Teachim Pikinini Bilong Iu for Praisem Jehovah
1 Olketa boy and gele kasem encouragement long Psalm 148:12, 13 for “praisem nem bilong Jehovah.” Bible storyim staka example bilong olketa young wan wea duim datwan. Olsem example, “Samuel servem Jehovah taem hem smol boy.” (1 Sam. 2:18) Wanfala “smol gele” nao story long waef bilong Naaman hao profet bilong Jehovah long Israel savve healim leprosy bilong Naaman. (2 Ki. 5:1-3) Taem Jesus go insaed long temple and duim olketa mirakol, “olketa boy” nao singaot olsem: “Mifala prea for Son bilong David mas sev!” (Matt. 21:15) Long wanem wei nao parents savve teachim pikinini bilong olketa for praisem Jehovah?
2 Example: Olketa dadi long Israel kasem instruction for lovem Jehovah and for putim olketa komandment bilong hem insaed long heart bilong olketa seleva firstaem bifor olketa savve strongim truth insaed heart bilong pikinini bilong olketa. (Deut. 6:5-9) Sapos iu storyim olketa gud samting abaotem ministry and garem schedule for duim ministry evri week, olketa pikinini bae ting long ministry olsem hem important and samting wea mekem man hapi.
3 Wanfala sista ting go bak and hem sei: “Taem mi pikinini, famili bilong mi garem schedule for share long field ministry evri weekend. Mi lukim hao parents bilong mi barava enjoyim waka for preach. Taem mifala big, mifala ting long ministry olsem samting wea mekem mifala feel hapi.” Disfala sista hem anbaptaes pablisa taem hem seven year and hem duim full-taem service for winim 32 year.
4 Gohed for Trainim: Taem iu duim ministry, encouragem pikinini bilong iu for tekpart. Maet olketa savve noknok long door, givim tract long haosholder, or readim wanfala scripture. Diswan bae mekem olketa hapi and helpem olketa for no fraet for preachim message abaotem Kingdom. Taem olketa big, olketa shud duim moa samting long ministry. So helpem olketa for muv ahed and for ting raonem olketa goal wea bae helpem olketa long ministry.
5 Story witim olketa elder taem iu luksavve hao pikinini bilong iu fit for kamap anbaptaes pablisa and taem pikinini talem hao hem laek for duim datwan. Wei for kamap pablisa bae mekem olketa ting strong long wei wea olketa seleva garem responsibility for praisem Jehovah. Tingim hao wanfala pikinini no need for savve long plande samting olsem bigman wea baptaes bifor hem fit for kamap anbaptaes pablisa. Waswe, pikinini bilong iu minim olketa main teaching long Bible? Waswe, hem followim olketa standard bilong Bible saed long fasin? Waswe, hem laek for share long ministry and for pipol savve hao hem wanfala Jehovah’s Witness? Sapos olsem, maet olketa elder disaed hao hem fit for kamap anbaptaes pablisa.—Lukim Organized to Do Jehovah’s Will, pp. 79-82.
6 Parents need for waka hard for teachim pikinini for praisem Jehovah from heart bilong hem. Bat parents bae barava hapi for lukim pikinini bilong olketa muv ahed long spiritual wei. Barava important samting nao, Jehovah hem hapi taem olketa pikinini story abaotem olketa nambawan samting wea hem duim.
[Olketa Kwestin]
1. Waswe, olketa young wan savve praisem Jehovah?
2. Why nao hem important for parents showimaot gudfala example long pikinini bilong olketa?
3. Wanem gud samting nao wanfala sista kasem from example bilong parents bilong hem?
4. Wanem nao hem minim for gohed trainim olketa pikinini?
5. Wanem nao wanfala pikinini need for duim mekem hem fit for kamap anbaptaes pablisa?
6. Why nao hem gud samting for parents trainim pikinini bilong olketa?