dirty buk no savve affectim man long nogud wei hem olsem for sei gudfala buk no savve affectim man long gudfala wei. Remember, hem isi tumas for olketa man wea no perfect for foldaon long dirty fasin. So olketa buk, magasin, movie, and music wea encouragem feeling for duim sex savve leadim man for laekem rong samting, and gogo diswan maet lead go long sin. For keepim wei for klin saed long fasin, iumi mas fulimap mind bilong iumi witim wisdom bilong God.—James 3:17.
Olketa Step wea Lead Go Long Dirty Fasin
9-11. Olsem Solomon talem, wanem nao olketa step wea isisi leadim wanfala young man for duim dirty fasin?
9 Planti taem, olketa step hem stap wea man fit for luksavve wea lead go long dirty fasin. Each step wea man duim mekem hem moa hard for tan bak. Lukim wei wea Proverbs 7:6-23 storyim diswan. Solomon lukim “wanfala young man wea short long heart,” or wea short long gudfala tingting. Datfala young man hem “wakabaot go pas long street klosap long corner bilong [wanfala jury woman], and hem march go followim road for haos bilong hem, taem hem no laet tumas, long evening bilong day.” Datwan nao first mistek bilong hem. Long taem wea hem no laet tumas, “heart” bilong hem leadim hem, no long eni street nomoa, bat long street wea hem savve jury woman bae stap.
10 Iumi go ahed for read: “Lukim! wanfala woman long there for meetim hem, witim kaleko bilong jury woman and heart wea kleva for trikim man.” Hem lukim nao woman hia! Hem savve tan raon and go bak long haos, bat diswan hem moa hard winim bifor, especially from man hia wik saed long fasin. Datfala woman kasholem hem and kissim hem. From hem acceptim kiss hia, distaem hem lisin long ososo toktok bilong datfala woman: “Mi garem kaon for givim olketa communion sakrifaes,” woman hia sei. “Tuday mi keepim olketa promis bilong mi.” Insaed olketa communion sakrifaes hem meat, flour, oil, and wine. (Leviticus 19:5, 6; 22:21; Numbers 15:8-10) Taem hem talem olketa samting hia, maet hem laekem man hia for savve hem tingim spiritual samting, and long semtaem, maet woman hia showim hao planti gud samting for kaikai and drink stap long haos bilong hem. Woman hia begim hem olsem: “Kam, letem iumi drinkim love go kasem morning; letem iumi enjoyim each other witim olketa toktok bilong love.”
11 Hem isi for savve wanem nao bae kamaot from diswan. “Hem switim hem witim smooth bilong mouth bilong hem.” Hem followim woman hia go long haos “olsem wanfala buluka wea kam for olketa busarem” and “olsem wanfala bird wea hariap go insaed long trap.” Solomon finisim witim important toktok hia: “Hem no savve diswan minim barava soul bilong hem.” Soul, or laef, bilong hem insaed diswan bikos “God bae judgem olketa wea duim fornication and adultery.” (Hebrews 13:4) Datwan hem barava strong leson for olketa man and woman! Iumi mas stap klia long wei for tekem first step long gogo wea lead go for mekem God no hapi.
12. (a) Wanem nao toktok “short long heart” hem minim? (b) Hao nao iumi savve buildimap strong saed long fasin?
12 Lukim hao young man insaed long datfala story hem “short long heart.” Disfala toktok talem iumi hao tingting, samting hem laekem, samting hem lovem, olketa feeling, and olketa goal long laef no followim samting wea God appruvim. Wei wea hem wik saed long fasin lead go long barava nogud samting. Long olketa hardfala “last day” distaem, man need for barava waka hard for buildimap strong saed long fasin. (2 Timothy 3:1) God provaedem samting for helpem iumi. Hem provaedem olketa meeting bilong Christian kongregeson for encouragem iumi long stretfala gogo and for mekem iumi kaban witim nara pipol wea garem sem goal olsem iumi. (Hebrews 10:24, 25) Olketa kongregeson elder stap wea shepherdim and teachim iumi long olketa wei bilong raeteous fasin. (Ephesians 4:11, 12) Iumi garem Word bilong God, Bible, for leadim and gaedem iumi. (2 Timothy 3:16) And long evritaem, iumi garem chance for prea for spirit bilong God for helpem iumi.—Matthew 26:41.
