Why Nao Iumi Willing for Stap Anda lo Jehovah, and Hao Nao Iumi Savve Duim Datwan?

1. Why nao iumi shud stap anda lo Jehovah?

IUMI shud stap andab lo Jehovah bikos hem nao Creator blo iumi. Hem nao garem raet for markem olketa standard for iumi followim bikos hem nao wakem iumi. (Rev. 4:11) Bat nara important reason for obeyim Jehovah, hem bikos rul blo hem nao barava nambawan. Lo history, iumi lukim samfala man kasem paoa for rul ovarem olketa narawan. Bat taem iumi comparem witim hao Jehovah rul, Jehovah nao barava wise, garem love, mercy, and hem tingim pipol.—Eksodas 34:6; Rome 16:27; 1 John 4:8.

2. Olsem Hebrew 12:9-11 storyim, wanem nao olketa reason why iumi shud stap anda lo Jehovah?

² Jehovah laekem wei wea iumi obey, hem no bikos iumi fraetem hem nomoa, bat bikos iumi lovem hem and ting lo hem olsem dadi wea lovem iumi. Lo leta blo Paul for olketa Hebrew, hem storyim dat iumi shud “barava willing for stap anda long Dadi bilong iumi” bikos datwan bae “helpem iumi” for kasem gud samting.—Readim Hebrew 12:9-11.

3. (a) Hao nao iumi showimaot iumi stap anda lo Jehovah? (b) Olketa wanem kwestin nao iumi bae story raonem?

³ Iumi stap anda lo Jehovah taem iumi duim best for obeyim hem lo evri samting and for iumi againstim wei for laek depend lo savve blo iumiseleva. (Provebs 3:5) Hem no hard for stap anda lo Jehovah taem iumi savve lo olketa gudfala wei blo hem. Why nao olsem? Bikos olketa gudfala wei blo hem showaot lo evri samting wea hem duim. (Sams 145:9) Taem iumi lanem moa samting abaotem Jehovah datwan hem helpem iumi for lovem hem go moa. And taem iumi lovem Jehovah, iumi no needim staka rul wea talem iumi wanem for duim and no duim. Iumi traem best for mekem tingting and feeling blo iumi for laekem samting wea gud and heitim samting wea nogud. (Sams 97:10) Bat, samfala taem maet hem no isi for obeyim Jehovah. Why nao samfala taem hem no isi for obey? And wanem nao olketa elder, dadi, and mami savve lanem from example blo Governor Nehemiah, King David; and Mary, mami blo Jesus? Disfala study bae ansarem olketa kwestin hia.

WHY NAO WEI FOR OBEYIM JEHOVAH HEM NO ISI?

4-5. Olsem Rome 7:21-23 storyim, why nao wei for obeyim Jehovah hem no isi?

⁴ Wanfala reason why wei for obeyim Jehovah hem no isi hem bikos iumi sin and iumi no perfect. So staka taem iumi garem tingting for no laek obey. Bihaen Adam and Eve tufala againstim God and kaikaim frut wea hem tambuim, tufala disaedem standard for tufala seleva. (Jenesis 3:22) Distaem, staka pipol no laek followim wanem Jehovah talem and olketa disaedem seleva wanem olketa tingse hem stret and no stret.

⁵ Nomata iumi savve lo Jehovah and lovem hem, maet iumi faendem hem no isi for barava followim wanem hem laekem. Aposol Paul tu hem experiencem datwan. (Readim Rome 7:21-23.) Olsem Paul, iumi laek for evritaem duim samting wea stret lo eye blo Jehovah. Bat iumi mas evritaem faet againstim feeling for laek duim olketa samting wea no stret.

6-7. Wanem nao nara reason why wei for obeyim Jehovah hem savve hard? Storyim example

⁶ Nara reason why wei for obeyim Jehovah hem savve hard, hem bikos lo culture wea iumi growap lo hem. Staka idea blo olketa man hem againstim wanem Jehovah laekem, and iumi savve stragol evritaem for no garem olketa kaen tingting olsem. Bae iumi storyim wanfala example.

