Waswe, God Tingim Iu?

WANEM IUMI LANEM FROM CREATION

Firstfala hour bihaen baby born hem barava important. Why nao olsem? Bikos hem barava important for mami karem baby bilong hem and baby mas feelim love bilong mami. Datwan bae helpem baby for grow healthy and hapi.a

Wanem nao mekem mami for laek lukaftarem gud niu baby bilong hem? Insaed buk The Journal of Perinatal Education, Professor Jeannette Crenshaw sei level bilong hormone wea olketa kolem long oxytocin wea mekem mami garem feeling for barava lovem baby hem go ap “bihaen mami bornem baby, holem hem, lukluk long hem, and susum hem.” And tu, nara hormone bilong mami hem release wea helpem hem for “barava willing for duim eni samting wea baby needim.” Why nao datwan important?

Creator wea lovem iumi, Jehovah God,b nao putim feeling for mami feel klos long baby bilong hem. King David sei ‘long taem wea mami blong [hem] bonem [hem]’ God nao lukaftarem hem and hem feel sef. Hem prea olsem: ‘Stat long de wea mi bon, an ka-kam kasem tude, oltaem mi trastem yu, yu nao God blong mi.’—Sams 22:9, 10.

TINGIM DISWAN: Sapos God creatim mami for garem strong love for baby bilong hem and duim eni samting wea baby hia needim, then iumi sure God tingim iumi each wan bikos Bible kolem iumi ‘olketa pikinini bilong hem.’—Acts 17:29.

WANEM IUMI LANEM LONG BIBLE

Jesus Christ, wea savve gud long Creator winim eniwan sei: “Man savve salem tufala smol bird for wanfala selen nomoa, iaman? Nomata olsem, Dadi bilong iufala hem savve taem wanfala smol bird olsem hem dae. Iu savve, hem kaontem finis tu evri hair long hed bilong iufala. So iufala no fraet, bikos iufala barava important winim evri smol bird hia.”—Matthew 10:29-31.

Staka taem iumi no lukim nomoa olketa smol bird wea flae raon, and iumi no savve tu “taem wanfala smol bird olsem hem dae.” Bat dadi long heven hem savve long each wan long olketa bird hia! And hem ting long iumi olketa man iumi important winim olketa bird. Leson wea iumi lanem from diswan hem olsem: No tingse God no tingim iu. Hem barava interest long iu!

Bible encouragem iumi

• “[Jehovah] hemi lukim evrisamting, hemi lukluk long olketa gudfala pipol an olketa nogud pipol.”—PROVEBS 15:3.

• “[Jehovah] hemi save luk go long olketa stretfala pipol, an hemi save lisin long prea blong olketa.”—SAMS 34:15.

• “Bae mi hapi tumas, bikos lav blong yu hemi barava bikfala fogud. Yu luksave dat mi safa tumas, an yu save long olketa trabol blong mi tu.”—SAMS 31:7.

“MI TINGSE JEHOVAH NO LOVEM MI”

Waswe, hem important for savve God barava tingim iumi and lukaftarem iumi bikos hem lovem iumi? Yes. Tingim wanem Hannah,c from England, hem talem:

“Staka taem mi tingse Jehovah no lovem mi and no ansarem olketa prea bilong mi tu bikos mi no garem strongfala faith. Mi tingse hem panisim mi or les long mi bikos mi no important, and tu, mi tingse hem no tingim mi nomoa.”

Bat distaem Hannah barava sure Jehovah tingim hem and lovem hem. Hao nao olsem? Hem sei: “Hem tek taem for mi sure long datwan. Mi tingim wanfala Bible tok wea mi herem staka year go finis abaotem ransom sakrifaes bilong Jesus wea kasem heart bilong mi, and helpem mi for sure Jehovah lovem mi. Taem mi luksavve hem ansarem olketa prea bilong mi, staka taem mi krae bikos mi luksavve Jehovah lovem mi. And tu, taem mi studyim gud Bible and attendim olketa meeting long Kingdom Hall, mi lanem moa samting abaotem Jehovah, olketa wei bilong hem, and hao hem ting long iumi olketa man. Distaem mi luksavve Jehovah sapotim and lovem iumi evriwan and hem laek for lukaftarem iumi each wan tu.”

Samting wea Hannah talem barava encouragem iumi. Bat wanem nao bae helpem iumi for luksavve God savve gud long iumi and tingim feeling bilong iumi? Next article bae ansarem disfala kwestin.