Lane From Olketa Sin Bilong David
13, 14. Hao nao King David join insaed long barava bigfala sin?
13 Sorre tumas, nomata olketa strongfala servant bilong God tu duim dirty fasin. Wanfala nao hem King David, wea for planti year servem Jehovah long faithful wei. No eni daot stap hao hem barava lovem God. Nomata olsem, hem followim wanfala gogo bilong sin. Olsem young man wea Solomon storyim, olketa step stap wea leadim David for sin and then mekem datwan kamap big moa.
14 Long datfala taem David hem midol-age, maet hem just ovarem 50 year. From antap long ruf long haos, hem lukim Bath-sheba wea luk naes tumas hem swim. Hem ask abaotem woman hia. Hem faendaot hao hasband bilong hem, Uriah, hem insaed sekson wea attakim Rabbah, wanfala taon long Ammon. David tekem woman hia long haos bilong hem and duim sex witim hem. Bihaen, problem hia kamap moa big—woman hia faendaot hem babule from David. From hem hope Uriah bae sleep witim waef bilong hem, David askem hem for kam bak from war. Long datfala wei bae hem luk olsem Uriah nao dadi bilong pikinini bilong Bath-sheba. Bat Uriah no go long haos bilong hem. From hem laek tumas for haedem sin bilong hem, David sendem Uriah go bak long Rabbah witim wanfala leta for chief bilong army for olketa mas putim Uriah long ples wea hem bae dae. Uriah lusim laef bilong hem, and David maritim datfala widow woman bifor pipol savve hem babule.—2 Samuel 11:1-27.
15. (a) Hao nao sin bilong David showaot? (b) Wanem nao David duim taem Nathan repruvim hem long kleva wei?
15 Hem luk olsem plan bilong David for kavarem sin bilong hem waka gud. Planti month go pas. Pikinini hia—wanfala son—hem born. Sapos David tingim diswan taem hem raetem Psalm 32, then hem klia hao conscience bilong hem pokem hem. (Psalm 32:3-5) Bat, datfala sin hem no haed from God. Bible hem sei: “Samting wea David duim hem nogud long eye bilong Jehovah.” (2 Samuel 11:27) Jehovah sendem profet Nathan, wea long kleva wei talem David samting wea hem duim. Stretawe David talemaot rong bilong hem and begim Jehovah for forgivim hem. Trufala wei wea hem repent mekem hem fren bak moa witim God. (2 Samuel 12:1-13) David no les long repruv. Bat, hem showimaot tingting wea stap long Psalm 141:5: “Sapos raeteous wan hem hitim mi, hem bae wanfala loving-kaeness; and sapos hem repruvim mi, hem bae olsem oil long hed bilong mi, wea hed bilong mi bae no againstim.”
16. Wanem warning and kaonsel nao Solomon givim abaotem olketa sin?
16 Solomon, wea hem mek-tu son bilong David and Bath-sheba, maet ting raonem disfala nogud samting wea happen long laef bilong dadi bilong hem. Bihaen hem raet: “Man wea haedem olketa sin bilong hem no savve win, bat man wea talemaot and lusim olketa bae kasem mercy.” (Proverbs 28:13) Sapos gogo iumi duim bigfala sin, iumi shud followim disfala kaonsel, wea hem olsem warning and advaes tu. Iumi mas konfes long Jehovah and go lukim olketa kongregeson elder for help. Wanfala important responsibility bilong olketa elder hem for help for stretem olketa wea foldaon long rong fasin.—James 5:14, 15.
Stand Strong Long Samting wea Kamaot From Sin
17. Nomata Jehovah forgivim olketa sin, hem no stopem iumi for kasem wanem?
17 Jehovah forgivim David. Why? Bikos David hem wanfala faithful man, bikos hem showimaot mercy long nara pipol, and bikos hem really repent. Nomata olsem, David no missim olketa nogud samting wea kamaot bihaen. (2 Samuel 12:9-14) Sem samting hem tru distaem. Nomata Jehovah no mekem nogud samting kasem olketa wea repent, hem no stopem olketa for kasem samting wea kamaot from rong bilong olketa. (Galatians 6:7) Samfala samting wea kamaot from dirty fasin nao divorce, babule nating, sik bilong dirty fasin, and no garem trust and respect.
