Man Kasem Blessing Taem Hem Willing for Help
1. Hao nao David and Nehemiah showimaot wei for willing?
1 Taem Goliath tok spoelem army bilong Israel, eni soldia nomoa savve willing for go faetem hem. Bat gogo wanfala boy wea lukaftarem sheepsheep and wea no kasem eni training for faet long war, hem nao willing for go faetem hem. (1 Sam. 17:32) Taem olketa Jew wea stap long Babylon go bak long Jerusalem olketa nating buildim bak wall bilong Jerusalem. Gogo, wanfala man wea waka for givim drink long king bilong Persia nao willing for lusim datfala naes waka insaed haos bilong king and hem travel go long Jerusalem for go stretem datfala waka for buildim wall. (Neh. 2:5) Tufala man hia nao David and Nehemiah, and Jehovah blessim tufala from olketa showimaot olketa willing for help.—1 Sam. 17:45, 50; Neh. 6:15, 16.
2. Why nao olketa Christian shud willing for helpem narawan?
2 Distaem, plande pipol nating willing for helpem narawan. From iumi stap long “olketa last day,” pipol busy tumas evritaem, and plande “lovem olketa seleva” nomoa. (2 Tim. 3:1, 2) Hem isi tumas for man busy for aftarem samting wea hemseleva laekem, gogo, hem no luksavve long olketa chance for helpem olketa narawan wea garem need. Bat from iumi Christian, iumi laek for followim Jesus wea lukaotem chance for helpem olketa narawan. (John 5:5-9; 13:12-15; 1 Pet. 2:21) Hao nao iumi savve showimaot iumi willing for helpem olketa narawan, and wanem blessing nao bae iumi kasem?
3. Taem man willing for help, hao nao diswan helpem olketa meeting bilong kongregeson?
3 Helpem Olketa Brata Bilong Iumi: Iumi savve givim “spiritual present” long olketa narawan taem iumi willing for ansa long meeting. (Rom. 1:11) Wei for ansa hem showaot honor long Jehovah, hem mekem truth kamap moa strong insaed mind and heart bilong iumi, and hem mekem iumi hapi long olketa meeting. (Ps. 26:12) Iumi savve willing tu for givim tok long Theocratic Ministry Skul sapos olketa needim volunteer. Diswan bae mekem wei wea iumi teach hem kamap moabeta.
4. Wanem nao olketa narafala wei wea iumi savve showimaot iumi willing for help?
4 Olketa brata savve showimaot olketa willing for help taem olketa waka hard for kasem olketa responsibility insaed kongregeson. (Isa. 32:2; 1 Tim. 3:1) Evriwan savve mekem olketa assembly and convention gohed gud taem olketa willing for duim eni waka for help long datfala taem. Taem iumi willing for waka witim traveling overseer long ministry or givim kaikai long hem, bae iumi kasem gud samting from wei for “encouragem each other.” (Rom. 1:12) Taem iumi willing for helpem olketa pikinini wea no garem dadi, olketa widow, olketa wea sik and olo, olketa mami wea garem olketa smol pikinini, and olketa narawan long kongregeson, iumi bae hapi and bae Jehovah hapi long iumi tu.—Prov. 19:17; Acts 20:35.
5. Wanem nao samfala waka wea iumi savve willing for duim for Kingdom Hall?
5 Narafala samting wea iumi savve duim hem for willing for givim taem and strong bilong iumi for help klinim and keepim gud Kingdom Hall. And tu, staka pipol distaem laek for worshipim Jehovah, so bigfala need stap for garem olketa niu Kingdom Hall and for garem olketa willing brata and sista for buildim olketa. Wanfala hasband and waef wea no savve hao for wakem haos, talem Regional Building Komiti wea stap long ples bilong olketa hao olketa willing for help. Gogo, tufala kasem training and distaem tufala savve hao for wakem olketa brik wall. Waef hia hem sei: “Wei wea mifala waka tugeta witim olketa narawan hem mekem barava gud wei for fren kamap. Taem kasem evening, mifala feel taed fogud bat long spiritual saed mifala feel strong.”
6. Why nao ministry hem moa important winim eni nara waka wea iumi savve duim for helpem narawan?
6 Taem Iumi Preach: Barava important waka wea iumi savve willing for duim distaem hem nao waka for preach abaotem Kingdom. Taem iumi helpem pipol for minim and followim kaonsel long Bible, olketa bae minim why nao iumi laef and bae olketa strong for lusim olketa nogud fasin wea olketa garem bifor. Olketa bae lane abaotem spesol hope for future wea Bible storyim. Taem iumi teachim pipol abaotem Bible, iumi duim wanfala waka wea bae mekem iumi hapi and hem helpem pipol kasem gud samting for olowe. (John 17:3; 1 Tim. 4:16) Maet iumi fit for duim moa samting insaed disfala waka, olsem wei for auxiliary or regular pioneer, muv go long ples wea needim samfala moa pablisa, or for lanem nara languis.
7. Why nao hem important tumas for iumi willing for help distaem?
7 King David talem profesi abaotem taem wea Messiah bae start for rul and hem sei long datfala taem pipol bilong God bae “willing for givim olketa seleva.” (Ps. 110:3, ftn.) From Jehovah mekem disfala spiritual waka for harvest hem muv ahed kwiktaem, bigfala waka stap for olketa servant bilong Jehovah wea willing for duim datwan. (Isa. 60:22) Waswe, iu talem sem samting olsem Isaiah: “Mi long hia! Sendem mi”? (Isa. 6:8) Tru nao, taem iumi showimaot iumi willing for help, iumi mekem Jehovah hapi and iumi bae kasem olketa nambawan reward.