Taem Disaster Happen

“Feeling wea mifala kasem firstaem hem nogud tumas. Evri samting wea mifala ownim, landslide and bigfala flood distroem nao.”—Andrew, Sierra Leone.

“Bihaen datfala cyclone, mifala go bak long haos and no lukim eni samting hem stap. Mifala seke fogud. Gele bilong mi nildaon and krae.”—David, Virgin Islands.

SAPOS iu bin insaed wanfala disaster, maet iu minim samting wea olketa narawan tu experiencem. Hem nao wei for seke, no acceptim samting wea happen, konfius, wari, and fraet. Staka wea disaster kasem olketa, olketa wikdaon and taed, datwan mekem olketa for no interest for mekem laef bilong olketa kamap gud moa.

Sapos iu lusim evri samting long disaster, maet iu tu feel olsem iu no wei nao. Maet iu feel olsem iu laek givap nomoa. Bat, Bible storyim hao iu savve gohed hapi and garem hope for wanfala nambawan future.

FOR SAVVE LONG TRUTH INSAED BIBLE MEKEM IUMI HAPI

Ecclesiastes 7:8, hem sei: “Taem samting hem finis, hem winim taem wea hem start.” (NW) Taem iu just start for mekem laef bilong iu kamap gud moa bihaen wanfala disaster, maet hem luk olsem laef bae hem no isi. Bat taem iu gohed waka hard for mekem laef bilong iu kamap gud, gogo evri samting bae hem gud.

Bible sei taem bae kam wea “no eniwan long ples ya bae hemi sore o krae.” (Aesaea 65:19) Diswan bae kamap tru taem Kingdom bilong God mekem disfala earth kamap paradaes. (Sams 37:11, 29) No eni disaster bae happen moa. Eni feeling for fraet and olketa nogud memory abaotem eni disaster wea happen bae nomoa nao, bikos Olmaeti God hem promis olsem: “Evrisamting wea hemi hapen bifoa, bae pipol i fogetem finis nao.”—Aesaea 65:17.

Tingim diswan: Creator hem mekem finis plan “fo mekem laef blong yufala fo kamap gudfala moa” taem Kingdom bilong God hem rul. (Jeremaea 29:11) Waswe, wei wea iu savve long diswan helpem iu for no givap long laef? Sally, wea iumi storyim long firstfala article hem sei, “Wei for tingim evritaem olketa nambawan samting wea Kingdom bilong God bae duim for iumi long future savve helpem iu for no tingim olketa samting wea happen, bat for deal witim datwan.”

Hem gud for lane moa abaotem wanem Kingdom bilong God bae klosap duim for iumi olketa man. Taem iu duim olsem, bae iu sure nomata iu safa from wanfala disaster wea happen, iu savve gohed for hapi distaem, and weitim wanfala future wea no eni disaster bae happen. Bat distaem, Bible savve helpem iumi for deal witim nogud samting wea kamaot from wanfala disaster. Lukim samfala example.

Toktok Long Bible Savve Help

Mas sleep gud.

“Hem gud for lelebet rest winim wei for waka olowe and aftarem wind.”—Ecclesiastes 4:6, NW.

Olketa wea duim research sei, “pipol wea experiencem nogud samting, savve barava feel nogud and garem problem saed long feeling sapos olketa no sleep gud.” Dastawe, hem gud for mas garem inaf rest and sleep gud.

Storyim feeling bilong iu witim narawan.

“Wei for wari savve mekem heart bilong man wikdaon, bat gudfala toktok nao bae mekem heart bilong hem hapi.”—Proverbs 12:25, NW.

Story witim famili member or fren wea iu trustim. Olketa famili member and olketa gudfala fren bilong iu bae no lisin nomoa long iu, bat olketa bae encouragem and givim help wea iu needim tu.a

Tingim taem evri samting bae kamap gud moa long future.

“Iumi weitim wanfala niu skae and wanfala niu earth wea hem promisim, wea evri samting bae raeteous.”—2 Peter 3:13.

a Samwan wea stress or barava wari for longfala taem maet need for lukaotem help from doctor.