Helpem Olketa Narawan for Kamap Olketa Fren Bilong God
1 Distaem Jehovah teachim olketa wei bilong hem long pipol bilong evri nation. (Isa. 2:2, 3) Bat for olketa hia “garem frut witim fasin for gohed strong,” olketa mas lovem Jehovah. (Luke 8:15; Mark 12:30) Diskaen love savve strongim olketa for againstim olketa nogud samting wea savve spoelem olketa or for no fraet for duim samting wea stret. Wanfala wei for helpem olketa narawan for gohed fren gud witim Jehovah, hem nao for mekem grow wei for lovem olketa fasin bilong hem. Encouragem olketa for tingting raonem information long disfala buk, Kam Klos Long Jehovah.
2 Example Bilong Iu: Samting wea iuseleva duim savve barava affectim olketa Bible student. Taem olketa lukim iu tinghae long wei wea iu fren witim Jehovah and lukim hao datwan affectim laef bilong iu, maet diswan muvim olketa for mekem grow wei for fren witim Jehovah. (Luke 6:40) Tru tumas, plande taem example bilong iumi savve affectim olketa narawan, winim samting wea iumi talem.
3 Wanfala main samting wea parents garem for teachim olketa pikinini for lovem Jehovah hem example bilong olketa. (Deut. 6:4-9) Wanfala hasband and waef wea laek for teachim olketa pikinini bilong tufala long truth askem advaes long samfala parents wea win long diswan. Hasband hem sei olsem: “Evriwan wea mi story witim olketa talem hao example bilong parents nao main samting.” Dastawe long living bilong olketa evriday, parents savve showim long pikinini bilong olketa wanem nao hem minim for kamap “fren bilong Jehovah.”—Jas. 2:23.
4 Prea wea Kam From Heart: Iu savve helpem olketa narawan for gohed fren gud witim Jehovah taem iu teachim olketa for prea from heart. Maet iu savve showim long olketa example prea bilong Jesus, and tu, plande gudfala prea wea stap insaed long Bible. (Matt. 6:9, 10) Iu savve teachim olketa pikinini and Bible student bilong iu for prea, taem olketa lisin long wei wea iu prea. Taem olketa herem prea bilong iu wea kam from heart, olketa luksavve long feeling iu garem for Jehovah. Encouragem olketa for “gohed for prea” taem olketa kasem hard taem. (Rom. 12:12) Taem olketa lukim Jehovah hem helpem olketa taem need kamap, olketa bae trustim hem and lovem hem olsem wanfala tru fren.—Ps. 34:8; Phil. 4:6, 7.