Helpem Pikinini Bilong Iu for Muv Ahed Long Ministry
1 Olketa Christian parents garem serious responsibility for trainim pikinini bilong olketa for share long ministry start long taem olketa smol yet. Samfala difren wei stap for duim diswan. Samfala pikinini fit for baeheartim wanfala Bible scripture nomata olketa no savve read yet. Diswan savve affectim haosholder long bigfala wei. Taem olketa pikinini kamap big, olketa savve duim moa samting long ministry. Hao nao iufala parents savve helpem pikinini bilong iufala for givim witness? Samfala idea long hia maet helpem iu.
2 Bihaen iu sei hello maet iu savve sei:
◼ “Son bilong mi, [talem nem], laek for talem iu toktok bilong wanfala scripture.” Maet pikinini savve sei: “Disfala scripture long Psalms teachim mi abaotem nem bilong God. [Pikinini readim or baeheartim Psalm 83:18.] Olketa magasin hia storyim wanem Jehovah God bae duim for iumi. Waswe, iu laekem?” For finisim story, iu savve explainim wanem man savve duim for sapotim waka bilong iumi evriwea long world.
3 Or maet iu savve traem diswan:
◼ “Hello. Mi teachim dota bilong mi, [talem nem], wei for tingim narafala pipol long community. Hem laek for sharem shortfala story long Bible witim iu.” Hem savve sei: “Wanfala wei wea mi laek for helpem pipol, hem for sharem hope wea stap long Bible abaotem future witim olketa. [Pikinini readim or baeheartim Revelation 21:4.] Olketa magasin hia explainim samting wea Kingdom bilong God bae duim for iumi. Mi ting iu bae hapi for readim olketa.”
4 Wei for iusim wanfala simpol wei for startim story evritaem savve helpem pikinini for no fraet for sharem Kingdom message. Wei for practice witim olketa for story long kliafala wei and for story big bae helpem olketa for story long enitaem. Gudfala wei for prepare fastaem and wei for praisem olketa bae helpem olketa smol wan for talemaot faith bilong olketa.
5 Wei for givim olketa encouragement olsem hem mekem plande young wan fit for kamap anbaptaes pablisa. Hem barava mekem iumi hapi for lukim olketa pikinini bilong iumi muv ahed long Christian ministry!—Ps. 148:12, 13.