Story Long Pipol Abaotem “Laet Bilong World”
1. Wanem nambawan laet nao Word bilong God profesi abaotem, and wanem nao datfala spesol celebration wea mekhae long disfala laet?
1 Jehovah talem profesi olsem thru long profet Isaiah: “Pipol wea wakabaot long darkness lukim wanfala nambawan laet. And laet shaen kam long olketa wea stap long ples bilong bigfala shadow.” (Isa. 9:2) Datfala “nambawan laet” hem showaot long fasin and samting wea Son bilong God, Jesus Christ, hem duim. Preaching waka wea hem duim taem hem stap long earth and olketa gud samting wea kamaot from sakrifaes wea hem givim, helpem pipol wea stap long spiritual darkness. Long disfala taem wea dark tumas pipol barava needim datkaen laet. Datfala Evening Kaikai bilong Lord hem spesol chance for iumi mekhae long datfala “laet bilong world.” (John 8:12) Last year, plande million pipol showimaot faith long wei for join witim iumi for obeyim disfala komand bilong Jesus: “Gohed for duim olsem for rememberim mi.” (Luke 22:19) From Memorial bilong disfala year hem kakam klosap, hao nao iumi savve share for mekem pipol luksavve long datfala nambawan laet wea Jehovah mekem for shaen kam?—Phil. 2:15
2. Hao nao iumi savve strongim long heart bilong iumi wei for tinghae long ransom sakrifaes, and wanem nao savve kamaot from diswan?
2 Mekem Grow Wei for Tinghae From Heart: March and April hem gudfala taem for ting raonem bigfala love wea Jehovah and Jesus showimaot long wei for provaedem ransom sakrifaes for olketa man. (John 3:16; 2 Cor. 5:14, 15) Wei for ting raonem olsem bae strongim heart bilong iumi for tinghae long disfala celebration wea holy. Hem gud for pipol bilong God for markem taem for readim and ting raonem datfala spesol Memorial Bible reading insaed long Lukluk Long Olketa Scripture Evriday. Wei for tingim olketa nambawan fasin bilong Jehovah, wea barava showaot long wei wea hem provaedem datfala ransom, mekem iumi praod from hem nao God bilong iumi. Wei for ting raonem gud samting wea datfala ransom duim for iumi wanwan, savve strongim love bilong iumi for God and Son bilong hem, and savve muvim iumi for traem best bilong iumi for duim will bilong God.—Gal. 2:20.
3. Hao nao iumi savve showimaot iumi tinghae long Memorial?
3 Sapos iumi barava tinghae long datfala samting wea Jehovah provaedem for sevem iumi, diswan bae showaot long olketa Bible student, return visit, relative, neiba, skulfren, wakfren, and olketa narawan wea iumi invaetem long disfala spesol Memorial celebration. (Luke 6:45) So, trae hard for invaetem olketa olsem, and givim Memorial invitation pepa for remindim olketa. Staka raetem wanfala list bilong pipol wea olketa savve invaetem evritaem long Memorial mekem olketa no forget, and evri year olketa invaetem samfala niu wan moa. Wei for organize olsem and duim wanem iumi fit for duim for invaetem olketa wea interest hem gudfala wei for showimaot thankiu long Jehovah God “for free present bilong hem wea winim evri samting.”—2 Cor. 9:15.
4. Wanem nao iumi savve duim for spendem moa taem long ministry long March and April?
4 Spendem Moa Taem Long Ministry: Waswe, iu savve spendem moa taem long ministry long March and April? God bae barava blessim wei wea iu waka hard for sharem datfala “nambawan gud nius abaotem Christ” long nara pipol. Jehovah wea hem nao start bilong spiritual laet, hem givim disfala komand: “Mekem laet shaen kamaot from darkness.” (2 Cor. 4:4-6) For fitim need, olketa elder bae arrangem olketa meeting for field service long samfala extra taem and ples, and olketa bae sapotim olketa pablisa wea laek for spendem moa taem long ministry. Maet insaed long disfala arrangement hem wei for duim street waka barava early long morning, or for duim olketa bisnis territory. For helpem iu duim moa long ministry, markem goal bilong olketa hour wea fitim iu, and waka hard for kasem datwan. For plande, for duim best bilong olketa for Jehovah hem nao for duim auxiliary pioneer.—Col. 3:23, 24.