⁷ Lo samfala ples, hem normal samting for olketa young wan kasem hevi for mas waka for kasem staka selen. Wanfala sista wea nem blo hem Maryc hem feisim datfala challenge. Bifor hem lane abaotem Jehovah, hem skul lo wanfala lo olketa best skul lo kantri blo hem. Famili blo Mary trae forcem hem for faendem waka wea bae mekem hem kasem staka selen and for pipol tinghae lo hem. Hem tu laekem datwan. Bat, bihaen hem lane abaotem Jehovah and lovem hem, hem changem olketa goal blo hem. Bat hem sei: “Samfala taem, mi lukim olketa wei for mi savve kasem staka selen bat datwan bae spoelem spiritual schedule blo mi. Bat, bikos lo hao mi growap, hem hard for sei no lo olketa chance hia. Mi mas askem Jehovah for helpem mi for againstim olketa temptation for acceptim olketa waka wea bae disturbim service blo mi for Jehovah.”—Matt. 6:24.

8. Wanem nao iumi bae storyim?

⁸ Iumi kasem gud samting taem iumi obeyim Jehovah. Bat olketa wea garem paoa for disaedem samting, olsem olketa elder, olketa dadi, and olketa mami, garem narafala reason moa for mas obeyim direction wea kam from God, bikos olketa garem chance for helpem olketa narawan. Bae iumi storyim samfala example lo Bible, wea teachim iumi lo hao for iusim paoa wea iumi garem lo wei wea mekem Jehovah hapi.

OLKETA ELDER SAVVE LANE FROM NEHEMIAH

9. Wanem nao olketa hard samting wea Nehemiah feisim?

⁹ Jehovah givim important responsibility lo olketa elder for lukaftarem olketa pipol blo hem. (1 Pet. 5:2) Olketa elder savve lane from hao Nehemiah treatim pipol blo Jehovah. From Nehemiah hem governor blo Judah, hem garem paoa for disaedem staka samting. (Nehemaea 1:11; 2:7, 8; 5:14) Tingim samfala hard samting wea Nehemiah mas feisim. Hem herem dat pipol lo there duim samting wea no showimaot respect lo temple blo Jehovah, and olketa no sapotim olketa Levite olsem Law talem. Olketa Jew no obeyim law blo Sabbath, and samfala lo olketa maritim olketa woman wea no Jew. Governor Nehemiah mas deal witim datfala hard situation.—Nehemaea 13:4-30.

10. Hao nao Nehemiah deal witim olketa challenge wea hem feisim?

¹⁰ Nehemiah no iusim paoa wea hem garem for forcem pipol blo God for followim tingting blo hemseleva. Bat, hem prea and barava askem Jehovah for helpem hem, and hem teachim pipol abaotem Law blo Jehovah. (Nehemaea 1:4-10; 13:1-3) Nehemiah hambol tu for waka tugeta witim olketa brata blo hem for buildim bak wall blo Jerusalem.—Nehemaea 4:15.

11. Olsem 1 Thessalonica 2:7, 8 storyim, hao nao olketa elder shud treatim evriwan lo kongregeson?

¹¹ Olketa elder maet no deal witim olketa sem kaen problem olsem Nehemiah, bat olketa savve followim example blo Nehemiah lo staka nara wei. Olsem example, olketa savve waka hard for helpem olketa brata and sista blo olketa. And olketa no letem position wea olketa garem for mekem olketa praod. Bat, olketa savve treatim olketa brata and sista lo kongregeson lo wei wea showimaot love. (Readim 1 Thessalonica 2:7, 8.) Bigfala love and wei for hambol, mekem olketa for story kaen lo olketa brata and sista. Andrew, wanfala mature elder sei: “Mi lukim hao taem elder hem kaen and fren gud witim olketa brata and sista, datwan hem tasim heart blo olketa, and muvim evriwan lo kongregeson for waka tugeta witim olketa elder.” Tony, wea elder for longtaem finis sei: “Mi trae for followim kaonsel wea stap lo Philippi 2:3 and mi evritaem trae for ting lo olketa narawan olsem olketa winim mi. Datwan helpem mi for no olsem wanfala boss.”