18. (a) Hao nao Paul talem kongregeson long Corinth for deal witim wanfala bigfala sin saed long sex? (b) Hao nao Jehovah showimaot love and mercy long olketa sinner?
18 Sapos iumiseleva duim big rong, hem isi for feel nogud taem iumi kasem samting wea kamaot from mistek bilong iumi. Nomata olsem, iumi mas no letem eniting mekem iumi hol bak from wei for repent and fren bak moa witim God. Long first century, Paul raet for olketa bilong Corinth for olketa shud aotem from kongregeson wanfala man wea duim fornication witim wanfala klos relative. (1 Corinthians 5:1, 13) Bihaen datfala man barava repent, Paul givim disfala instruction long kongregeson: “Forgivim and comfortim hem long kaenfala wei [and] talemaot love bilong iufala for hem.” (2 Corinthians 2:5-8) Long disfala kaonsel, iumi lukim love and mercy bilong Jehovah for olketa sinner wea repent. Olketa angel long heven hapi tumas taem wanfala sinner hem repent.—Luke 15:10.
19. Wei for sorre from wanfala rong samting savve leadim man for kasem wanem gud samting?
19 Nomata iumi sorre from rong fasin, datfala feeling for sorre savve helpem iumi for ‘lukaot mekem iumi no duim moa samting wea nogud.’ (Job 36:21) Tru nao, barava nogud samting wea kamaot from sin shud stopem iumi for no duim sem rong moa. And tu, David iusim sorre samting wea kasem hem from rong fasin bilong hem for kaonselem nara pipol. Hem sei: “Bae mi teachim olketa wea duim sin olketa wei bilong iu, mekem olketa sinner savve tan bak stret long iu.”—Psalm 51:13.
Hapi Hem Kam From Wei for Servem Jehovah
20. Wanem gud samting nao kamaot from wei for obeyim olketa raeteous mark bilong God?
20 “Hapi nao olketa wea herem word bilong God and followim!” Jesus hem talem. (Luke 11:28) Wei for obeyim olketa raeteous mark bilong God givim hapi long distaem and long future for olowe. Sapos iumi stap klin saed long fasin, letem iumi go ahed long wei olsem taem iumi mekius long evri help wea Jehovah provaedem. Sapos iumi bin foldaon long dirty fasin, letem iumi kasem comfort for savve Jehovah redy for forgivim olketa wea really repent, and letem iumi disaed strong for nating duim moa datfala sin.—Isaiah 55:7.
21. Wei for followim wanem kaonsel from aposol Peter nao savve helpem iumi stap klin saed long fasin?
21 Klosap nao disfala world wea no raeteous bae finis, witim evri dirty tingting and fasin bilong hem. Taem iumi go ahed klin saed long fasin, bae iumi kasem gud samting distaem and for olowe. Aposol Peter raet olsem: “Olketa wea mi lovem, from iufala weitim samting hia, duim best bilong iufala mekem long end, hem savve lukim iufala no garem mark or dirty, and long peace. . . . From iufala garem disfala savve firstaem, lukaot nogud rong bilong pipol wea no followim law hem pullim iufala go and iufala lusim wei wea iufala go ahed strong.”—2 Peter 3:14, 17.
Iu Savve Explainim?
• Why nao hem savve hard for stap klin saed long fasin?
• Wanem nao samfala wei for saportim wei wea iumi disaed strong for followim hae mark saed long fasin?
• Wanem nao olketa leson wea iumi savve lanem from olketa sin bilong young man wea Solomon storyim?
• Wanem nao example bilong David teachim iumi abaotem wei for repent?
[Piksa long page 13]
Hem protection for letem nara pipol savve biliv bilong iu saed long fasin
[Piksa long page 16, 17]
Bikos David really repent, Jehovah forgivim hem