“Hao Nao God No Duim Eniting?”
“MI EVRITAEM GAREM KWESTIN: HAO NAO GOD NO DUIM ENITING?”—Pope Benedict XVI, taem hem visitim concentration camp bifor long Auschwitz, Poland.
TAEM BARAVA NOGUD SAMTING HAPPEN, MAET IU TU TING, ‘HAO NAO GOD NO DUIM ENITING?’ OR TAEM ENI NOGUD SAMTING KASEM IU, MAET IU TING: “GOD TINGIM MI TU?”
Maet iu tu garem sem tingting olsem Sheila, wea stap long United States. Hem big insaed famili wea lotu gud. Hem sei: “Start taem mi smol, mi interest tumas for prea long God bikos hem nao Creator. Nomata olsem, mi nating feel klos long God nomoa. Mi savve hem lukim mi, bat mi no ting hem interest long mi. Mi savve God no heitim mi, bat mi no ting hem lovem mi.” Why nao Sheila ting olsem? Hem sei: “Staka nogud samting kasem famili bilong mi, and luk olsem God nating helpem mifala nomoa.”
Olsem Sheila, maet iu tu bilivim wanfala Olmaeti God hem stap. Bat maet iu no sure sapos hem tingim iu or nomoa. Job tu garem sem tingting olsem nomata hem raeteous man and hem bilivim God garem bigfala paoa and wisdom. (Job 2:3; 9:4) Taem Job kasem staka nogud samting and luk olsem hem no wei nao, hem askem God: ‘Waswe nao yu haedem fes blong yu long mi? Waswe nao yu mekem mi olsem enemi blong yu?’—Job 13:24.
Wanem nao Bible talem abaotem diswan? Waswe, hem stret for blamem God for olketa nogud samting wea happen? Waswe, eni pruv stap wea showimaot God tingim iumi olketa man, and iumi each wan? Waswe, iumi fit for luksavve sapos God tingim iumi, minim samting wea kasem iumi, sorre long iumi, or helpem iumi long olketa problem bilong iumi?
Insaed disfala magasin, bae iumi lanem hao creation helpem iumi for luksavve God tingim iumi. (Rome 1:20) Then bae iumi storyim wanem Bible talem abaotem wei wea God tingim iumi. Taem iu gohed lane abaotem hem from creation and from Bible, bae iu barava sure hem ‘tingim iu.’— 1 John 2:3; 1 Peter 5:7.