Waswe, Iu Redi for Taem Bilong Natural Disaster?
1. Why nao hem wise for redi for taem bilong olketa disaster?
1 Evri year, olketa earthquake, tsunami, cyclone, hurricane, tornado, and flood spoelem plande million pipol raonem world, wea insaed diswan hem olketa brata and sista bilong iumi tu. From olketa natural disaster savve seknomoa happen and affectim eniwan long iumi, hem wise for redi firstaem for olketa taem olsem.—Prov. 21:5.
2. Why nao iumi shud talem olketa elder wea nao iumi stap and telephone namba bilong iumi?
2 Prepare Firstaem: Samfala taem gavman savve givim warning abaotem disaster wea klosap for happen. Hem important for followim olketa warning hia. (Prov. 22:3) Long taem olsem, olketa elder bae trae for go lukim or story witim each wan insaed kongregeson for helpem olketa for redi. And tu, bihaen long wanfala disaster, olketa elder bae traem best for go lukim or story witim evriwan insaed kongregeson for mek sure olketa stap sef, and for luksavve hu nao needim help and wanem kaen help nao hem needim. Sapos olketa elder no garem telephone namba or no savve wea nao evriwan stap, bae olketa weistim staka taem for faendemaot olketa information hia. So hem important for olketa pablisa talem secretary and buk study overseer bilong olketa abaotem ples wea olketa stap and telephone namba bilong olketa.
3. Hao nao iumi savve waka tugeta witim olketa elder sapos iumi stap long ples wea disaster savve kasem evritaem?
3 Sapos kongregeson hem stap long wanfala area wea disaster savve kasem evritaem, olketa elder savve askem olketa pablisa for givim nem and telephone namba bilong wanfala relative or fren wea no stap long datfala area. Reason for diswan hem for olketa elder savve faendem olketa pablisa wea ranawe go long relative bilong olketa taem eni samting hem happen. Bifor eni disaster hem happen, olketa elder savve mekem wanfala plan for kongregeson followim sapos datwan hem happen. Insaed diswan hem wanfala simpol list bilong olketa samting wea each wan mas garem, arrangement for followim sapos evriwan mas kwiktaem lusim datfala ples, and hao for helpem olketa olo or olketa wea garem sik. Hem important for evriwan waka tugeta long olketa arrangement hia.—Heb. 13:17.
4. Wanem nao iumi shud duim sapos wanfala disaster hem kasem ples wea iumi stap?
4 Bihaen Disaster Happen: Wanem nao iu shud duim sapos wanfala disaster hem happen long ples wea iu stap? First samting hem for lukaftarem olketa need bilong famili bilong iuseleva. Sapos iu fit for duim, helpem olketa narawan wea kasem trabol tu. Traem best for kwiktaem go lukim or story witim buk study overseer or eni nara elder. Iu mas duim diswan nomata sapos iu stap sef and no needim eni help. Sapos iu needim help, iu savve feel sure olketa brata bilong iu bae traem best for helpem iu. (1 Cor. 13:4, 7) No forgetim hao Jehovah savve long samting wea kasem iu, so depend long hem for strongim iu. (Ps. 37:39; 62:8) Lukaotem olketa chance for helpem olketa narawan long spiritual wei and saed long feeling. (2 Cor. 1:3, 4) No delay for followim bak spiritual schedule bilong iu taem iu fit for duim datwan.—Matt. 6:33.
5. From iumi olketa Christian, hao nao iumi ting long disaster?
5 Nomata pipol long world wari tumas taem olketa tingim olketa disaster, iumi garem faith and trust taem iumi tingim future. Klosap nao olketa disaster bae finis. (Rev. 21:4) Go kasem datfala taem, iumi savve duim samting for redyim iumiseleva for olketa hard taem, taem iumi gohed strong for talemaot gud nius long nara pipol.