12. Why nao hem important for olketa elder mas hambol?

¹² Olketa elder mas hambol olsem Jehovah hem hambol. Nomata Jehovah hem Haefala Ruler lo universe, hem willing for “luk kamdaon” and helpem olketa man, nomata olketa dust nating. (Sams 18:35; 113:6, 7) Tru tumas, Jehovah barava heitim olketa wea praod and tinghae lo olketa seleva.—Provebs 16:5.

13. Why nao elder need for “kontrolem toktok bilong hem”?

¹³ Elder wea stap anda lo Jehovah need for “kontrolem toktok bilong hem.” Sapos nomoa, hem maet tok kros lo samwan wea no showimaot respect lo hem. (Jas. 1:26; Gal. 5:14, 15) Andrew, wea iumi storyim finis, hem sei: “Samfala taem, mi laek for tok kros lo wanfala brata or sista wea mi tingse hem no showimaot respect lo mi. Bat mi ting raonem example blo olketa faithful man lo Bible, and datwan helpem mi for luksavve hem barava important for hambol and kaen.” Olketa elder showimaot olketa stap anda lo Jehovah taem olketa showimaot love and tok kaen taem olketa story witim olketa lo kongregeson and witim olketa nara elder tu.—Col. 4:6.

OLKETA DADI SAVVE LANE FROM KING DAVID

14. Wanem waka nao Jehovah givim lo olketa dadi, and wanem nao hem expectim olketa for duim?

¹⁴ Jehovah markem dadi olsem hed lo famili, and God expectim dadi for trainim and disciplinem pikinini. (1 Cor. 11:3; Eph. 6:4) Bat paoa blo hem for disaedem samting hem garem spialaen, bikos hem mas ansa lo Jehovah from Jehovah nao givim nem long evri famili. (Eph. 3:14, 15) Olketa dadi showimaot olketa obeyim Jehovah taem olketa iusim paoa wea olketa garem lo famili lo wei wea Jehovah bae hapi lo hem. Olketa savve lanem staka samting from example blo King David.

15. Why nao King David hem gudfala example for olketa dadi?

¹⁵ Jehovah appointim David olsem hed, no for famili blo hemseleva nomoa bat for full nation blo Israel tu. Olsem wanfala king, David garem bigfala paoa for disaedem samting. Bat samfala taem hem iusim datfala paoa lo rongfala wei, and duim olketa serious mistek. (Mektu Samuel 11:14, 15) Bat hem showimaot hem stap anda lo Jehovah taem hem acceptim discipline. Hem prea and barava talemaot full heart blo hem lo Jehovah. And hem traem best for followim kaonsel from Jehovah. (Sams 51:1-4) And tu, hem hambol for acceptim gudfala advaes no from olketa man nomoa, bat from olketa woman tu. (Fas Samuel 19:11, 12; 25:32, 33) David lane from olketa mistek blo hem, and hem mekem wei for worshipim Jehovah kamap main samting lo laef blo hem.

16. Olketa wanem leson nao olketa dadi savve lanem from David?

¹⁶ Tingim olketa leson hia wea olketa dadi savve lanem from King David: No iusim rong lo datfala paoa wea Jehovah givim lo iu. No haedem mistek blo iu, bat acceptim kaonsel wea olketa narawan givim from Bible. Sapos iu duim olsem, famili blo iu bae respectim iu bikos iu hambol. Taem iu prea witim famili, prea from heart blo iu lo Jehovah, letem olketa herem hao iu barava depend lo Jehovah. Winim evri samting hia, mekem worship for Jehovah kamap barava important samting lo laef blo iu. (Diutronomi 6:6-9) Gudfala example blo iu hem olsem wanfala nambawan present wea iu savve givim lo famili blo iu.