5. Wanem gud samting nao staka kasem from hour bilong auxiliary pioneer hem katdaon?
5 Waswe, Iu Fit for Auxiliary Pioneer? Hem winim sevenfala year finis from taem wea hour for auxiliary pioneer hem katdaon. Disfala change mekem staka moa fit for kasem olketa blessing from wei for auxiliary pioneer. Waswe, iu traem finis? Hem wei bilong samfala for duim datwan evri year. Long plande kongregeson staka pablisa duim disfala waka tugeta, and hem kamap spesol samting wea kongregeson duim insaed long year. Waswe, iu savve markem long schedule bilong iu for auxiliary pioneer long month bilong March or April? Samfala chusim April from hem garem faevfala weekend.
6. Wanem nao olketa barava spesol arrangement wea stap?
6 Waswe, circuit overseer bae visitim kongregeson bilong iu long March or April? Maet iu kasem nara blessing tu. Olsem iumi herem finis, long 2006 service year, evriwan wea duim auxiliary pioneer long month wea circuit overseer hem visit bae kasem invitation for attendim first haf long meeting bilong olketa pioneer. Olketa spiritual information wea bae kamap long disfala meeting bae helpem staka auxiliary pioneer for kamap regular pioneer. And witim diswan, long March iumi hapi tu for helpem pipol for kam long spiritual laet taem iumi iusim datfala brochure, Wanem nao God Mas Kasem From Iumi? Hem gud for markem goal for iuseleva for startim Bible study long datfala brochure.
7, 8. (a) Wanem nao savve helpem iumi for mekem schedule for duim auxiliary pioneer? (b) Hao nao wei wea famili waka tugeta hem savve help, and hao nao diswan helpem full famili?
7 Taem iu ting raonem 50 hour wea auxiliary pioneer mas kasem, mekem wanfala schedule wea bae helpem iu for mekem laet bilong truth hem shaen for samting olsem 12 hour each week. Story witim olketa wea win for duim diswan finis, and witim olketa narawan. Maet diswan encouragem olketa narawan for duim diswan witim iu. Taem olketa young wan and olo wea baptaes finis mekem gudfala plan, olketa faendem hao hem no hard for kasem datfala goal. Prea abaotem datwan. Then, sapos hem fitim, mekem olketa plan bilong iu, and enjoyim auxiliary pioneer waka!—Mal. 3:10.
8 Plande famili faendem hao sapos olketa waka tugeta for sapotim each other, wanfala famili member savve kasem disfala goal. Wanfala famili disaed hao faevfala insaed famili wea baptaes bae auxiliary pioneer. Tufala pikinini wea no baptaes yet duim moa waka winim wanem olketa savve duim bifor. Wanem gud samting nao famili hia kasem from wei wea olketa duim moa samting? Olketa raet olsem: “Mifala enjoyim tumas datfala month, and mifala barava feel hao wei wea famili waka tugeta hem kamap moa strong. Mifala thankiu for nambawan blessing bilong Jehovah!”
9. Hao nao iumi savve mekem laet bilong iumi shaen big long olketa spesol month long taem bilong Memorial?
9 Waswe, bae disfala spesol waka bilong iumi long March and April muvim iumi, and mekem iumi kam moa klos long Dadi bilong iumi long heven? For iumi win long diswan, hem depend long wei wea iumiseleva waka hard for strongim love bilong iumi for God and Son bilong hem and wei for duim moa samting long ministry. Iumi savve olsem man wea raetem psalm, wea singsing olsem: “Mi bae praisem Jehovah long bigfala wei witim mouth bilong mi, and midolwan long plande pipol mi bae praisem hem.” (Ps. 109:30) Jehovah bae blessim waka bilong iumi long olketa spesol month long taem bilong Memorial. So, iumi mas mekem laet bilong iumi shaen long bigfala wei mekem staka moa savve kamaot from darkness and “garem laet bilong laef.”—John 8:12.