Samting wea Ministry Bilong Iumi Hem Duim
1. Hao nao Jehovah ting long ministry bilong iumi, and wanem nao olketa man duim saed long datwan?
1 Bible hem story abaotem olketa Christian olsem olketa wea march insaed service bilong Jehovah, olsem olketa wea winim faet. (2 Cor. 2:14-16) Taem iumi talemaot savve bilong God, samting wea iumi duim long ministry hem kamap olsem incense wea Jehovah laekem tumas. Wei wea datfala gud nius hem naes tumas hem pullim interest bilong samfala, bat olketa narawan rejectim datwan. Bat wei wea staka no laekem, hem no minim iumi no kasem eni gud samting from waka bilong iumi. Lukim wanem ministry bilong iumi hem duim.
2. Wanem samting nao ministry bilong iumi mekem iumi fit for showimaot?
2 Mekhae Long Jehovah: Satan hem sei olketa man servem Jehovah for olketa selfish reason. (Job 1:9-11) Christian ministry givim iumi chance for showimaot hao love bilong iumi for Jehovah hem tru. Plande pablisa gohed for obeyim datfala komand for preach and teach nomata living wea olketa garem hem no isi or pipol no interest. Loyal wei for stand strong olsem hem mekem heart bilong Jehovah hapi!—Prov. 27:11.
3. Why nao hem barava important for iumi gohed for talemaot long pipol, nem and plan bilong God?
3 Nara samting moa, ministry bilong iumi hem join tu witim wei wea plan bilong God gohed for fulfill. Jehovah sei olsem abaotem end bilong world bilong Satan: “Olketa nation bae mas savve hao mi nao Jehovah.” (Ezek. 39:7) For olketa nation savve long diswan, hem barava important for olketa servant bilong God gohed for talemaot nem and plan bilong God “long evri nation and tribe and languis and pipol.”—Rev. 14:6, 7.
4. Hao nao preaching waka hem faondeson bilong judgment?
4 Faondeson Bilong Judgment: Wei wea iumi preachim gud nius hem faondeson bilong judgment tu. Aposol Paul hem talem hao Christ Jesus bae pei bak long “olketa wea no savve long God and olketa wea no obeyim gud nius abaotem Lord bilong iumi Jesus.” (2 Thess. 1:8, 9) Judgment wea pipol kasem bae depend long samting wea olketa duim followim gud nius. Datwan hem serious responsibility wea olketa servant bilong God garem! Iumi mas no hol bak for talemaot message bilong Kingdom wea bae sevem laef, mekem iumi no guilty long blood.—Acts 20:26, 27.
5. Hao nao mercy bilong God hem showaot long ministry bilong iumi?
5 Mercy bilong God hem showaot long wei wea iumi gohed for helpem olketa neiba for duim samting wea bae mekem God appruvim olketa. (1 Tim. 2:3, 4) From iumi savve laef bilong pipol hem change evritaem, iumi gohed for go bak long olketa and for encouragem olketa for lukaotem Jehovah taem iumi still garem taem. Taem iumi duim olsem, iumi showimaot “loving kea bilong God bilong iumi,” wea “no laekem eniwan for dae bat hem laekem evriwan for repent.”—Luke 1:78; 2 Pet. 3:9.
6. Wanem gudfala samting nao iumi kasem from wei wea iumi busy long service bilong Jehovah?
6 Givim Gud Samting Long Iumiseleva: Hem wanfala protection for iumi gohed for busy long service bilong Jehovah. Hem helpem iumi for “tingim evritaem day bilong Jehovah,” and for stap klia long wei wea world savve mekem iumi no klin. (2 Pet. 3:11-14; Titus 2:11, 12) Dastawe, iumi mas “stand strong, no seksek, and evritaem garem staka samting for duim long waka bilong Lord,” and savve hao iumi no hard waka nating long Christian ministry.—1 Cor. 15:58.