Hao for Startim Olketa Bible Study Witim Olketa wea Tekem Magasin
1. Wanem nao goal bilong iumi long April and May?
1 Long April and May, iumi bae iusim Wastaoa and Awake! and taem iumi duim return visit, bae iumi garem goal for iusim Kasem brochure for startim olketa Bible study. Maet iu savve iusim samfala idea wea stap long daon. Iu shud lelebet changem olketa idea hia for fitim territory bilong iu, and trae for talem long toktok bilong iuseleva. Iu savve iusim tu eni gudfala wei for startim story wea iuseleva laekem.
◼ “Bible hem talem hao Kingdom bilong God nomoa givim trufala hope for future.” Showim haosholder page 12 and 13, and sei olsem, “Wanem nao Kingdom bilong God bae duim for olketa man long future?” Storyim samfala point from paragraf 5-7.
◼ Or iu savve sei olsem, “Bible garem ansa for olketa barava important kwestin long laef.” Showim page 2 long haosholder and askem hem sapos enitaem hem ting raonem eni topic long disfala page. Tanem page go long leson wea tok abaotem datfala topic, and storyim lelebet wan or tufala paragraf.
2. Hao nao maet iumi savve startim Bible study bihaen iumi offerim magasin wea storyim (a) wei wea laef long world barava nogud? (b) famili? (c) worship wea God hapi long hem?
2 Talem Wanfala Kwestin wea Bae Iu Ansarem Next Taem: Narafala samting wea iu savve duim hem for talem wanfala kwestin bihaen haosholder tekem magasin, and talem hao iu bae ansarem datwan long next taem wea iu bae go bak. Trae for arrangem taem for go bak, and mek sure iu go bak long taem wea iutufala arrangem. (Matt. 5:37) Taem iu go bak, talem moa datfala kwestin long haosholder, then readim and storyim lelebet wan or tufala paragraf long Kasem brochure wea bae ansarem datfala kwestin. Givim hem wanfala brochure mekem hem savve lukluk followim taem hem read. Samfala example hem olsem.
◼ Sapos magasin wea iu offerim hem story abaotem wei wea laef long world barava nogud, iu savve sei, “Next taem bae iumi tufala storyim ansa wea Bible garem for disfala kwestin, Wanem gud samting nao God bae duim for disfala earth?” Taem iu go bak, iusim leson 5, and storyim information wea stap long paragraf 5 and 6.
◼ Sapos iu offerim magasin wea storyim famili, iu savve sei olsem bifor iu lusim datfala man, “Wanem nao each member bilong famili savve duim for mekem famili hapi?” Taem iu go bak, storyim paragraf 5 long leson 8.
◼ Sapos iu offerim magasin wea storyim worship wea God hapi long hem, iu savve askem disfala kwestin for iutufala storyim next taem, “Hao nao iu savve faendem tru religion?” Taem iu go bak, storyim paragraf 1 and 2, long leson 13.
3. Wanem nao iumi savve duim sapos haosholder no laek tekem Kasem brochure?
3 Taem iutufala story finis, talem nara kwestin moa, mekem iu savve ansarem taem iu go bak for lukim hem next taem. Bihaen tu-thri taem wea iu duim datwan, start long leson 1, and duim olketa evri leson go kasem end bilong brochure. Waswe sapos haosholder no laek tekem Kasem brochure? Iu savve gohed for tekem olketa niu magasin long hem and storyim eni point from Bible evritaem wea iu go bak for lukim hem. Taem iu gohed for mekem interest bilong hem kamap moa big, maet gogo hem bae laek for studyim Bible.
4. Why nao iumi shud trae for duim moa samting winim wei for just offerim olketa magasin long pipol nomoa?
4 Jesus komandim iumi for “mekem pipol long evri nation for kamap disaepol . . . and teachim olketa.” (Matt. 28:19, 20) Dastawe main goal bilong iumi hem for teachim truth long olketa wea garem gudfala heart wea tekem olketa magasin. Long April and May, trae hard for startim wanfala Bible study long eniwan wea tekem Wastaoa and Awake! magasin.