Gudfala Wei for Duim Street Witnessing
1. Hao nao iumi savve followim example bilong Jesus?
1 Taem Jesus duim ministry, hem no hol bak for story long pipol wea hem meetim long road and long pablik ples. (Luke 9:57-61; John 4:7) Hem laek storyim important message wea hem garem long staka pipol. Distaem, street witnessing hem nambawan wei for helpem pipol kasem wisdom bilong God. (Prov. 1:20) Iumi savve duim gud street witnessing sapos iumi nao go story long man and garem wei for luksavve.
2. Taem iu duim street witnessing, wanem nao iu savve duim for story long pipol and for story moa witim olketa wea interest?
2 Go Story Long Man: Staka taem hem gud for iu nao go story long man winim wei for standap or sidaon long wanfala ples and weit for pipol wea go pas for kam story long iu. Smile long pipol, luk long olketa, and story long gudfala wei. Sapos iu waka witim olketa nara pablisa, hem bae gud for pablisa wanwan story witim pipol. Iu mas duim samting tu for mekem iu savve story moa witim olketa wea interest. Sapos hem fitim, bihaen iutufala story, askem hem hao nao iu savve kasem hem for iutufala story moa. Samfala pablisa duim street witnessing evritaem long sem ples. Datwan mekem olketa savve story staka taem long sem pipol for helpem olketa for lanem truth.
3. Hao nao iumi savve garem wei for luksavve taem iumi duim street witnessing?
3 Garem Wei for Luksavve: Garem gudfala tingting taem iu disaed wea nao iu bae standap long street and hu nao iu bae go story witim. Iu no need for story long evri man wea go pas. Lukluk gud long evriwan. Olsem example, sapos man hem hariap, maet hem gud for no story long hem. Taem iu street front long bisnis ples, iusim gudfala tingting nogud iu mekem boss no hapi. Staka taem hem gud for witness long pipol taem olketa kamaot from bisnis ples and no taem olketa go insaed. Taem iu go for story witim pipol, no sekem olketa or mekem olketa fraet. Nara samting tu, garem wei for luksavve taem iu laek offerim pablikeson. Sapos man showimaot hem no interest tumas, maet iu savve offerim wanfala tract and no olketa magasin.
4. Why nao hem gud for duim street witnessing?
4 Street witnessing helpem iumi for plantim staka seed bilong truth insaed lelebet taem nomoa. (Eccl. 11:6) Maet iumi story witim samfala pipol wea no stap long haos taem iumi duim haos tu haos. Hem gud sapos iu plan for duim street witnessing. Hem wanfala wei for preach wea savve mekem iumi hapi and helpem iumi for duim gud ministry bilong iumi.