Spesol Awake! Magasin for Iusim Long September
1 Klosap evriwan laekem tumas for herem singsing bilong olketa bird and for lukim taem sun go daon wea luk naes tumas. Nomata olsem, staka pipol no laek acceptim hao Dadi bilong iumi long heven wea lovem iumi, hem nao wakem olketa samting hia. Iumi bae garem spesol privilege for witness abaotem wei wea Jehovah nao Creator taem iumi givimaot wanfala spesol Awake! magasin. (Isa. 40:28; 43:10) Only subject wea datfala Awake! magasin bilong September bae storyim nao hem “Is There a Creator?”
2 Long Territory: Sapos iu savve duim, mekem arrangement for waka witim kongregeson long haos-tu-haos ministry evri Saturday. Iu savve offerim disfala spesol magasin eni narataem long week tu. Olketa teacher and olketa narawan wea waka saed long education bae barava interest long disfala magasin. So, maet samfala spesol arrangement savve kamap for visitim pipol olsem long territory bilong iu.
3 Sapos man hem interest, askem wanfala kwestin wea bae iu ansarem taem iu go bak for visitim hem. Olsem example, maet iu savve askem kwestin abaotem plan bilong Creator for disfala earth, and taem iu go bak, storyim leson 5 long Kasem brochure.
4 Long Skul: Sapos iu go long skul, hem gud for givim disfala spesol Awake! olsem present long olketa teacher and olketa nara student. Sapos iu putim magasin antap long desk bilong iu maet datwan mekem samfala askem iu abaotem biliv bilong iumi. Iu savve iusim information insaed datfala magasin for defendim faith bilong iu taem full class storyim wanfala subject and taem teacher givim assignment long class for raet abaotem wanfala subject. Wanfala “Young People Ask” article hem insaed datfala magasin wea garem title, “How Can I Defend My Belief in Creation?” wea savve helpem iu.
5 Jehovah fit for kasem honor and glory from hem nao Creator. (Rev. 4:11) Iumi savve givim honor long Creator bilong iumi and iumi savve helpem nara pipol for duim sem samting taem iumi waka hard for offerim September Awake! magasin.