OLKETA MAMI SAVVE LANE FROM MARY

17. Wanem waka nao Jehovah givim lo olketa mami?

¹⁷ Jehovah givim important waka lo mami insaed famili, and God givim hem paoa tu for disaedem samfala samting for olketa pikinini blo hem. (Provebs 6:20) Tru nao, samting wea mami duim or talem savve barava affectim pikinini for full laef blo hem. (Provebs 22:6) Bae iumi storyim wanem olketa mami savve lanem from Mary, mami blo Jesus.

18-19. Wanem nao olketa mami savve lanem from example blo Mary?

¹⁸ Mary hem savve gud lo olketa Scripture. Hem garem bigfala respect for Jehovah and hem barava fren klos witim Jehovah. Hem willing for obeyim direction wea kam from Jehovah nomata datwan bae changem full laef blo hem.—Luke 1:35-38, 46-55.

¹⁹ Iufala olketa mami savve lane from example blo Mary lo staka difren wei. Lo wanem wei? First, iuseleva need for gohed fren gud witim Jehovah thru lo wei for duim study seleva and for prea seleva. Mek-tu samting, iu need for changem samfala samting lo laef blo iu for mekem Jehovah hapi. Olsem example, maet parents blo iu savve kwiktaem for kros, and tok raf lo iu. From hem nao hao iu growap, maet iu tingse datwan hem normal wei for treatim pikinini. So nomata iu savve finis lo olketa standard blo Jehovah, maet iu faendem hem hard for patient and isi witim pikinini blo iu, especially lo taem wea iu taed and pikinini hem noti. (Eph. 4:31) Lo taem olsem, iu need for barava depend lo Jehovah thru lo prea. Wanfala mami wea nem blo hem Lydia sei: “Samfala taem, mi mas barava prea strong lo Jehovah mekem mi no tok kros lo boy blo mi taem hem no obeyim mi. Samfala taem mi mas stop midol lo toktok blo mi and prea lo heart for Jehovah helpem mi. Prea helpem mind blo mi for kwaet.”—Sams 37:5.

20. Wanem challenge nao samfala mami maet feisim, and hao nao olketa savve winim datwan?

²⁰ Nara challenge wea samfala mami maet feisim, hem nao wei wea hem no isi for olketa showimaot hao olketa lovem pikinini blo olketa. (Titus 2:3, 4) Samfala woman growap lo famili wea parents no garem klos wei for fren witim pikinini. Sapos iu kam from datkaen famili, no duim olsem moa lo pikinini blo iu. Mami wea stap anda lo Jehovah mas lane for showimaot love lo olketa pikinini blo hem. Hem maet hard lelebet for hem changem tingting, feeling and hao hem duim samting. Bat hem savve change, and datwan savve mekem mami and full famili for hapi.

GOHED STAP ANDA LO JEHOVAH

21-22. Olsem Aesaea 65:13, 14, wanem gud samting nao iumi savve kasem from wei for stap anda lo Jehovah?

²¹ King David savve lo olketa gud samting wea man kasem from wei for stap anda lo Jehovah. Hem raet olsem: “Olketa tising blong [Jehovah] hemi stret, an olketa wea i gohed fo obeim i hapi. Olketa strongfala toktok blong hem hemi stret, an hemi gohed fo givim gudfala save long yumi. olketa toktok blong yu ya i gohed fo mekem mi save, wea mi nao wakaman blong yu. An yu givim gudfala samting long mi, bikos mi gohed fo obeim olketa toktok ya.” (Sams 19:8, 11) Distaem, hem isi for luksavve lo olketa wea stap anda lo Jehovah and olketa wea no laekem olketa kaonsel blo Jehovah. Olketa wea stap anda lo Jehovah olketa hapi bikos heart blo olketa fulap witim gudfala samting.—Readim Aesaea 65:13, 14.

²² Taem olketa elder, dadi, and mami willing for stap anda lo Jehovah, laef blo olketa bae kamap moabeta, famili blo olketa bae kamap moa hapi, and full kongregeson bae waka gud tugeta. Bat main important samting nao, olketa bae mekem heart blo Jehovah for barava hapi. (Provebs 27:11) Hapi wea iumi kasem from datwan hem winim eni nara samting!